കായല്‍കൈയേറി റിസോര്‍ട്ട് നിര്‍മിച്ചെന്ന ആരോപണം നേരിടുന്ന ഗതാഗതമന്ത്രി തോമസ് ചാണ്ടിക്കെതിരെ എന്‍സിപിയിലെ ഒരുവിഭാഗം രംഗത്ത് . ആരോപണ വിധേയനായ തോമസ് ചാണ്ടി മന്ത്രി സ്ഥാനം രാജിവെക്കണമെന്ന് സംസ്ഥാന നേതൃയോഗം ആവശ്യപ്പെട്ടു. ആരോപണത്തില്‍ അന്വേഷണം തീരുന്നതുവരെ മന്ത്രിസ്ഥാനത്തുനിന്ന് മാറി നില്‍ക്കണമെന്നാണ് ആവശ്യപ്പെട്ടിരിക്കുന്നത്.
ഇന്ന് എറണാകുളത്ത് ചേര്‍ന്ന സംസ്ഥാന നേതൃയോഗത്തിലാണ് മന്ത്രിസ്ഥാനം ഒഴിയണമെന്ന ആവശ്യം ഉയര്‍ന്നുവന്നത്. തന്റെ റിസോര്‍ട്ടായ ലെയ്ക്ക് പാലസിലേക്ക് പൊതുഖജനാവിലെ പണം ഉപയോഗിച്ച് അനധികൃതമായി റോഡ് നിര്‍മിച്ചെന്നും കായല്‍ കൈയേറിയെന്നും അടക്കമുള്ള ആരോപണങ്ങളാണ് തോമസ് ചാണ്ടിക്കെതിരെ ഉയര്‍ന്നിരിക്കുന്നത്. ഉയര്‍ന്നുവരുന്ന ആരോപണങ്ങള്‍ തോമസ് ചാണ്ടി സ്വയം വിലയിരുത്തണമെന്ന് യോഗം ആവശ്യപ്പെട്ടു. എറണാകുളം ജില്ലാപ്രസിഡന്റ് അടക്കം എട്ട് ജില്ലാ പ്രസിഡന്റുമാരാണ് രാജി ആവശ്യം ഉന്നയിച്ചിരിക്കുന്നത്.
ആരോപണങ്ങളുടെ അടിസ്ഥാനത്തില്‍ മന്ത്രിക്കെതിരെ ശക്തമായ പ്രക്ഷോഭം സംഘടിപ്പിക്കാനുള്ള തയ്യാറെടുപ്പിലാണ് പ്രതിപക്ഷം. തോമസ് ചാണ്ടിയെ സര്‍ക്കാര്‍ സംരക്ഷിക്കുകയാണെന്ന് പ്രതിപക്ഷം കുറ്റപ്പെടുത്തി. അതേസമയം, തോമസ് ചാണ്ടിക്കെതിരായ ആരോപണങ്ങളോട് പ്രതികരിക്കാന്‍ മുഖ്യമന്ത്രി വിസമ്മതിച്ചു.
മന്ത്രി തോമസ് ചാണ്ടിക്കെതിരായ ക്രമക്കേടുകളെ കുറിച്ചുള്ള വാര്‍ത്തകള്‍ പുറത്തുവന്നതോടെയാണ് പ്രതിപക്ഷം പ്രക്ഷോഭപരിപാടികള്‍ ആരംഭിക്കാന്‍ ഒരുങ്ങുന്നത്. ഈ മാസം 19 ന് തോമസ് ചാണ്ടിയുടെ റിസോര്‍ട്ടായ ലെയ്ക്ക് പാലസിലേക്ക് പ്രതിഷേധ മാര്‍ച്ച് നടത്തും. കഴിഞ്ഞ ദിവസം മന്ത്രിക്കെതിരെ ഗുരുതര ആരോപണങ്ങളാണ് പുറത്തുവന്നത്.