ചരക്കുലോറി സമരത്തിനിടെ സമരാനുകൂലികള് അക്രമാസക്തരായി.... കല്ലേറില് ലോറി ക്ലീനര് മരിച്ചു, ഡ്രൈവര്ക്ക് പരിക്ക്, സംഭവം വാളയാര് ചെക്പോസ്റ്റിനു സമീപം
ചരക്കുലോറി സമരത്തിനിടെ സമരാനുകൂലികള് അക്രമാസക്തരായി. സമരാനുകൂലികളുടെ കല്ലേറില് ലോറി ക്ലീനര് മരിച്ചു. മേട്ടുപ്പാളയം സ്വദേശി മുബാറക് ബാഷയയാണ് മരിച്ചത്.ഡ്രൈവര്ക്ക് പരിക്കേറ്റു. വാളയാര് ചെക് പോസ്റ്റിനു സമീപം കഞ്ചിക്കോട് ഇന്ന് പുലര്ച്ചെ മൂന്നു മണിയോടെയാണ് സംഭവമുണ്ടായത്. കോയമ്പത്തൂരില് നിന്ന് ചെങ്ങന്നൂരിലേക്ക് പച്ചക്കറിയുമായി വന്നതായിരുന്നു ലോറി. സമരം നാലാം ദിവസത്തിലേക്ക് കടക്കുന്നതിനിടെ പച്ചക്കറി ലോറികളും തടയുമെന്ന് പറഞ്ഞിരുന്നു. അതിന്റെ ഭാഗമായാണ് പതിനഞ്ചോളം വരുന്ന സംഘം ലോറിക്ക് നേരെ ആക്രമണം നടത്തിയത്. കല്ലേറില് ലോറിയുടെ ഗ്ലാസ് തടര്ന്ന് പരിക്കേറ്റാണ് മുബാറക് ബാഷ മരിച്ചത്. ഡ്രൈവറുടെ പരിക്ക് ഗുരുതരമാണ്.
അതിനിടെ ഇതരസംസ്ഥാനങ്ങളില്നിന്ന് ചരക്കുമായി എത്തുന്ന ലോറികളുടെ എണ്ണം ഗണ്യമായി കുറഞ്ഞതോടെ വിപണികളില് നിത്യോപയോഗ സാധനങ്ങള്ക്ക് ദൗര്ലഭ്യം നേരിട്ടുതുടങ്ങി. ഡീസല് വില വര്ധനയും തേഡ് പാര്ട്ടി ഇന്ഷുറന്സ് പ്രീമിയം വര്ധനയും പിന്വലിക്കണമെന്നാവശ്യപ്പെട്ട് ഓള് ഇന്ത്യ മോട്ടോര് ട്രാന്സ്പോര്ട്ട് കോണ്ഗ്രസാണ് രാജ്യവ്യാപക സമരത്തിന് ആഹ്വാനം ചെയ്തത്. ഇതിനു പിന്തുണ പ്രഖ്യാപിച്ച് കേരളത്തില് ലോറി ഓണേഴ്സ് വെല്ഫെയര് ഫെഡറേഷനും സമരത്തിലാണ്. ദിവസവും രണ്ടായിരത്തിലധികം ചരക്കുലോറികള് സംസ്ഥാനത്തേക്ക് വന്നിരുന്നത് സമരം തുടങ്ങിയതോടെ മുന്നൂറോളമായി കുറഞ്ഞു.
കഴിഞ്ഞ മൂന്നു ദിവസവും ശരാശരി മുന്നൂറോളം ലോറികളേ അതിര്ത്തി കടന്ന് എത്തിയുള്ളൂ. ഇവതന്നെ സമരം തുടങ്ങുന്നതിന് മുമ്പ് വിവിധ സംസ്ഥാനങ്ങളില്നിന്ന് പുറപ്പെട്ടവയാണെന്നും തിങ്കളാഴ്ച മുതല് ഇവ പോലും എത്തില്ലെന്നും ഫെഡറേഷന് സംസ്ഥാന പ്രസിഡന്റ് കെ.കെ. ഹംസ പറഞ്ഞു. രണ്ടര ലക്ഷത്തോളം വാഹനങ്ങള് സമരത്തില് പങ്കെടുക്കുന്നുണ്ടെന്നും അദ്ദേഹം പറഞ്ഞു.
https://www.facebook.com/Malayalivartha