സി.പി.എമ്മുമാര്‍ ഫെയിസ്ബുക്കിലൂടെ തന്റെ വ്യാജ നഗ്നചിത്രങ്ങള്‍ പ്രചരിപ്പിക്കുന്നെന്ന് ആരോപിച്ച് മുസ്‌ലിംലീഗ് പഞ്ചായത്ത് പ്രസിഡന്റ് പൊലീസിനും വനിതാ കമ്മീഷനും പരാതി നല്‍കി. മമ്പാട് സി.പി.എം സഖാക്കള്‍ എന്ന ഫെയിസ്ബുക്ക് അക്കൗണ്ടിലാണ് ആദ്യം ഫോട്ടോ പ്രചരിച്ചത്. പിന്നാലെ പ്രസിഡന്റിനെ ആക്ഷേപിക്കുന്ന അശ്ലീല ഗാനവും എത്തി. ഇക്കാര്യങ്ങളെല്ലാം ചൂണ്ടിക്കാട്ടിയാണ് മമ്പാട് പഞഞ്ചായത്ത് പ്രസിഡന്റ് കണ്ണിയന്‍ റുഖിയയാണ് പരാതി നല്‍കിയത്. 

സംഭവത്തെ കുറിച്ച് അവര്‍ പറയുന്നതിങ്ങനെ: കയര്‍കേരള പദ്ധതിയുടെ ഭാഗമായി ഈ മാസം ഏഴിന് പ്രസിഡന്റും വൈസ് പ്രസിഡന്റ് പന്താര്‍ മുഹമ്മദും മറ്റ് നാല് അംഗങ്ങളും ഉദ്യോഗസ്ഥരും ആലപ്പുഴയിലെത്തി. പരിപാടി കഴിഞ്ഞ് പുന്നമടക്കായലില്‍ യാത്രനടത്തി. ഹൗസ്‌ബോട്ട് യാത്രയ്ക്കിടെ പന്താര്‍ മുഹമ്മദ് ബോട്ട് ഓടിക്കുന്ന ചിത്രമെടുത്തു. ആ ഫോട്ടോയില്‍ പിന്നിലായി കണ്ണിയന്‍ റുഖിയയും മറ്റൊരു പുരുഷ പഞ്ചായത്ത് അംഗവും ഉണ്ടായിരുന്നു. വൈസ് പ്രസിഡന്റായ പന്താര്‍ മുഹമ്മദ് തന്റെ ചിത്രം ഫെയിസ് ബുക്കില്‍ പോസ്റ്റ് ചെയ്തു. അതില്‍ കണ്ണിയന്‍ റുഖിയയുടെ ഫോട്ടോയ്‌ക്കൊപ്പം മറ്റൊരു യുവതിയുടെ നഗ്നചിത്രം ചേര്‍ത്ത് വെച്ച് ആരോ സോഷ്യല്‍മീഡിയയിലൂടെ പ്രചരിപ്പിച്ചു. തട്ടമിട്ട സ്ത്രീയുടെ നഗ്നചിത്രങ്ങള്‍ റുഖിയയുടേതാണ് വരുത്തിത്തീര്‍ക്കുകയാണ് ലക്ഷ്യമെന്ന് കണ്ടാല്‍ മനസിലാകും.

ഭര്‍ത്താവും മക്കളും ചെറുമക്കളും ഉള്ള സാധാരണ വീട്ടമ്മയാണ് റുഖിയ. ചിത്രങ്ങള്‍ വൈറലായ ശേഷം പലരുടെയും നോട്ടത്തില്‍ പോലും മാറ്റമുണ്ടെന്ന് അവര്‍ പറഞ്ഞു. ബന്ധുക്കളുടെയോ, നാട്ടുകാരുടെയോ മുഖത്ത് നോക്കാന്‍ മടി. എന്നാല്‍ സൈബര്‍ ആക്രമണത്തെ എങ്ങനെ നേരിടണമെന്ന് ഈ പാവം സ്ത്രീക്ക് അറിയില്ല. പൊലീസ് സി.പി.എമ്മിന്റെ കൈകളിലായതിനാല്‍ കേസ് എവിടെയെത്തുമെന്ന് കാത്തിരുന്ന് കാണാം. അതേസമയം സംഭവത്തിന് പിന്നില്‍ പ്രാദേശിക കോണ്‍ഗ്രസ് നേതാക്കളാണെന്ന് സി.പി.ഐ.എം മമ്പാട് ലോക്കല്‍ കമ്മിറ്റ് ഫെയിസ്ബുക്കിലൂടെ ഇറക്കിയ പ്രസ്താവനയില്‍ ആരോപിക്കുന്നു.

'നവമാധ്യമങ്ങളില്‍ പ്രചരിച്ച ചിത്രങ്ങളുടെ ഉറവിടം കോണ്‍ഗ്രസ് മാധ്യമ ഗ്രൂപ്പാണെന്ന് ലീഗ് നേതാക്കള്‍ പ്രാസ്താവനയില്‍ പറയുന്നുണ്ട് .അവര്‍ പ്രചരിപ്പിച്ച ചിത്രങ്ങള്‍ നവമാധ്യമങ്ങളില്‍ പടര്‍ന്നപ്പോള്‍ ഉണ്ടായ മാനഹാനിക്ക് സി.പിഎം എങ്ങനെ ഉത്തരവാദികള്‍ ആകും. പിന്നീട് മോര്‍ഫ് ചെയ്ത് പ്രചരിപ്പിക്കപ്പെട്ട ചിത്രങ്ങളുടെ ഉറവിടം അന്വേഷിച് കണ്ടുപിടിക്കേണ്ട ഉത്തരവാദിത്വം സി.പിഎമ്മിന്റേതല്ല. ലീഗ് നേതാക്കളുടെ പരാതിപ്രകാരം കുറ്റക്കാരെ നിയമത്തിന് മുന്‍പില്‍ കൊണ്ടുവരണമെന്നും' പ്രസ്താവനയില്‍ പറയുന്നു.