ടി.പി. സെന്‍കുമാറിനെ സംസ്ഥാന പൊലീസ് മേധാവിയായി പുനര്‍നിയമിക്കണമെന്ന സുപ്രീം കോടതിയുടെ ഉത്തരവ് നടപ്പാക്കുന്നത് വൈകും. സെന്‍കുമാറിന് അനുകൂലമായ വന്ന സുപ്രീം കോടതി വിധിയില്‍ സംസ്ഥാന സര്‍ക്കാര്‍ പ്രമുഖ അഭിഭാഷകന്‍ ഹരീഷ് സാല്‍വെയുടെ നിയമോപദേശം തേടി.സര്‍ക്കാരിന് വേണ്ടി സുപ്രീംകോടതിയില്‍ കേസ് വാദിച്ചത് ഹരീഷ് സാല്‍വെ ആയിരുന്നു.

സംസ്ഥാന പൊലീസ് മേധാവിയുടെ നിയമനം സുപ്രീം കോടതി റദ്ദാക്കിയിട്ട് അഞ്ച് ദിവസം പിന്നിട്ടിട്ടും സെന്‍കുമാറിനെ ഇതുവരെ സര്‍ക്കാര്‍ പുനര്‍നിയമിച്ചിട്ടില്ല. ഇത്കൂടാതെ, ഡി.ജി.പി ശങ്കര്‍റെഡ്ഡി, വിജിലന്‍സ് ഡയറക്ടറായിരുന്ന ജേക്കബ് തോമസ്, സംസ്ഥാന പൊലീസ് മേധാവി ലോക്‌നാഥ് ബെഹ്‌റ എന്നിവരുടെ നിയമനത്തെയും വിധി ബാധിക്കുമോ എന്ന കാര്യത്തിലും സംസ്ഥാന സര്‍ക്കാര്‍ നിയമോപദേശം തേടിയിട്ടുണ്ട്.

ഡി.ജി.പിയായി ലോകനാഥ് ബെഹ്‌റയെ നിയമിച്ചുകൊണ്ടുള്ള സര്‍ക്കാര്‍ ഉത്തരവാണു സെന്‍കുമാര്‍ കേസിന്റെ വിധിയിലൂടെ കോടതി റദ്ദാക്കിയത്. ഇതു പരിഗണിക്കാതെയാണ് ബെഹ്‌റ ഇപ്പോഴും പൊലീസ് ആസ്ഥാനത്ത് തുടരുന്നത്. ലോകനാഥ് ബെഹ്‌റ ഇനിയും ഓഫീസില്‍ തുടരുന്നത് സര്‍ക്കാരിനു മാത്രമല്ല, അദ്ദേഹത്തിന് വ്യക്തിപരമായും കോടതിയലക്ഷ്യത്തിനു വഴിതെളിക്കും.