കുറ്റകൃത്യത്തില്‍ ദിലീപിന്റെ പങ്കാളിത്തത്തില്‍ വ്യക്തമായ പങ്കെന്ന് കോടതി നിരീക്ഷണം
ദിലീപിന്റെ ജാമ്യ ഹര്‍ജി ഹൈക്കോടതി തള്ളുന്നത് തെളിവുകളും പ്രോസിക്യൂഷന്‍ വാദങ്ങളും സസൂക്ഷ്മം വിശകലനം ചെയ്താണ്. ഗൂഢാലോചനയക്ക് ആധികാരികമായി പൊലീസ് ഉന്നയിക്കുന്ന വാദങ്ങള്‍ കോടതിക്കും ബോധ്യപ്പെടുന്നു. ഇതുമായി ബന്ധപ്പെട്ട് ദിലീപിനായി ഉന്നയിച്ച വാദങ്ങളെല്ലാം കോടതി തള്ളി. വിധിയുടെ പൂര്‍ണ്ണ രൂപം ഇനി പറയുംവിധം...
ഗുരുതരമായ പരാമര്‍ശങ്ങളാണ് കോടതി നടത്തിയത്. തന്റെ വിവാഹജീവിതം തകര്‍ത്ത നടിയോട് പ്രതികാരം ചെയ്യണമെന്ന ചിന്തയിലാണ് കുറ്റകൃത്യം ചെയ്തതെന്ന് പൊലീസ് വാദം കോടതി കോടതി അംഗീകരിച്ചു. ഇര മജിസ്ട്രറ്റിന് മുന്നില്‍ നല്‍കിയ മൊഴി കോടതി അംഗീകരിച്ചിട്ടുണ്ട്. കുറ്റകൃത്യം ചിത്രീകരിച്ച ഫോണും മെമ്മറി കാര്‍ഡും ഉടന്‍ കണ്ടെത്തണം. അല്ലെങ്കില്‍ ഇരയുടെ ജീവനു പോലും ഭീഷണിയുണ്ടാകുമെന്ന് വിലയിരുത്തലും ഉണ്ട്.
നടന്‍ എന്നതിനു പുറമെ നിര്‍മ്മാണ വിതരണ മേഖലകളില്‍ ശക്തമായ സ്വാധീനമുള്ള പ്രതി സിനിമാരംഗത്തുതന്നെ പ്രവര്‍ത്തിക്കുന്ന ഇരയെയും സാക്ഷികളെയും സ്വാധീനിക്കാന്‍ സാധ്യതയുണ്ട്. പ്രഥമദൃഷ്ടാ കേസുമായി ബന്ധപ്പെട്ട നിരവധി വിഷയങ്ങളില്‍ പ്രതിയുടെ പങ്ക് തെളിയിക്കുന്ന നിരവധി തെളിവുകളുണ്ട്. കൂടതെ പ്രതിയുടെ മാനേജര്‍ ഒളിവില്‍ പോയിരിക്കുകയാണ്. ഇയാളെ ഉടന്‍ പിടികൂടണം. അന്വേഷണം പുരോഗമിക്കുന്ന സാഹചര്യത്തില്‍ ഇനിയും പലരും പ്രതിസ്ഥാനത്തേയ്ക്ക് വരാനുണ്ട്.
വളരെ പ്രത്യേകതയുള്ള ഈ കേസില്‍ കുറ്റകൃത്യത്തിന്റെ ഗൗരവവും കൃത്യമായ ആസൂത്രണവും ക്രൂരതയും നടപ്പിലാക്കിയ മാര്‍ഗവും പ്രതികാരത്തിന്റെ ഭാഗമായി കൊടുംകുറ്റവാളികളെ ഉപയോഗിച്ച് ഒരു സ്ത്രീയോടു ചെയ്ത ക്രൂരതയും പരിഗണിക്കുമ്പോള്‍ ജാമ്യം നല്‍കാനാകില്ലെന്നാണ് ഹൈക്കോടതി സുനില്‍ തോമസ് ഉത്തരവിട്ടിരിക്കുന്നത്.
ദിലീപിനെതിരെ കൃത്യമായ തെളിവുകളുണ്ടെന്നും പ്രോസിക്യൂഷന്‍ ചൂണ്ടിക്കാട്ടിയിരുന്നു. ടവര്‍ ലൊക്കേഷന്‍ അടക്കമുള്ള തെളിവുകള്‍ ഉണ്ടെന്നും പ്രോസിക്യൂഷന്‍ അറിയിച്ചു. നിര്‍ണായക തെളിവായ മൊബൈല്‍ ഫോണ്‍ അടക്കമുള്ളവ കണ്ടെത്തേണ്ടതുണ്ടെന്നും പ്രോസിക്യുഷന്‍ വ്യക്തമാക്കിയിരുന്നു. കേസ് ഡയറിയും പൊലീസ് കോടതിയില്‍ സമര്‍പ്പിച്ചിരുന്നു.
ജാമ്യം നിഷേധിച്ചതോടെ ദിലീപ് റിമാന്‍ഡ് തടവുകാരനായി ആലുവ സബ് ജയിലില്‍ തുടരും. നാളെ റിമാന്‍ഡ് കാലാവധി അവസാനിക്കുന്ന സാഹചര്യത്തില്‍ വീണ്ടും മജിസ്‌ട്രേറ്റ് കോടതിയില്‍ ഹാജരാക്കി റിമാന്‍ഡ് വിടാനാണ് സാധ്യത.ദിലീപിനെതിരെ തെളിവുകളില്ലെന്നും നടപടി ക്രമങ്ങള്‍ പാലിക്കാതെയാണ് അറസ്‌റ്റെന്നും ദിലീപിന്റെ അഭിഭാഷകന്‍ ചൂണ്ടിക്കാട്ടിയിരുന്നു. എന്നാല്‍ ഇത് മുഖവിലയ്‌ക്കെടുക്കാന്‍ കോടതി തയ്യാറായില്ല.
https://www.facebook.com/Malayalivartha
