തന്റെ ലിംഗം ഛേദിക്കപ്പെട്ട സംഭവത്തില്‍ എഡിജിപി ബി.സന്ധ്യയ്‌ക്കെതിരെ ആഞ്ഞടിച്ച് സ്വാമി ഗംഗേശാനന്ദ രംഗത്ത്. പെണ്‍കുട്ടിയെ താന്‍ പീഡിപ്പിക്കാന്‍ ശ്രമിച്ചുവെങ്കില്‍ തൊട്ടപ്പുറത്തെ മുറിയില്‍ കിടക്കുന്ന മാതാപിതാക്കളെയോ സഹോദരനെയോ അറിയിക്കാതെ 100 മീറ്റര്‍ അകലെയുള്ള എഡിജിപി സന്ധ്യയുടെ വീട്ടിലേയ്ക്ക് ഓടിയതും പെണ്‍കുട്ടിയുടെ കാമുകനെന്ന് പറയുന്ന അയ്യപ്പദാസ് സ്ഥലത്ത് എത്തിയതും ഗൂഡാലോചനയെന്ന് ഗംഗേശാനന്ദ ആരോപിക്കുന്നു.

തന്നെ പീഡനക്കേസില്‍ കുടുക്കി അഴിക്കുള്ളിലാക്കാന്‍ എഡിജിപി സന്ധ്യ മുഖ്യമന്ത്രിയേയും അദ്ദേഹത്തിന്റെ പാര്‍ട്ടിയിലെ കണ്ണൂര്‍ ലോബിയേയും ഉപയോഗപ്പെടുത്തിയെന്നും ഒരു ഓണ്‍ലൈന്‍ മാധ്യമത്തിന് അനുവദിച്ച അഭിമുഖത്തില്‍ ഗംഗേശാനന്ദ പറഞ്ഞു.

തന്റെ ജനനേന്ദ്രിയം മുറിച്ച പെണ്‍കുട്ടിക്ക് അവാര്‍ഡ് കൊടുക്കാന്‍ വരെ മുഖ്യമന്ത്രി പിണറായിയും സുധാകരനും ചേര്‍ന്ന് കര്‍മ്മ പദ്ധതി തയ്യാറാക്കിയിരുന്നുവെന്നും പെണ്‍കുട്ടി സത്യാവസ്ഥ പോലീസിലും കോടതിയിലും വ്യക്തമാക്കിയതുകൊണ്ടാണ് ഈ നീക്കം പരാജയപ്പെട്ടതെന്നും താന്‍ കുറ്റക്കാരനെന്ന് കോടതി വിധിക്കും മുന്‍പേ പിണറായി പെണ്‍കുട്ടിയെ അഭിനന്ദിച്ചത് ഒരു മുഖ്യമന്ത്രിക്ക് ചേര്‍ന്ന നടപടിയല്ലെന്നും സ്വാമി കുറ്റപ്പെടുത്തുന്നു.

ദിലീപിന്റെയും തന്റെയും കേസ് സമാന സ്വഭാവമുള്ളതാണ്. രണ്ട് കേസിലും സന്ധ്യയുടെ ഇടപെടലിന് വഴങ്ങി ഭരണ നേതൃത്വം കൂട്ടുനില്‍ക്കുകയായിരുന്നു. തെളിവ് ഇല്ലാത്തതിനാല്‍ കേസ് മുന്നോട്ട് കൊണ്ടുപോകാന്‍ പോലീസ് ഇപ്പോള്‍ പെടാപ്പാട് പെടുകയാണെന്നും ഗംഗേശാനന്ദ ആരോപിക്കുന്നു. ദിലീപിനെ അറസ്റ്റു ചെയ്യാന്‍ സന്ധ്യയുടെ നിര്‍ബന്ധത്തിന് വഴങ്ങി മുഖ്യമന്ത്രി അനുമതി നല്‍കുകയായിരുന്നുവെന്നാണ് താന്‍ സംശയിക്കുന്നത്.

തന്നെ കള്ളക്കേസില്‍ കുടുക്കിയെന്ന ആരോപണം ശക്തമായി വരവേ ഇതില്‍ നിന്നും ശ്രദ്ധ തിരിക്കാനുള്ള സന്ധ്യയുടെ തന്ത്രമായിരുന്നു ദിലീപിന്റെ അറസ്‌റ്റെന്ന് ഏറെക്കുറെ വ്യക്തമായിക്കഴിഞ്ഞു. പോലീസ് ശക്തമായ തെളിവ് ഹാജരാക്കിയെങ്കില്‍ ഇത്രയും വിവാദമായ കേസില്‍ ദിലീപിന് ജാമ്യം കിട്ടുമോ എന്നും സ്വാമി ചോദിക്കുന്നു. തന്റെ കേസില്‍ നടന്നു വരുന്ന ക്രൈംബ്രാഞ്ച് അന്വേഷണം പ്രഹസനമാണെന്നും അമ്മ നല്‍കിയ പരാതി പോലീസ് അന്വേഷിക്കാത്തതും ഈ കേസിലെ സുപ്രധാന കണ്ണിയും തന്നെ പീഡിപ്പിച്ചെന്ന് പെണ്‍കുട്ടി വെളിപ്പെടുത്തിയിട്ടും അയ്യപ്പദാസിനെ പോലീസ് അറസ്റ്റു ചെയ്യാത്തതും മന:പൂര്‍വമാണ്.

കൊലപാതക മുള്‍പ്പെടെ ഏത് കുറ്റകൃത്യങ്ങളില്‍ പ്രതിചേര്‍ക്കപ്പെട്ടാലും പാര്‍ട്ടിക്കാരാണെങ്കില്‍ കോടതി വിധിച്ചാലെ അവര്‍ കുറ്റവാളിയാവു എന്ന നിലപാടുകാരനാണ് മുഖ്യമന്ത്രി. അതുവരെ ഏത് സ്ഥാനത്തും ഇരിക്കാം. ഈ തത്വം കൊണ്ടുനടക്കുന്ന പിണറായിയും കോടിയേരിയുമൊക്കെ എന്റെ കാര്യത്തില്‍ ഇതിന് മുമ്‌ബേ വിധിയെഴുതിയത് സന്ധ്യയുടെ നിര്‍ബന്ധത്തിന് വഴങ്ങിയാണെന്നാണ് എന്റെ വിശ്വാസം.

ജനനേന്ദ്രിയം മുറിച്ചത് ആരാണെന്ന് ഞാന്‍ കണ്ടില്ല. വേദന തോന്നി എഴുന്നേറ്റപ്പോള്‍ മുന്നാല് മീറ്റര്‍ മാറി പെണ്‍കുട്ടി നില്‍ക്കുന്നത് കണ്ടു. അവളാണ് ഇത് ചെയ്തത് എന്ന് പറയുന്നതില്‍ ന്യായമില്ല. അതുകൊണ്ടാണ് ആശുപത്രിയില്‍ വച്ച് കൃത്യം ചെയ്തത് ഞാന്‍ തന്നെയാണെന്ന് സമ്മതിച്ചതെന്നും ഗംഗേശാനന്ദ പറയുന്നു.

30 കൊല്ലമെങ്കിലും അകത്തിടുക എന്ന ലക്ഷ്യത്തോടെയാണ് തനിക്കെതിരെ പൊലീസ് കേസെടുത്തതെന്ന് എഫ് ഐ ആറില്‍ വ്യക്തമാണെന്നും എന്നാല്‍ ഈ കേസില്‍ ഉപയോഗപ്പെടുത്താന്‍ കഴിയുന്ന യാതൊരുതെളിവുകളും പൊലീസിന്റെ പക്കല്‍ ഇല്ലന്നും ഇതിന്റെ തെളിവാണ് ഹൈക്കോടതിയില്‍ നിന്നും സ്വാഭാവിക ജാമ്യം നേടി താന്‍ പുറത്തിറങ്ങിയതെന്നും സ്വാമി കൂട്ടിച്ചേര്‍ത്തു. ഇപ്പോള്‍ പറയത്തക്ക ആരോഗ്യപ്രശ്‌നങ്ങളില്ല. കഴിഞ്ഞതെല്ലാം കാലക്കേടന്ന് കരുതി മറന്നു കഴിഞ്ഞു. ആയുര്‍വ്വേദ ചികത്സിയിലാണ് ഇപ്പോള്‍ കൂടുതല്‍ ശ്രദ്ധിക്കുന്നതെന്നും ഗംഗേശാനന്ദ പറയുന്നു.