വിദ്യാഭ്യാസ വായ്പാ തിരിച്ചടവ് സഹായ പദ്ധതി നടപ്പാക്കുമെന്ന് മുഖ്യമന്ത്രി
സംസ്ഥാനത്ത് വിദ്യാഭ്യാസ വായ്പയെടുത്ത് കടക്കെണിയിലായവരെ സഹായിക്കാനായി വിദ്യാഭ്യാസ വായ്പാ തിരിച്ചടവ് സഹായ പദ്ധതി നടപ്പാക്കാന് സര്ക്കാര് തീരുമാനം എടുത്തുവെന്ന് മുഖ്യമന്ത്രി നിയമസഭയില് പറഞ്ഞു. ചട്ടം 300 പ്രകാരം പ്രസ്താവന നടത്തുകയായിരുന്നു മുഖ്യമന്ത്രി. ഇതൊരു കടാശ്വാസ പദ്ധതിയല്ല. വായ്പാ തിരിച്ചടവ് അവധിക്കുശേഷം ഉള്ള നാലുവര്ഷ കാലയളവില് സര്ക്കാര് സഹായത്തോടുകൂടിയുള്ള തിരിച്ചടവ് സഹായപദ്ധതിയാണ്.
പദ്ധതിയുടെ പ്രസക്തഭാഗങ്ങള്
നിഷ്ക്രിയ ആസ്തി ആകാത്ത 9 ലക്ഷം രൂപ വരെ വായ്പകള് അനുവദിച്ചിട്ടുള്ള വിദ്യാഭ്യാസ വായ്പാ അക്കൗണ്ടുകള്ക്ക് (2016 ഏപ്രില് ഒന്നിന് മുമ്പ് വായ്പാ തിരിച്ചടവ് തുടങ്ങിയവര്ക്ക്) ഈ തിരിച്ചടവ് സഹായം ലഭിക്കും. ഒന്നാം വര്ഷം വായ്പയുടെ 90ശതമാനവും രണ്ടാം വര്ഷം 75ശതമാനവും മൂന്നാം വര്ഷം 50ശതമാനവും നാലാം വര്ഷം 25ശതമാനവും സര്ക്കാര് വിഹിതമായി നല്കി തിരിച്ചടയ്ക്കാന് സഹായിക്കും.
2016 മാര്ച്ച് 31നോ അതിനു മുമ്പോ നിഷ്ക്രിയ ആസ്തിയായി മാറിയിട്ടുള്ളതും നാലുലക്ഷം രൂപ വരെ വായ്പ എടുത്തിട്ടുള്ളവര്ക്ക് വായ്പാ തുകയുടെ 40ശതമാനം മുന്കൂറായി അടയ്ക്കുകയും വായ്പയിലുള്ള പലിശ ബാങ്ക് ഇളവുചെയ്ത് കൊടുക്കുകയും ചെയ്താല് 60ശതമാനം സര്ക്കാര് നല്കി ലോണ് ക്ലോസ് ചെയ്യാന് സര്ക്കാര് സഹായിക്കും. തിരിച്ചടവ് അവധിക്കുശേഷമുള്ള നാലുവര്ഷത്തേക്ക് അര്ഹരായ വിദ്യാര്ത്ഥികള്ക്ക് ഈ പദ്ധതി പ്രകാരം സാമ്പത്തിക സഹായം നല്കും. ഈ പദ്ധതി 2016 എപ്രില് ഒന്നു മുതല് മുന്കാല പ്രാബല്യത്തില് നിലവില് വരും.
2016 ഏപ്രില് ഒന്നിന് ആറുലക്ഷം രൂപ വരെ കുടുംബ വാര്ഷിക വരുമാനമുള്ള വിദ്യാര്ത്ഥികള്ക്ക് ഇതിന്റെ പ്രയോജനം ലഭിക്കും. അംഗവൈകല്യമുള്ള വിദ്യാര്ത്ഥികള്ക്ക് വാര്ഷിക വരുമാന പരിധി ഒമ്പതുലക്ഷം രൂപയായിരിക്കും. ഒമ്പതുലക്ഷം രൂപ വരെ അനുവദിച്ചിട്ടുള്ള വായ്പകള്ക്ക് ഈ പദ്ധതി പ്രകാരമുള്ള സാമ്പത്തിക സഹായം ലഭിക്കും. വിദ്യാഭ്യാസ വായ്പാ തിരിച്ചടവ് സഹായപദ്ധതിക്കായി ഏകദേശം 900 കോടി രൂപ സാമ്പത്തിക ബാധ്യത വരുമെന്ന് എസ്.എല്.ബി.സി (സ്റ്റേറ്റ് ലെവല് ബാങ്കേഴ്സ് കമ്മിറ്റി) അറിയിച്ചിട്ടുണ്ട്. ഇതിനായി 500 മുതല് 600 കോടി രൂപ വരെ ചെലവ് വരുമെന്ന് പ്രതീക്ഷിക്കുന്നു.
https://www.facebook.com/Malayalivartha