വേനല്‍ കടുത്തതോടെ കടുത്ത വൈദ്യുതി ക്ഷാമത്തില്‍ സംസ്ഥാനം. ഇതോടെ സംസ്ഥാനത്തെ ഏറ്റവും വലിയ വൈദ്യുത പദ്ധതിയായ ഇടുക്കിയിലും വൈദ്യുതി ഉത്പാദനം കുറച്ചേക്കുമെന്ന് റിപ്പോര്‍ട്ടുകള്‍. 20 വര്‍ഷത്തെ ഏറ്റവും താഴ്ന്ന നിലയിലാണെന്നാണ് സൂചനകള്‍. ജലനിരപ്പ് 31 അടികൂടി താഴ്ന്നാല്‍ പവര്‍ഹൗസിലെ വൈദ്യുതി ഉല്‍പ്പാദനം നിര്‍ത്തി വയക്കേണ്ടി വന്നേക്കും.

ഈ വര്‍ഷം കടുത്ത വേനല്‍ അനുഭവപ്പെട്ടേക്കാം നേരത്തെ തന്നെ കാലാവസ്ഥ വിദഗ്ദ്ധര്‍ റിപ്പോര്‍ട്ട് നല്‍കിയിരുന്നു. തുടര്‍ന്നും മുന്‍കരുതലുകള്‍ എടുക്കാത്തതാണ് സംസ്ഥാനത്തേക്ക് വൈദ്യുതിക്ഷാമത്തിലേക്ക് നയിക്കുന്നതെന്നും വിമര്‍ശനങ്ങള്‍ ഉയര്‍ന്നിരുന്നു.

അതേസമയം ഈ വര്‍ഷം പവര്‍കെട്ടും ലോഡ് ഷെഡിങ്ങും ഉണ്ടാകില്ലെന്ന് വൈദ്യുതി മന്ത്രി എം.എം മണി നിയമസഭയില്‍ അറിയിച്ചു. 3,288 ദശലക്ഷം യൂണിറ്റിന്റെ കുറവാണുണ്ടായതെന്നും എന്നാല്‍ മുന്‍കൂട്ടി ആസൂത്രണമാണ് ഇതിനെ കുറച്ചതെന്ന് അദ്ദേഹം ആവശ്യപ്പെട്ടു.

1976-ലും 1996-ലുമാണ് ഇത്തരത്തില്‍ കടുത്ത വെല്ലുവിളികള്‍ നേരിട്ടിരുന്നത്. 2,280 അടിയില്‍ താഴെ ജലനിരപ്പായാല്‍ മൂലമറ്റത്തേക്കുള്ള വൈദ്യുതോത്പാദനം നിര്‍ത്തി വയ്‌ക്കേണ്ടി വരും. പവര്‍ഹൗസിലേക്ക് വെള്ളം കൊണ്ടുപോകുന്ന ടണലിന്റ താഴെയാകും ജലനിരപ്പ് അതിനാല്‍ തന്നെ പിന്നീടുള്ള പ്രവര്‍ത്തനം നിലച്ചേക്കുമെന്നാണ് കരുതുന്നത്.

വൈദ്യുതിക്കായി തമിഴ്‌നാട് അടക്കമുള്ള സംസ്ഥാനങ്ങളെ ആശ്രയിക്കേണ്ടി വരും.