ചുരിദാര്‍ പ്രശ്‌നം അഥവാ ഐഎഎസ് തമ്മിലടി: ശ്രീ. പത്മനാഭന്‍ പണികൊടുക്കാതിരുന്നാല്‍ മതിയായിരുന്നു
ശ്രീ പത്മനാഭന്റെ കണ്‍മുമ്പില്‍ ഐ.എ.എസുകാര്‍ തമ്മിലടി. തിരുവനന്തപുരം മുന്‍ ജില്ലാ കളക്ടര്‍ ബിജുപ്രഭാകറും ക്ഷേത്രം എക്‌സിക്യുട്ടീവ് ഓഫീസര്‍ കെ.ആര്‍. സതീഷുമാണ് തമ്മിലടിക്കുന്നത്. ജില്ലാ ജഡ്ജി ചെയര്‍മാനായ ക്ഷേത്രം ഭരണസമിതിക്കെതിരെ നിലപാടെടുക്കുന്നതിന് കെ.ആര്‍.സതീഷിന് സുപ്രീംകോടതി നിയോഗിച്ച ഉന്നതാധികാര സമിതിയുടെ പിന്തുണയുണ്ട്. ചുരിദാര്‍ നിരോധിച്ച എക്‌സിക്യുട്ടീവ് ഓഫീസറുടെ നടപടിക്കെതിരെ ബിജുപ്രഭാകര്‍ പരസ്യമായി രംഗത്തെത്തിയിരുന്നു. ജില്ലാജഡ്ജി ഹരിപാലാണ് ക്ഷേത്രം ഭരണസമിതിയുടെ ചെയര്‍മാന്‍. ഇതിനിടെ ചുരിദാര്‍ ധരിച്ചെത്തിയ സ്ത്രീകളെ തടഞ്ഞ ഗാര്‍ഡിന് സസ്‌പെന്‍ഷന്‍ ലഭിക്കുകയും ചെയ്തു.
ശ്രീ. പത്മനാഭസ്വാമി ക്ഷേത്രത്തിലെ ഗാര്‍ഡുകള്‍ ആരു പറയുന്നത് അനുസരിക്കുമെന്ന ആശയക്കുഴപ്പത്തിലാണ്. ജില്ലാ ജഡ്ജി പറയുന്നത് അനുസരിക്കണോ എക്‌സിക്യുട്ടീവ് ഓഫീസര്‍ പറയുന്നത് അനുസരിക്കണോ എന്നാണ് പോലീസുകാര്‍ ചോദിക്കുന്നത്. ചെയര്‍മാന്‍ ചുരിദാര്‍ നിരോധിക്കുമ്പോള്‍ എക്‌സിക്യുട്ടീവ് ഓഫീസര്‍ നടപ്പിലാക്കും. നൂറ്റാണ്ടുകള്‍ക്ക് മുമ്പാണ് ശ്രീപത്മനാഭസ്വാമി ക്ഷേത്രം സ്ഥാപിച്ചത്. അന്നൊന്നും ഇല്ലാത്ത ലഹളയാണ് ഇപ്പോള്‍ നടക്കുന്നത്.
തിരുവിതാംകൂര്‍ രാജകുടുംബാംഗം, സീനിയര്‍ തന്ത്രി, എട്ടരയോഗത്തിലെ സ്ഥാനി എന്നിവര്‍ അടങ്ങിയ ഭരണസമിതിയാണ് ചുരിദാര്‍ നിരോധിച്ചത്. എക്‌സിക്യുട്ടീവ് ഓഫീസറുടെ നടപടി പുനഃപരിശോധിച്ച തീരുമാനമാണ് ഭരണസമിതി റദ്ദാക്കിയത്.
ബിജുപ്രഭാകറും കെ.ആര്‍ സതീഷും തമ്മിലുള്ള വഴക്കിന് വര്‍ഷങ്ങളുടെ പഴക്കമുണ്ട്. ഐ.എ.എസ്. പിണക്കമാണ് അത്. ഐ.എ.എസ്. ഉദ്യോഗസ്ഥര്‍ തമ്മില്‍ ലഹള സാധാരണമാണെങ്കിലും ഇത്തരമൊരു സംഭവം ഇതാദ്യമാണ്.
കെ.പി. മോഹന്‍കുമാര്‍, എം. നന്ദകുമാര്‍ തുടങ്ങിയ ഐ.എ.എസുകാരുടെ ബാച്ചിനു മുമ്പാണ് ബിജുപ്രഭാകര്‍ ഐ.എ.എസിലെത്തിയത്. തച്ചടി പ്രഭാകരന്റെ മകനാണ് ബിജുപ്രഭാകര്‍. തങ്ങളെക്കാള്‍ സീനിയറായി ബിജുപ്രഭാകര്‍ മാറിയതില്‍ മറ്റ് ഐ.എ.എസുകാര്‍ക്ക് കെറുവുണ്ടായിരുന്നു.
ഇതാണ് ഇവര്‍ തമ്മിലുള്ള തര്‍ക്കത്തിന്റെ അടിസ്ഥാനം. ബിജുപ്രഭാകറിന് രാഷ്ട്രീയ സ്വാധീനമുള്ളതിനാല്‍ അദ്ദേഹം തന്ത്രപ്രധാന കസേരകളെല്ലാം അലങ്കരിച്ചു. തിരുവനന്തപുരം കളക്ടര്‍ വരെയായി. എന്നാല്‍ മറ്റ് ഐ.എ.എസുകാര്‍ സ്വാധീനമുള്ള കസേരകളിലൊന്നും എത്തിയില്ല. ഇതാണ് കലഹത്തിനുള്ള മറ്റൊരു കാരണം.
പണ്ട് മഹാറാണി പറഞ്ഞിട്ടുണ്ട്, ശ്രീപത്മനാഭന്‍ ഉറക്കത്തിലല്ല യോഗനിദ്രയിലാണെന്ന്. അതാണ് വാസ്തവം. കണ്‍മുമ്പില്‍ നടക്കുന്ന കാര്യങ്ങള്‍ കണ്ട് പത്മനാഭന്‍ പണികൊടുക്കാതിരുന്നാല്‍ മതിയായിരുന്നു.
https://www.facebook.com/Malayalivartha
