ചലച്ചിത്ര അവാര്ഡ് വിതരണ ചടങ്ങില് മോഹന്ലാലിനെ മുഖ്യാതിഥി ആക്കുന്നതില് ചലച്ചിത്ര അക്കാദമി കൗണ്സില് അടക്കം എതിര്പ്പ് പ്രകടിപ്പിച്ചിട്ടും സാംസ്കാരിക മന്ത്രി എ.കെ ബാലന് കുലുക്കമില്ല
സംസ്ഥാന ചലച്ചിത്ര അവാര്ഡ് വിതരണച്ചടങ്ങില് മോഹന്ലാലിനെ മുഖ്യാതിഥി ആക്കുന്നതില് ചലച്ചിത്ര അക്കാദമി കൗണ്സില് അടക്കം എതിര്പ്പ് പ്രകടിപ്പിച്ചിട്ടും സാംസ്കാരിക മന്ത്രി എ.കെ ബാലന് കുലുക്കമില്ല. മോഹന്ലാലിനെ പോലൊരു താരമുണ്ടെങ്കിലേ അവാര്ഡ് വിതരണം കളറാകൂ... ജനം ഒഴുകിയെത്തൂ... എന്നാണ് മന്ത്രിയുടെ നിലപാട്. ചലച്ചിത്ര അക്കാദമിയിലെ ഇടത്പക്ഷ അനുഭാവികളുടെ എതിര്പ്പൊന്നും മന്ത്രിക്ക് പ്രശ്നമല്ല. അമ്മയില് ദിലീപിനെ തിരിച്ചെടുത്തതിന് ശേഷം ഉണ്ടായ വിവാദങ്ങളെ തുടര്ന്ന് തിരുവനന്തപുരത്തെത്തിയ മോഹന്ലാല് മന്ത്രി എ.കെ ബാലനുമായി കൂടിക്കാഴ്ച നടത്തിയിരുന്നു. ആ സമയത്താണ് അവാര്ഡ് വിതരണത്തിന് മുഖ്യാതിഥിയായി എത്താമോ എന്ന് മന്ത്രി മോഹന്ലാലിനോട് ചോദിച്ചത്. ഉടന് തന്നെ താരം സമ്മതിക്കുകയും ചെയ്തു.
സമീപകാലത്തെ സംഭവങ്ങളുടെ പശ്ചാത്തലത്തില് മോഹന്ലാലിനെ പങ്കെടുപ്പിച്ചാലുണ്ടാകുന്ന വിവാദങ്ങളെ കുറിച്ച് മന്ത്രി ആലോചിച്ചിരുന്നില്ല. തീരുമാനം മറ്റാരോടും ആലോചിക്കാതെ പ്രഖ്യാപിച്ചതോടെയാണ് പുലിവാലാകുമെന്ന് മനസിലായത്. ജൂറി അംഗം ഡോ. ബിജു ചടങ്ങ് ബഹിഷ്ക്കരിക്കുമെന്ന് ഉടന് തന്നെ അറിയിച്ചു. തുടര്ന്നാണ് ചലച്ചിത്രമേഖലയില് ഉള്പ്പെടെ സമൂഹത്തിന്റെ വിവിധമേഖലകളില് നിന്ന് പ്രതിഷേധം ഉയര്ന്നത്. ചലച്ചിത്ര അക്കാദമി ചെയര്മാന് കമലിനും മോഹന്ലാലിനെ പങ്കെടുപ്പിക്കുന്നതില് താല്പര്യമില്ല. എന്നാല് സര്ക്കാര് തീരുമാനത്തിനെതിരെ അദ്ദേഹം പരസ്യപ്രതികരണത്തിന് തയ്യാറല്ല. പകരം സര്ക്കാരാണ് ഇക്കാര്യം തീരുമാനിച്ചതെന്ന് പറഞ്ഞു.
അക്കാദമി വൈസ് ചെയര്പേഴ്സണ് ബീനാപോള് അടക്കമുള്ളവര് പരസ്യമായി രംഗത്തെത്തി. ഇവര് മുഖ്യമന്ത്രിയെ കാണാനിരിക്കുകയാണ്. ഇവര് കൂടി ചടങ്ങ് ബഹിഷ്ക്കരിക്കുകയാണെന്ന് പ്രഖ്യാപിച്ചാല് സര്ക്കാര് വെട്ടിലാകും. വിവാദങ്ങള് ശക്തമാവുകയാണെങ്കില് മോഹന്ലാല് ചടങ്ങില് നിന്നും വിട്ട് നില്ക്കാനും സാധ്യതയുണ്ട്. കാരണം അടുത്തകാലത്തുണ്ടായ വിവാദങ്ങള് അദ്ദേഹത്തെ വ്യക്തിപരമായി വേദനിപ്പിച്ചിട്ടുണ്ട്. പ്രത്യേകിച്ച് വീടിന് മുന്നില് റീത്ത് വെച്ചത് ഉള്പ്പെടെ. വിമന് ഇന് കളക്ടീവും മറ്റ് സംഘടനകളും വ്യക്തികളും താരത്തിനെതിരെ രംഗത്ത് വന്നിരുന്നു. അതിനാല് കഴിവതും വിവാദങ്ങളില് നിന്ന് മാറി നില്ക്കാനാണ് മോഹന്ലാലിന് താല്പര്യം.
https://www.facebook.com/Malayalivartha