മന്ത്രിയായിരുന്ന എ.കെ.ശശീന്ദ്രനെ ഫോണ്‍ വിളി കേസില്‍ കുരുക്കിയ പെണ്‍കുട്ടി നടന്ന കാര്യം പരസ്യമാക്കി ഫെയ്‌സ് ബുക്കില്‍ പ്രത്യക്ഷപ്പെട്ടതോടെ ശശീന്ദ്രന് കേസില്‍ നിന്നും രക്ഷപ്പെടാനുള്ള വഴിയൊരുക്കി.ശശീന്ദ്രനെ കേസില്‍ പെടുത്തിയത് മംഗളത്തിലെ ഒരു ലേഖകന്‍ പറഞ്ഞിട്ടാണെന്നാണ് ലേഖികയുടെ വെളിപ്പെടുത്തല്‍. തന്നെ ചതിക്കുകയായിരുന്നു എന്നാണ് പെണ്‍കുട്ടി പറയുന്നത്. തന്നെ രക്ഷിക്കാം എന്ന് ലേഖകന്‍ ഉറപ്പു നല്‍കിയിരുന്നത്രേ. പക്ഷേ നിര്‍ണായക സന്ദര്‍ഭത്തില്‍ ചതിച്ചു. മംഗളത്തിലെ മറ്റൊരു പെണ്‍കുട്ടി ചെയ്തതുപോലെ താനും ചെയ്യേണ്ടതായിരുന്നു എന്നാണ് ലേഖിക പറയുന്നത്.
പോലീസിനെ സംബന്ധിച്ചടത്തോളം ഇത് വലിയൊരു സ്‌കൂപ്പാണ്. മംഗളത്തിലെ ഒരു ലേഖകന് എതിരെ മാത്രമാണ് പ്രസ്താവനയുള്ളത്. മംഗളം സിഇഒ അജിത് കുമാറും ലേഖകന്‍ ജയചന്ദ്രനുമാണ് പോലീസിന്റെ ലിസ്റ്റിലുള്ളത്. ഇവര്‍ക്കെതിരെയുള്ള അന്വേഷണം നടന്നു വരുന്നതിനിടയിലാണ് പെണ്‍കുട്ടി പ്രധാനകാര്യം വെളിപ്പെടുത്തിയിരിക്കുന്നത്. പോലീസിനെ സംബന്ധിച്ചടത്തോളം കേസില്‍ പെണ്‍കുട്ടിയെ മാപ്പുസാക്ഷിയാക്കേണ്ടി വരും.
ശശീന്ദ്രന്‍ കേസിലെ സുപ്രധാന വെളിപ്പെടുത്തല്‍ ഉണ്ടായിരിക്കുന്ന സമയമാണ് ഏറെ ശ്രദ്ധയം. മന്ത്രി തോമസ് ചാണ്ടി വിവിധ കേസുകളില്‍ പ്രതിസ്ഥാനത്ത് നില്‍ക്കുമ്പോഴാണ് വെളിപ്പെടുത്തല്‍ ഉണ്ടായിരിക്കുന്നത്. കായല്‍ നികത്തിയ കേസിലും ഉഴവൂര്‍ വിജയന്റെ മരണത്തിലും ആരോപണ വിധേയനാണ് ഗതാഗത മന്ത്രി. എല്ലാ ആരോപണങ്ങള്‍ക്ക് പിന്നിലും ശശീന്ദ്രനെ ഗതാഗത മന്ത്രി സ്ഥാനത്ത് നിന്നും പുറത്താക്കാന്‍ തോമസ് ചാണ്ടി കളിച്ചകളിയ്‌ക്കെതിരായ പ്രതികരണമാണുള്ളത്. ഇത്തരമൊരു സാഹചര്യത്തില്‍ മംഗളം ലേഖികയുടെ വെളിപ്പെടുത്തല്‍ കൂടുതല്‍ ഗൗരവം അര്‍ഹിക്കുന്നു.
പെണ്‍കുട്ടിയുടെ വെളിപ്പെടുത്തല്‍ പോലീസ് കണക്കിലെടുത്ത് മേല്‍നടപടികള്‍ സ്വീകരിച്ചാല്‍ ശശീന്ദ്രന്‍ കുറ്റവിമുക്തനാക്കപ്പെടും. അങ്ങനെ സംഭവിച്ചാല്‍ പെണ്‍കുട്ടി പ്രതിസ്ഥാനത്ത് നിര്‍ത്തുന്ന പത്രപ്രവര്‍ത്തകന്‍ കൂടുതല്‍ പ്രതിസന്ധിയിലാകും. ശശീന്ദ്രനെ രാജി വയ്പ്പിക്കാന്‍ പാര്‍ട്ടിയിലെ പ്രബലന്‍ കളിച്ച കളിയാണ് മംഗളം നാടകമെന്ന് ഇതിനകം ആരോപണം ഉയര്‍ന്നിട്ടുണ്ട്. സംഭവം ശരിയായ ദിശയിലാണെങ്കില്‍ പോലീസ് ഇക്കാര്യം അന്വേഷിച്ചേക്കും.
ശശീന്ദ്രന്‍ കുറ്റവിമുക്തനായാല്‍ അദ്ദേഹത്തെ മന്ത്രിയാക്കാന്‍ എന്‍ സി പി തീരുമാനിക്കും. പാര്‍ട്ടിയില്‍ തോമസ് ചാണ്ടിക്കുള്ള സ്വാധീനം കഴിഞ്ഞ കുറെ നാളുകളായി കുറഞ്ഞു വരികയാണ്. തോമസ് ചാണ്ടി മന്ത്രിയായതിന്റെ ഗുണം അദ്ദേഹത്തിനു മാത്രമാണെന്നാണ് പാര്‍ട്ടി പ്രവര്‍ത്തകരുടെ നിലപാട്. മന്ത്രിയുടെ റിസോര്‍ട്ടിലേക്കുള്ള റോഡും സൗകര്യങ്ങളും വികസിപ്പിക്കാനാണ് അദ്ദേഹം ശ്രമിക്കുന്നതെന്നാണ് പ്രധാന ആരോപണം. ഇടതുസര്‍ക്കാര്‍ അതിന് കുടപിടിക്കുന്നതായും.