സംസ്ഥാനത്ത് കോടികളുടെ കൊള്ളപ്പലിശ ഇടപാട് നടത്തിയ കേസില് ഒളിവിലായിരുന്ന തിരുനെല്വേലി സ്വദേശി മഹാരാജയെ തമിഴ്നാട്ടിലെത്തി പൊക്കി; അഭിനന്ദനത്തോടെ കേരളത്തിലേക്ക് തിരിക്കവേ പോലീസ് വാഹനം തടഞ്ഞ് സിനിമാ സ്റ്റൈലില് മോചിപ്പിച്ചു
തമിഴ്നാട്ടില് കേരള പോലീസിന് പരിമിതിയുണ്ട്. ആ ഒരവസ്ഥ തികച്ചും അറിഞ്ഞ സംഭവമാണ് കഴിഞ്ഞ ദിവസമുണ്ടായത്. സംസ്ഥാനത്ത് കോടികളുടെ കൊള്ളപ്പലിശ ഇടപാട് നടത്തിയ കേസില് ഒളിവിലായിരുന്ന തിരുനെല്വേലി സ്വദേശി മഹാരാജയെയാണ് തമിഴ്നാട്ടിലെത്തി പോലീസ് പിടികൂടിയത്. കേരളത്തിലേക്ക് അതിര്ത്തി കടക്കുന്നതിനു മുമ്പേ ഗുണ്ടാ സംഘാംഗങ്ങള് മാരാകായുധങ്ങളുമായെത്തി സിനിമാ സ്റ്റൈലില് പോലീസിന്റെ വാഹനം തടഞ്ഞ് നേതാവിനെ മോചിപ്പിച്ചു. ശനിയാഴ്ച രാത്രിയായിരുന്നു സംഭവം.
കൊച്ചി പള്ളുരുത്തി എം.എല്.എ. റോഡിലെ ലേക് വ്യൂ റിസോര്ട്ട് കേന്ദ്രമാക്കി വന് പലിശ സംഘം പ്രവര്ത്തിക്കുന്നതായി മാസങ്ങള്ക്കു മുമ്പ് പരാതി ലഭിച്ചിരുന്നു. സംസ്ഥാനത്തിന്റെ വിവിധഭാഗങ്ങളില് അമിതപലിശയ്ക്ക് കോടിക്കണക്കിനു രൂപയാണ് ഇവര് നല്കിയിരിക്കുന്നതെന്ന് അന്വേഷണത്തില് കണ്ടെത്തി. വിവരം മണത്തറിഞ്ഞ മഹാരാജ തമിഴ്നാട്ടിലേക്കു രക്ഷപ്പെട്ടു. രാജയുടെ ഏജന്റുമാരായ പാപനാശം സ്വദേശി പി. രാജ്കുമാര്, ചെന്നൈ സ്വദേശി അരശു, കുംഭകോണം സ്വദേശി ഇസക്കിമുത്തു എന്നിവരെ രേഖകള് സഹിതം പോലീസ് പിടികൂടി.
കോടികള് പലിശയ്ക്കു നല്കി കോടികള് കൊയ്യുന്നതായിരുന്നു മഹാരാജയുടെ രീതി. ടി.ഡി. അസോസിയേറ്റ്സ് എന്ന പേരിലാണു പണമിടപാട്. ഒരു കോടി രൂപയ്ക്ക് 20 ലക്ഷം പലിശ! വമ്പന്മാരായിരുന്നു ഇടപാടുകാര്. 300 കോടിയുടെ രൂപയുടെ ഇടപാടാണു മഹാരാജ കേരളത്തില് നടത്തിയതെന്നു പോലീസ് കണ്ടെത്തി. തുടര്ന്ന് പള്ളുരുത്തി പോലീസ് സ്റ്റേഷനില് കേസ് രജിസ്റ്റര് ചെയ്തു. പിന്നീട് പ്രത്യേക സംഘം അന്വേഷണച്ചുമതല ഏറ്റെടുത്തു
ടി.ഡി. അസോസിയേറ്റ്സിന്റെ ചെന്നൈ ഓഫീസിലും വാരാട്ട്പക്കത്ത് വീട്ടിലും പരിശോധന നടത്തിയെങ്കിലും മഹാരാജ പിടികൊടുത്തില്ല. കോയമ്പത്തൂരിലെ ഫഌറ്റിലെത്തി പോലീസ് ചില നിര്ണായക രേഖകള് പിടിച്ചെടുത്തു. അതുമായി വന്ന പോലീസ് വാഹനത്തെ ഒരു സംഘമാളുകള് പിന്തുടര്ന്നു. ആ വാഹനം അപകടത്തില്പ്പെട്ടതോടെയാണു പോലീസിനു സുരക്ഷിതമായി പാലക്കാട്ടേക്കു കടക്കാനായത്. ഈ അനുഭവമുള്ളതിനാല് പിന്നീടുള്ള നീക്കങ്ങള് അതീവ രഹസ്യമായിരുന്നു.
സൈബര് സെല്ലിന്റെ സഹായത്തോടെ മഹാരാജയുടെ ഒളിയിടം കണ്ടുപിടിച്ചാണ് എറണാകുളത്തെ വിവിധ സ്റ്റേഷനുകളിലെ ഉദ്യോഗസ്ഥര് അടങ്ങുന്ന സംഘം കഴിഞ്ഞ ദിവസം അവിടേക്കുപോയത്. രാജയുമായി ഉടനടി സേലം കോയമ്പത്തൂര് ദേശീയപാത വഴി മടക്കയാത്ര തുടങ്ങി. കാണിയൂരിലെ ടോള് പ്ലാസ എത്തിയപ്പോഴേക്കും നാലു വാഹനങ്ങളിലായി പതിനഞ്ചംഗസംഘം തടഞ്ഞിട്ടു. അവര് മഹാരാജയെ മോചിപ്പിച്ച് സ്ഥലംവിട്ടു.
ഉന്നതോദ്യോഗസ്ഥരുടെ നിര്ദേശപ്രകാരം കരുമാത്തംപട്ടി പോലീസ് സ്റ്റേഷനില് പരാതി നല്കിയിട്ടാണു പോലീസ് സംഘം തിരിച്ചെത്തിയത്. എന്നാല് ഇക്കാര്യം പരസ്യമാക്കിയില്ല. ടോള് പ്ലാസയിലും സമീപ കെട്ടിടങ്ങളിലുമുള്ള സി.സി. ടിവി ക്യാമറകളിലെ ദൃശ്യങ്ങള് ശേഖരിച്ച് കരുമാത്തംപട്ടി പോലീസ് അന്വേഷണം നടത്തുന്നുണ്ട്.
https://www.facebook.com/Malayalivartha