അമ്മയെ കാമുകനൊപ്പം വിട്ട് കോടതി; പൊട്ടിക്കരഞ്ഞ് നാലു വയസ്സുകാരന്‍
കോടതിയില്‍ വികാരനിര്‍ഭര രംഗങ്ങള്‍. തലശ്ശേരിയില്‍ രണ്ടു കുട്ടികളുടെ അമ്മയായ യുവതിക്ക് കാമുകനൊപ്പം പോകാന്‍ കോടതിയുടെ അനുമതി. പാറപ്രം സ്വദേശിയായ യുവതിയ്ക്കാണ് മക്കളെയും ഭര്‍ത്താവിനെയും ഉപേക്ഷിച്ച് കാമുകനൊപ്പം പോകാന്‍ കോടതി അനുമതി നല്‍കിയത്.
മകനുമായി കാമുകനൊപ്പം മുന്‍പ് വിദേശത്തേയ്ക്ക് കടന്ന ഇവരെ പ്രവാസികള്‍ വിവരം അറിയിച്ചതിനെ തുടര്‍ന്ന് പോലീസ് തിരിച്ചെത്തിക്കുകയായിരുന്നു. നാല് ദിവസങ്ങള്‍ക്ക് മുന്‍പായിരുന്നു നാടകീയമായ സംഭവങ്ങളുടെ തുടക്കം കഴിഞ്ഞ 29 ന് വിദേശത്തു നിന്നും എത്തിയ ഭര്‍ത്താവ് ഉറങ്ങിക്കിടക്കെ രാത്രിയില്‍ ഇളയ മകനുമായി വീടു വിട്ടിറങ്ങിയ യുവതി പിണറായി സ്വദേശിയായ കാമുകനൊപ്പം ഒമാനിലേയ്ക്ക് പോയി. വിവരം അറിഞ്ഞ ഭര്‍ത്താവ് ഒമാനിലെ തന്റെ സുഹൃത്തുക്കളെ വിവരം അറിയിച്ചു. ഇരുവരും ഒമാനില്‍ എത്തിയ ഉടന്‍ പോലീസും സംഘടനകളും ഇടപെട്ട് ഇവരെ തിരിച്ച് നാട്ടിലേയ്ക്ക് അയച്ചു.
ഒമാനില്‍ നിന്നും കോഴിക്കോട്ടെത്തിയ ഉടന്‍ ഇരുവരെയും കസ്റ്റഡിയില്‍ എടുക്കുകയും തലശ്ശേരി കോടതിയില്‍ ഹാജരാക്കുകയും ആയിരുന്നു. തുടര്‍ന്ന് കോടതിയില്‍ ഹാജരാക്കിയപ്പോള്‍ തനിക്ക് കാമുകനൊപ്പം പോകണമെന്ന് ഉറച്ച നിലപാടെടുത്ത യുവതി മക്കളെ കൂടെ കൂട്ടാന്‍ തയ്യാറായില്ല. ഇതോടെ മക്കളുടെ സംരക്ഷണം ഭര്‍ത്താവിനു വിട്ട കോടതി യുവതിയെ കാമുകനൊപ്പം വിടുകയായിരുന്നു.
ഇതിനിടെ, നാലുവയസ്സുകാരനായ മകന്‍ അമ്മയെ വിടാതെ കെട്ടിപ്പിടിച്ച് കരഞ്ഞത് കൂടി നിന്നവര്‍ക്ക് നൊമ്പരക്കാഴ്ചയായി. ഈ മകനെ കൂടാതെ എട്ടു വയസ്സുള്ള ഒരു കുട്ടികൂടി ഇവര്‍ക്കുണ്ട്.
https://www.facebook.com/Malayalivartha
