ഇനി കണ്ടിട്ടില്ലാത്ത കളികള്‍ക്ക് പോലീസ്. നടിയെ തട്ടിക്കൊണ്ടുപോയി ആക്രമിച്ച കേസില്‍ പുതിയ കരുക്കള്‍ നീക്കി അന്വേഷണസംഘം. നടിയുടെ സുഹൃത്തും സഹപ്രവര്‍ത്തകയുമായ രമ്യ നമ്പീശനെ കേസില്‍ മുഖ്യസാക്ഷിയാക്കുമെന്നാണ് സൂചന. കേസിലെ സാക്ഷിപ്പട്ടിക പൊലീസ് തയ്യാറാക്കി. രണ്ടാഴ്ചയ്ക്കകം കേസില്‍ കുറ്റപത്രം സമര്‍പ്പിക്കാനാണ് അന്വേഷണസംഘത്തിന്റെ നീക്കം.
നടിയെ ആക്രമിച്ച സംഭവവുമായി ബന്ധപ്പെട്ട് അന്വേഷണസംഘം കഴിഞ്ഞ ദിവസം രമ്യ നമ്പീശന്റെ മൊഴി എടുത്തിരുന്നു. ഇതിന് പിന്നാലെയാണ് നടിയെ മുഖ്യസാക്ഷിയാക്കാന്‍ തീരുമാനിച്ചിരിക്കുന്നത്. നടിയുടെ അടുത്ത സുഹൃത്താണ് രമ്യ. സംഭവത്തിന്റെ തുടക്കം മുതല്‍ നടിക്കൊപ്പം നില്‍ക്കുന്ന വ്യക്തിയുമാണ് രമ്യ. രമ്യയുടെ വീട്ടിലേക്ക് പോകുംവഴിയായിരുന്നു നടി ആക്രമണത്തിന് ഇരയായത്. ആക്രമണത്തിന് ശേഷം കുറച്ച് ദിവസം നടി കഴിഞ്ഞതും രമ്യയുടെ വീട്ടിലായിരുന്നു. ഈ സാഹചര്യത്തിലാണ് നടിയില്‍ നിന്ന് മൊഴിയെടുത്തതും മുഖ്യസാക്ഷിയാക്കാന്‍ അന്വേഷണസംഘം തീരുമാനിച്ചതും.
കേസില്‍ രണ്ടാഴ്ചയ്ക്കുള്ളില്‍ കുറ്റപത്രം സമര്‍പ്പിക്കാനുള്ള തയ്യാറെടുപ്പിലാണ് അന്വേഷണസംഘം. ഗൂഢാലോചന കേസില്‍ ദിലീപിനെതിരെ ശക്തമായ തെളിവുകള്‍ നിരത്തിയാണ് കുറ്റപത്രം തയ്യാറാക്കുന്നത്. ഇതുവഴി ദിലീപിന്റെ ജാമ്യംതേടാനുള്ള ശ്രമത്തിന് തടയിടാനും അന്വേഷണസംഘം ഉദ്ദേശിക്കുന്നുണ്ട്.