ബണ്ടിചോറിന് 10 വര്ഷം കഠിനതടവും പിഴയും, പിഴ അടച്ചില്ലെങ്കില് ആറുമാസം അധികതടവ്
ഹൈടെക് സുരക്ഷാ സംവിധാനങ്ങള് തകര്ത്ത് ആഡംബരക്കാറും സ്വര്ണവും കവര്ന്ന കേസില് അന്താരാഷ്ട്ര മോഷ്ടാവ് 'ബണ്ടി ചോര്' എന്ന ദേവീന്ദര് സിങ്ങിന് 10 വര്ഷം കഠിനതടവും പിഴയും. 20,000 രൂപയാണ് പിഴ. പിഴ അടച്ചില്ലെങ്കില് ആറുമാസം അധികതടവ് അനുഭവിക്കണം.
രണ്ടാം അഡീഷണല് ജില്ലാ സെഷന്സ് കോടതിയുടേതാണ് ഉത്തരവ്. പട്ടം മരപ്പാലത്തുള്ള വിദേശമലയാളി വേണുഗോപാലന് നായരുടെ വീടാണ് ബണ്ടിചോര് കൊള്ളയടിച്ചത്.
വീടിനുചുറ്റും ഉണ്ടായിരുന്ന സുരക്ഷാ ക്യാമറകളില് ചിലത് തകര്ത്തതിനുശേഷമായിരുന്നു മോഷണം. വേണുഗോപാലന് നായരുടെ ആഡംബരക്കാറിനു പുറമെ മകളുടെ ആഭരണങ്ങളും ലാപ്ടോപ്പ് അടക്കമുള്ള ഇലക്ട്രോണിക് ഉപകരണങ്ങളും പ്രതി മോഷ്ടിച്ചിരുന്നു. മോഷണത്തിനുശേഷം, തകര്ക്കാന് പറ്റാത്ത ക്യാമറകളെ നോക്കി വിജയചിഹ്നം കാണിച്ചാണ് ബണ്ടിചോര് മടങ്ങിയത്.
2013 ജനുവരി 20ന് രാവിലെയാണ് സംഭവം. നന്തന്കോട് സ്വദേശിയും ടൈറ്റാനിയത്തിലെ വിരമിച്ച എക്സിക്യൂട്ടീവ് എന്ജിനീയറുമായ വിമല്കുമാറിന്റെ കാര് മോഷ്ടിച്ചാണ് ബണ്ടിചോര്, വേണുഗോപാലന് നായരുടെ വീട്ടില് മോഷണത്തിനെത്തിയത്. ഈ കാര് വേണുഗോപാലന് നായരുടെ വീടിനു സമീപത്തുനിന്നു പിന്നീട് പോലീസ് കണ്ടെടുത്തു.
വേണുഗോപാലന് നായരുടെ ആഡംബരക്കാറായ മിസ്തുബിഷി ഔട്ട്ലാന്ഡര് കാറുമായി ബണ്ടിചോര് തമിഴ്നാട്ടിലേക്കും അവിടെനിന്ന് െബംഗളൂരുവഴി മഹാരാഷ്ട്രയിലേക്കും പോയി. പോലീസ് പിന്നാലെ ഉണ്ടെന്ന് ബോധ്യമായ ബണ്ടിചോര് ചെന്നൈയ്ക്ക് അടുത്തുള്ള കൃഷ്ണഗിരിയില് കാര് ഉപേക്ഷിച്ചു.
മഹാരാഷ്ട്രയിലെ താന ജില്ലയിലെ വനിതാ സര്ക്കിള് ഇന്സ്പെക്ടറാണ് ഇയാളെ തിരിച്ചറിഞ്ഞ് തടഞ്ഞുവച്ചത്. ഡിവൈ.എസ്.പി. പ്രതാപന് നായരുടെ നേതൃത്വത്തിലുള്ള സംഘം അവിടെയെത്തി ബണ്ടിചോറിനെ അറസ്റ്റ് ചെയ്ത് കേരളത്തിലെത്തിച്ചു. 90 ദിവസത്തിനകം കുറ്റപത്രം സമര്പ്പിച്ചതിനാല് ജയിലില്കിടന്നാണ് വിചാരണ നേരിട്ടത്. കോടതി 10 വര്ഷം ശിക്ഷിച്ച ബണ്ടിചോര്, ജയില്ശിക്ഷ അനുഭവിച്ച കഴിഞ്ഞ നാലുവര്ഷം കഴിച്ച് ഇനി ആറുവര്ഷം ശിക്ഷ അനുഭവിച്ചാല്മതി.
https://www.facebook.com/Malayalivartha