മിഷേൽ ഷാജിയുടെ (18) ദുരൂഹമരണം സംബന്ധിച്ച ക്രൈംബ്രാഞ്ച് അന്വേഷണത്തിൽ വിശ്വാസം നഷ്ടപ്പെട്ടെന്നും മിഷേലിന്റെ പിതാവ് ഷാജി വര്‍ഗ്ഗീസ്. 2017 മാർച്ച് ആറിനു വൈകിട്ടോടെയാണ് വേമ്പനാട് കായലിൽ ഐലൻഡ് വാര്‍ഫിനടുത്ത് സി എ വിദ്യാര്‍ത്ഥിനി മിഷേലിന്‍റേ മൃതദേഹം ദുരൂഹമായ നിലയിൽ കണ്ടെത്തിയത്.

ഷാജി വർഗീസ് സമർപ്പിച്ച ഹർജിയിന്മേൽ നൽകിയ വിശദീകരണത്തിൽ മിഷേലിനെ കാണാതായ ദിവസം ക്രോണിൻ ഫോണിലൂടെ മാനസികമായി ബുദ്ധിമുട്ടിച്ചതിനെ തുടർന്ന് ആത്മഹത്യ ചെയ്തതെന്നാണ് ക്രൈംബ്രാഞ്ച് പ്രത്യേക അന്വേഷണ സംഘം ഹൈക്കോടതിയെ അറിയിച്ചത്.

പോസ്റ്റ്മോർട്ടം റിപ്പോർട്ട് പ്രകാരം ശരീരത്തിൽ ബലപ്രയോഗമോ പീഡനശ്രമമോ ഉണ്ടായിട്ടില്ലെന്നും മുങ്ങിമരണമാണെന്നും ഡോക്ടറുടെ മൊഴിയിലും ഇത് വ്യക്തമാണെന്നും ക്രൈംബ്രാഞ്ച് വ്യക്തമാക്കിയിരുന്നു. എന്നാൽ, മിഷേൽ ആത്മഹത്യ ചെയ്തതാണെന്ന പോലീസിൻ്റെ വാദം അംഗീകരിക്കാൻ ആകുന്നതല്ലെന്നും മകളുടേത് കൊലപാതകമാണെന്നും ഷാജി വർഗീസ് വാദിച്ചു.

സംഭവത്തിലെ ദുരൂഹത 16 മാസത്തിനു ശേഷവും തുടരുകയാണ്. ആത്മഹത്യയാണെന്നു പറയുന്ന പോലീസും ക്രൈംബ്രാഞ്ചും അന്വേഷണം പൂര്‍ത്തിയാക്കി അന്തിമറിപ്പോര്‍ട്ട് കൈമാറാത്തത് എന്തുകൊണ്ടാണെന്നും ഷാജി വർഗീസ് ചോദിക്കുന്നു. മിഷേലിനെ കാണാതായി, 24 മണിക്കൂറോളം കഴിഞ്ഞാണു മൃതദേഹം ലഭിച്ചത്. എന്നാൽ, മൃതദേഹം തീരെ അഴുകിയിരുന്നില്ല. ഇതിൽ നിന്നും വെള്ളത്തിൽ വീണിട്ടു കുറച്ചു മണിക്കൂറുകൾ മത്രമേ ആയിട്ടുള്ളൂ എന്നത് വ്യക്തമാണ്.

വെള്ളം കുടിച്ചതിന്‍റെ ലക്ഷണങ്ങളും ഉണ്ടായിരുന്നില്ല. മൃതദേഹങ്ങളെ രണ്ടു മണിക്കൂറിനുള്ളിൽ തന്നെ മീനുകളും മറ്റു ജലജീവികളും ആക്രമിക്കുമെന്നാണു പ്രദേശത്തെ മത്സ്യത്തൊഴിലാളികൾ പറയുന്നത്. എന്നാൽ മിഷേലിൻ്റെ മൃതദേഹത്തിൽ യാതൊരുവിധ പരിക്കുകളും ഉണ്ടായിരുന്നില്ല.

ഗോശ്രീ പാലത്തിലേക്കു മിേഷൽ നടക്കുന്നതിനു തെളിവായി പോലീസ് ഹാജരാക്കിയ ദൃശ്യങ്ങളിലേത് മിഷേലല്ലെന്നും അച്ഛൻ ഷാജി ഉറപ്പിച്ച് പറയുന്നുണ്ട്. ∙പിന്നീട് ഇതേ പാലത്തിൽ നിന്നു വീണ്, മുങ്ങിമരിച്ച നിലയിൽ കണ്ടെത്തിയ രണ്ടു സ്ത്രീകളുടെയും മൃതദേഹങ്ങൾ വികൃതമായിരുന്നു. മിഷേലിന്‍റെ മൃതദേഹം കണ്ടെത്തിയ സ്ഥലത്തിന്‍റെ എതിർ ഭാഗത്തു നിന്നാണ് ഈ മൃതദേഹങ്ങൾ കിട്ടിയിരുന്നതെന്നും അദ്ദേഹം ചൂണ്ടിക്കാട്ടുന്നു. മൃതദേഹത്തിലുണ്ടായിരുന്ന ക്ഷതങ്ങളും പാടുകളും പോസ്റ്റ്മോർട്ടത്തിൽ പരിഗണിച്ചില്ലെന്നും ഷാജി ആരോപിക്കുന്നു.

കലൂർ പള്ളിയിൽ നിന്നിറങ്ങിയ മിഷേലിനെ ബൈക്കിൽ പിന്തുടർന്ന രണ്ടു പേരെപ്പറ്റി പോലീസ് അന്വേഷിക്കാൻ മുതിര്‍ന്നില്ല എന്നത് സംശയം ഉളവാക്കുന്നുണ്ട്. മിഷേൽ ധരിച്ചിരുന്ന വാച്ച്, മോതിരം, മൊബൈൽ ഫോൺ എന്നിവ എങ്ങനെ നഷ്ടപ്പെട്ടുവെന്നും വ്യക്തമല്ലെന്നും ഷാജി ചൂണ്ടിക്കാട്ടുന്നു. ഇക്കാരണങ്ങളൊക്കെ ചേര്‍ത്ത് വായിക്കുമ്പോൾ മിഷേലിൻ്റേത് ആത്മഹത്യ അല്ല എന്ന് നിസംശയം മനസിലാക്കുവാൻ സാധിക്കുമെന്നും അദ്ദേഹം വ്യക്തമാക്കി.

നിലവിൽ ഷാജിയും ആക്‌ഷൻ കമ്മിറ്റിയും സംഭവത്തിൽ സിബിഐ അന്വേഷണം വേണമെന്ന് ആവശ്യപ്പെട്ടു കൊണ്ട് ഹൈക്കോടതിയിൽ ഹർജി നൽകിയിട്ടുണ്ട്.