സംസ്ഥാനത്തെ വിവിധ വില്ലേജ് ഓഫിസുകളില് വിജിലന്സ് നടത്തിയ പരിശോധനയില് ക്രമക്കേടുകള് കണ്ടെത്തി; പിരിക്കുന്ന പണം സര്ക്കാരില് അടക്കാതെ കൈവശം സൂക്ഷിച്ചു
കരം തീര്ത്ത് കിട്ടാതെ കര്ഷകന് ആത്മഹത്യ ചെയ്തതോടെ സംസ്ഥാനത്തെ വിവിധ വില്ലേജ് ഓഫിസുകളില് വിജിലന്സ് നടത്തിയ മിന്നല് പരിശോധനയില് ക്രമക്കേടുകള് കണ്ടെത്തി. കൊല്ലം ജില്ലയിലെ ഈസ്റ്റ്, മീനാട് വില്ലേജ് ഓഫിസുകളില് പല അപേക്ഷകളും റജിസ്റ്ററില് പതിക്കാതെയും രസീത് നല്കാതെയും സൂക്ഷിച്ചിരിക്കുന്നതായും ഭൂനികുതിയായി പിരിക്കുന്ന പണം യഥാസമയം സര്ക്കാരില് അടക്കാതെ കൈവശം സൂക്ഷിച്ചു വരുന്നതായും കണ്ടെത്തി.
ആലപ്പുഴ ജില്ലയിലെ മണ്ണാഞ്ചേരി, ചമ്പക്കുളം, കലവൂര് വില്ലേജ് ഓഫിസുകളിലെ റെയ്ഡില് 2016 ലെ 37 പോക്കുവരവ് അപേക്ഷകള് ഉള്പ്പെടെ 157 ഓളം അപേക്ഷകള് തീര്പ്പാക്കാതെ കാണപ്പെട്ടു. തൊടുപുഴ മണക്കാട് വില്ലേജ് ഓഫിസില് നടന്ന വിജിലന്സ് റെയ്ഡില് വില്ലേജ് അസിസ്റ്റന്റിന്റെ പക്കലുണ്ടായിരുന്ന കണക്കില്പ്പെടാത്ത 9880 രൂപ കണ്ടെടുത്തു.
തിരുവനന്തപുരം ജില്ലയിലെ വട്ടിയൂര്ക്കാവ്, പേട്ട, കരകുളം, മലയിന്കീഴ് എന്നീ വില്ലേജ് ഓഫിസുകളില് നടത്തിയ പരിശോധനയില് 135 ഓളം പോക്കുവരവ് അപേക്ഷകള് സമയപരിധി കഴിഞ്ഞിട്ടും തീര്പ്പുകല്പിക്കാതെ കാണപ്പെട്ടു. മലപ്പുറം ,കോഴിക്കോട് ജില്ലകളിലെ വില്ലേജ് ഓഫിസുകളിലും നടത്തിയ മിന്നല് പരിശോധനയിലും സമാന പ്രശ്നങ്ങള് കണ്ടെത്തി. 32ഓളം വില്ലേജ് ഓഫീസുകളില് നടത്തിയ പ്രാഥമിക പരിശോധനയിലാണ് ക്രമക്കേടുകള് കണ്ടെത്തിയത്. കോഴിക്കോട് ചെമ്പനോട വില്ലേജ് ഓഫിസില് കര്ഷകന് ആത്മഹത്യ ചെയ്ത സംഭവത്തിന്റെ പശ്ചാത്തലത്തിലാണ് നടപടി.
പരിശോധനയില് ക്രമക്കേടുകള് കണ്ടെത്തിയ ഉദ്യോഗസ്ഥര്ക്കെതിരെ ശക്തമായ നടപടികള് സ്വീകരിക്കുമെന്നും മിന്നല് പരിശോധനകള് തുടരുമെന്നും വിജിലന്സ് ഡയറക്ടര് ലോക്നാഥ് ബെഹ്റ അറിയിച്ചു. ക്രമക്കേടുകള് നടക്കുന്നുവെന്ന് വിജിലന്സ് ഡയറക്ടര്ക്ക് ലഭിച്ച വിവരത്തെ തുടര്ന്നായിരുന്നു ഉച്ചയ്ക്ക് 2.30ഓടെ പരിശോധന ആരംഭിച്ചത്.
https://www.facebook.com/Malayalivartha