നഴ്‌സുമാരുടെ ശമ്പള വര്‍ധനവ് വിഷയത്തില്‍ ഇന്ന് നടന്ന ചര്‍ച്ചയിലും തീരുമാനമായില്ല. തിരുവനന്തപുരത്ത് ലേബര്‍ കമ്മീഷണറുടെ അധ്യക്ഷതയിലാണ് ഇന്ന് ചര്‍ച്ച നടന്നത്. ശന്പള വര്‍ധനവില്‍ തീരുമാനമായില്ലെങ്കിലും സര്‍ക്കാര്‍ തലത്തില്‍ ചര്‍ച്ചകള്‍ തുടരാന്‍ നഴ്‌സുമാരുടെ സംഘടനയായ യുണൈറ്റഡ് നഴ്‌സ് അസോസിയേഷനും (യുഎന്‍എ) മാനേജ്‌മെന്റ് പ്രതിനിധികളും ധാരണയായി. ചര്‍ച്ചകള്‍ സര്‍ക്കാര്‍ തലത്തില്‍ തുടരുമെന്ന് ലേബര്‍ കമ്മീഷണറും അറിയിച്ചു.

മിനിമം വേതനം 20,000 രൂപയെങ്കിലും ലഭിക്കണമെന്ന ആവശ്യമാണ് നഴ്‌സുമാര്‍ ചര്‍ച്ചയില്‍ ഉന്നയിച്ചത്. എന്നാല്‍ 12,000 രൂപ വരെയെ നല്‍കാന്‍ കഴിയൂ എന്നാണ് മാനേജ്‌മെന്റ് പ്രതിനിധികളുടെ നിലപാട്. 80 മുതല്‍ 100 ശതമാനം വരെ ആവശ്യപ്പെടുന്ന ശന്പള വര്‍ധനവ് താങ്ങാനാവില്ലെന്നും മാനേജ്‌മെന്റുകള്‍ നിലപാടെടുത്തു. 

ഇന്നത്തെ ചര്‍ച്ചയില്‍ തീരുമാനമായില്ലെങ്കിലും മന്ത്രിതല ചര്‍ച്ചകള്‍ വരെ പണിമുടക്കിയുള്ള സമരമില്ലെന്ന് യുഎന്‍എ പ്രഖ്യാപിച്ചിട്ടുണ്ട്. എന്നാല്‍ ബുധനാഴ്ച മുതല്‍ സെക്ട്രട്ടറിയേറ്റ് പടിക്കലും ജില്ലാ കേന്ദ്രങ്ങളിലും നിരാഹാര സമരം തുടങ്ങുമെന്നും നഴ്‌സുമാരുടെ സംഘടന പ്രതിനിധികള്‍ പ്രഖ്യാപിച്ചു.