പൈലറ്റ് അച്ചുദേവിന്റെ തിരിച്ചുവരവിനായി ഒരു ദേശത്തിന്റെ പ്രാര്ഥന
സ്വപ്ന സഞ്ചാരി എന്നും മ്ിടുമിടുക്കന്. അസമില്നിന്ന് കാണാതായ വ്യോമസേനാ വിമാനത്തിന്റെ പൈലറ്റ് അച്ചുദേവിന്റെ തിരിച്ചുവരവിനു വേണ്ടി പ്രാര്ഥനകളോടെ കാത്തിരിക്കുകയാണു ബന്ധുക്കളും അയല്ക്കാരും. അതിവിദഗ്ധമായി സുഖോയ് വിമാനം പറത്തുന്ന അച്ചുവിന് അപകടമൊന്നും പറ്റിയിട്ടുണ്ടാകില്ലെന്ന ഉറച്ച വിശ്വാസത്തിലാണു പോങ്ങുംമൂട് ഗൗരിനഗര് നിവാസികള്. വ്യോമസേനാ വിമാനത്തില് അസമിലേക്കു പോയ അച്ചുവിന്റെ മാതാപിതാക്കളായ സഹദേവന്റേയും ജയശ്രീയുടേയും ഫോണ് വിളികള്ക്കു കാതോര്ത്തിരിക്കുകയാണ് അവര്. അച്ചു സുരക്ഷിതനാണെന്നാണ് എന്ന് എയര്ഫോഴ്സ് അധികൃതര് നല്കിയ വിവരം അവര് ഇന്നലെ ബന്ധുക്കളെ അറിയിച്ചു.
അവധിക്ക് തിരിച്ചെത്തുന്ന അച്ചുവിനെ കാത്തിരിക്കുകയായിരുന്നു അയല്ക്കാരെല്ലാം. കുടുംബത്തോടൊപ്പം തന്നെ അയല്വീട്ടുകാരുമായും അച്ചു അടുപ്പം പുലര്ത്തിയിരുന്നു. കോഴിക്കോട് സ്വദേശികളായ സഹദേവനും ജയശ്രീയും ഐഎസ്ആര്ഒയിലെ ജോലിയുമായി ബന്ധപ്പെട്ടാണു തിരുവനന്തപുരത്തെത്തിയത്. ലയോള സ്കൂളിലായിരുന്നു അച്ചുവിന്റെ പഠനം.
പ്രവേശനപരീക്ഷയെഴുതി വിജയിച്ച് എട്ടാം ക്ലാസ് മുതല് ഡെറാഡൂണിലെ സൈനിക സ്കൂളായ ആര്ഐഎംസിയില് പഠിക്കാന് അവസരം ലഭിച്ച അച്ചു അവിടെയാണു പത്താംക്ലാസും പ്ലസ്ടുവും പാസായത്. പിന്നീട് നാഷനല് ഡിഫന്സ് അക്കാദമിയില് ചേര്ന്നു കമ്മിഷന്ഡ് ഓഫിസറായി. പിന്നീടു തേസ്പൂര് എയര്ഫോഴ്സ് സ്റ്റേഷനില് സ്ക്വാഡ്രണ് ലീഡര് ആയി. അവധിക്ക് വരുമ്പോള് യുദ്ധവിമാനങ്ങള് പറത്തിയ സാഹസികകഥകള് അച്ചു അഭിമാനത്തോടെ പങ്കുവയ്ക്കുമായിരുന്നു. കഴിഞ്ഞ 21നായിരുന്നു അച്ചുവിന്റെ പിറന്നാള്.
എയര്ഫോഴ്സ് ക്യാംപിലെ പിറന്നാള് ആഘോഷത്തിന്റെ ചിത്രങ്ങള് വീട്ടുകാര്ക്കും സുഹൃത്തുക്കള്ക്കുമൊക്കെ അയച്ചുകൊടുക്കുകയും ചെയ്തു. ഫെയ്സ്ബുക്കില് അക്കൗണ്ട് ഉണ്ടായിരുന്നെങ്കിലും വലപ്പോഴുമൊരിക്കല് മാത്രമാണ് അച്ചു പോസ്റ്റ് ഇടാറുള്ളത്. പക്ഷേ കഴിഞ്ഞ ചൊവ്വാഴ്ച സുഖോയ് വിമാനം കാണാതാവുന്നതിനു മണിക്കൂറുകള്ക്കു മുന്പു പുലര്ച്ചെ ഒന്നരയോടെ സച്ചു ഈ വര്ഷത്തെ ആദ്യത്തെ പോസ്റ്റ് ഇട്ടു–സഹോദരി അനുശ്രീയുടെ കുഞ്ഞിനൊപ്പം നില്ക്കുന്ന ചിത്രമായിരുന്നു അത്.
തന്റെ വഴി നിശ്ചയിക്കാന് വിധിയെ അനുവദിക്കുകയും വിധി തനിക്കു നീക്കിവച്ചതു നേടിയെടുക്കാന് കഠിനമായി അധ്വാനിക്കുകയും ചെയ്യുന്ന ഒരാളാണു താനെന്നാണ് അച്ചുവിന്റെ സ്വയം വിലയിരുത്തല്. യാത്രകളായിരുന്നു ഏറ്റവും പ്രിയപ്പെട്ട ഹോബി. എല്ലാവരില് നിന്നും അല്പസമയത്തേക്ക് അകന്ന് ഒറ്റയ്ക്കു യാത്ര ചെയ്തു കാണാത്ത സ്ഥലങ്ങളില് ഒറ്റയ്ക്കു ചെന്നിരിക്കാനാണു മോഹമെന്നു ഫെയ്സ്ബുക്കില് അച്ചു എഴുതിയിട്ടുണ്ട്. അതുപോലൊരു യാത്രയിലായിരിക്കും അവന് എന്നും. ഉടന്തന്നെ തിരിച്ചെത്തും എന്ന പ്രതീക്ഷയിലാണ് നാട്ടുകാര്.
https://www.facebook.com/Malayalivartha