കെഎസ്ആര്ടിസിയില് ഇനി ജീവനക്കാര് കൂട്ട അവധിയെടുത്താല് ഡയസ്നോണ് നടപ്പാക്കും
കെഎസ്ആര്ടിസിയില് ജീവനക്കാര് കൂട്ട അവധിയെടുത്താല് ഇനി ഡയസ്നോണ്. സര്വീസുകള് മുടക്കി ജീവനക്കാര് യൂണിയന് പ്രവര്ത്തനത്തിനു പോകുന്നത് തടയാനാണിത്. സര്ക്കാരിന്റ ആനുകൂല്യം പറ്റി സര്ക്കാരിനെതിരെ സമരം ചെയ്യാന് അനുവദിക്കില്ലെന്നും കെഎസ്ആര്ടിസി മാനേജ്മെന്റ് വ്യക്തമാക്കി. കൂട്ട അവധിയെടുത്തുള്ള യൂണിയന് പ്രവര്ത്തനം കെഎസ്ആര്ടിസിക്ക് വന് സാമ്പത്തിക നഷ്ടം വരുത്തിവയ്ക്കുന്ന സാഹചര്യത്തിലാണ് ഈ തീരുമാനം.
കോണ്ഗ്രസ് അനുകൂല സംഘടനയായ ടിഡിഎഫിന്റ സെക്രട്ടേറിയറ്റ് മാര്ച്ചും, ഐഎടിയുസിയുടെ സമര പ്രചാരണജാഥയും നടന്ന വ്യാഴാഴ്ച 5615 ബസുകളില് ഓപ്പറേറ്റ് ചെയ്തത് 5170 എണ്ണം മാത്രമാണ്. ശേഷിച്ച 445 ബസുകളും റദ്ദാക്കിയത് ജീവനക്കാരില്ലാത്തതിനാലായിരുന്നു. ഈ വകയില് മാത്രം കെഎസ്ആര്ടിസി നേരിട്ടത് 40 ലക്ഷത്തോളം രൂപയുടെ നഷ്ടമാണ്. ബിഎംഎസിന്റെ സെക്രട്ടേറിയറ്റ് മാര്ച്ച് നടന്ന ബുധനാഴ്ചയും 319 ബസുകള് വെറുതെ കിടന്നു. കൊല്ലത്തു മാത്രം 66 ബസുകളാണ് സര്വീസ് നടത്താതിരുന്നത്. 1700 പേരാണ് അന്നേദിവസം ജോലിയില് നിന്ന് വിട്ടുനിന്നത്.
സമരദിവസം കാഷ്വല് ലീവോ, ലീവോ എഴുതി നല്കുകയാണ് പതിവ്. യൂണിയന് നേതൃത്വം തന്നെയാണ് എല്ലാവരുടേയും അവധി അപേക്ഷയും നല്കുക. കൂട്ടത്തോടെയുള്ള അവധിയായതിനാല് സര്വീസുകള് റദ്ദാക്കുകയല്ലാതെ മാനേജ്മെന്റിനും വഴിയില്ല. ഇനിമുതല് അത് അംഗീകരിക്കില്ല. കൂട്ട അവധിയെടുത്താന് ഡയസ്നോണാക്കും. അന്നേദിവസത്തെ ശമ്പളമോ മറ്റ് അനുകൂല്യങ്ങളോ കിട്ടില്ല.
യൂണിയന് പ്രവര്ത്തനത്തിന് എതിരല്ലെങ്കിലും കെഎസ്ആര്ടിസിയ്ക്ക് ലക്ഷക്കണക്കിന് രൂപയുടെ നഷ്ടമുണ്ടാക്കി സമരം ചെയ്യുന്നവരെ അനൂകൂല്യങ്ങള് നല്കി സംരക്ഷിക്കേണ്ടെന്നാണ് മാനേജ്മെന്റിന്റെ നിലപാട്. ധര്ണയോ സമരങ്ങളോ ഇല്ലാതിരുന്നിട്ടും ചൊവ്വാഴ്ചയും 278 ബസുകള് ഓടിയ്ക്കാനായില്ല. നാല്പതിനായിരത്തോളം ജീവനക്കാരുള്ളിടത്ത് എന്തുകൊണ്ട് ഇത് ആവര്ത്തിക്കുന്നുവെന്ന് പരിശോധിക്കാന് അധികൃതര് നിര്ദേശിച്ചിട്ടുണ്ട്. അതേസമയം, ഡയസ്നോണ് തീരുമാനം യൂണിയനുകള് അംഗീകരിക്കുമോയെന്നതും സംശയമാണ്.
https://www.facebook.com/Malayalivartha