സിനിമയിലും ജീവിതത്തിലും അടൂരിനെക്കാള് മുന്നിലാണ് താനെന്ന് ഡോ ബിജു; 'അടൂരിന്റെത് ഫ്യൂഡല് മനസ്'
അടൂര് ഗോപാലകൃഷ്ണന് ഫ്യൂഡല് മനസാണെന്ന് സിനിമാ സംവിധായകന് ഡോ. ബിജു. മറ്റുള്ളവരെ അംഗീകരിക്കാനും അഭിനന്ദിക്കാനുമൊന്നും അദ്ദേഹത്തിനാകില്ല. ജീവിതത്തില് ആര്ക്കെങ്കിലും എന്തെങ്കിലുമാകണമെങ്കില് ഉന്നതകുലജാതനാകണമെന്നാണ് അടൂരിന്റെ വാദം. ഉന്നതകുലത്തില് ജനിക്കാത്തവരെ അംഗീകരിക്കുന്ന സ്വഭാവം അദ്ദേഹത്തിനില്ലെന്നും ഫേസ്ബുക്ക് പോസ്റ്റിലൂടെ ബിജു പ്രതികരിച്ചു.
അടൂരിന്റെ പുതിയ സിനിമ 'പിന്നെയും' മോശം സിനിമയാണെന്ന് ചൂണ്ടിക്കാട്ടി ബിജു കഴിഞ്ഞ ദിവസം രംഗത്തുവന്നിരുന്നു. അടൂരിന്റെ സിനിമാക്കാലം കഴിഞ്ഞെന്നും ബിജു പറഞ്ഞിരുന്നു. ജന്മഭൂമി പത്രത്തില് വന്ന പ്രതികരണത്തില് അടൂര് ബിജുവിനെയും രൂക്ഷമായ ഭാഷയില് വിമര്ശിച്ചിരുന്നു. ജീവിതത്തില് ഒന്നുമാകാന് കഴിയാത്തതിന്റെ അസൂയയാണ് ബിജുവിനെന്നും സിനിമയെന്തെന്ന് അറിയാത്ത വിവരദോഷിയാണ് അദ്ദേഹമെന്നും അടൂര് പറഞ്ഞിരുന്നു.
ഇതിനുള്ള മറുപടിയുമായാണ് ഡോ. ബിജു രംഗത്തു വന്നത്. അടൂരിന്റെ പ്രസ്താവനയില് അദ്ദേഹത്തിന്റെ മനസ്സിലിരിപ്പാണ് വ്യക്തമാകുന്നതെന്ന് ബിജു പറഞ്ഞു. 'ഞാന് ജീവിതത്തില് ഒന്നുമായില്ലെന്ന് അദ്ദേഹത്തിനെങ്ങനെ പറയാന് കഴിയും? ആരോഗ്യ മേഖലയില് ഒരു ജില്ലയുടെ അധിപനായി സേവനമനുഷ്ഠിക്കുകയാണ് ഞാന്. സിനിമയിലാണെങ്കില് സുരാജ് വെഞ്ഞാറമൂടിനു ലഭിച്ചതടക്കം നാല് ദേശീയ പുരസ്കാരങ്ങള് എനിക്ക് കിട്ടിയിട്ടുണ്ട്.
പന്ത്രണ്ടോളം അന്തര്ദ്ദേശീയ പുരസ്കാരങ്ങളും ലഭിച്ചു. ഇരുപതു വര്ഷങ്ങളായി ഒരു നല്ല പുരസ്കാരവും അടൂരിനു ലഭിച്ചിട്ടില്ല. ഔദ്യോഗിക ജീവിതത്തിലും സിനിമാജീവിതത്തിലും അടൂരിനെക്കാള് മുന്നിലാണിപ്പോള് ഞാന്.'
അടൂര്, മങ്കട രവിവര്മ്മയെ മാത്രം ക്യാമറാമാനാക്കിയയാളാണ്. എം.ജെ. രാധാകൃഷ്ണന് എന്റെ സിനിമകള്ക്ക് ക്യാമറ ചെയ്ത് പുരസ്കാരങ്ങള് അദ്ദേഹത്തിന് ലഭിച്ചു. അപ്പോഴാണ് രാധാകൃഷ്ണനെ അടൂര് കൂടെക്കൂട്ടിയത്. രാധാകൃഷ്ണന് രണ്ട് രാജ്യാന്തര പുരസ്കാരങ്ങള് കിട്ടിയത് എന്നോടൊപ്പം സിനിമ ചെയ്തപ്പോഴാണ്. ക്യാമാറാമാന്റെ സഹായം കൊണ്ട് ആളാകുന്നു എന്ന പരാമര്ശം അടൂരിന് മാത്രം യോജിക്കുന്നതാണ്.
സ്വന്തമായി പുരസ്കാരം കിട്ടിയാല് അത് വലിയ കാര്യം. മറ്റുള്ളവര്ക്ക് കിട്ടിയാല് അവജ്ഞ എന്നതാണ് അടൂരിന്റെ രീതി. മറ്റുള്ളവരുടെ സിനിമകളൊന്നും കാണുന്നയാളല്ല അടൂര്. തന്നെക്കാള് നല്ല സിനിമാ സംവിധായകരും പുരസ്കാരങ്ങള് നേടുന്നവരുമുണ്ടാകുന്നത് അദ്ദേഹത്തിന് സഹിക്കാനാകില്ല. എല്ലാം തനിക്കു തന്നെ കിട്ടണമെന്ന ദുഷ്ടബുദ്ധിയാണ് അദ്ദേഹത്തിനെന്നും ബിജു പറയുന്നു.
https://www.facebook.com/Malayalivartha