ഇന്റര്വ്യൂ നടത്തിയത് ഇതിനാണോ? ജോലിയില് പ്രവേശിച്ച ദിവസം തന്നെ യുവതിയെ പീഡിപ്പിക്കാന് ശ്രമം
എത്ര സംഭവങ്ങളും വിവാദ പരാമര്ശങ്ങളും ശിക്ഷാവിധികളും എന്തൊക്കെ സംഭവിച്ചാലും നമ്മുടെ നാട് നേരെയാകുന്ന ഒരു ലക്ഷണം ഇല്ലെന്നു തന്നെ പറയാം. എങ്ങനെ സ്ത്രീകള് പുറത്തിറങ്ങി ജോലിക്ക് പോകും. വീട്ടിലുള്ളവര്ക്ക് മക്കള് ജോലിക്കുപോയാല് അവര് തിരിച്ച് സുരക്ഷിതമായി വീട്ടില് എത്തുന്നത് വരെ ടെന്ഷനാണ്. മതാപിതാക്കളെ പേടിപ്പെടുത്തുന്ന സംഭവമാണ് പയ്യന്നൂരില് നടന്നിരിക്കുന്നത്.
ഇന്റര്വ്യൂ നടത്തി ജോലിയില് പ്രവേശിച്ച ദിവസം തന്നെ യുവതിയെ പീഡിപ്പിക്കാന് ശ്രമം. യുവതിയുടെ പരാതിയില് സ്ഥാപന ഉടമ അറസ്റ്റിലായി. പയ്യന്നൂര് റെയില്വെ സ്റ്റേഷന് റോഡില് ആരംഭിക്കുന്ന യുണൈറ്റഡ് ഇന്ത്യ ഇന്ഷുറന്സ് ഫ്രാഞ്ചൈസിയില് ജോലിക്കെത്തിയ യുവതിയെയാണ് പീഡിപ്പിക്കാന് ശ്രമിച്ചത്. കാങ്കോലിലെ കെ വി സന്തോഷ് കുമാറിനെ (44) യാണ് പയ്യന്നൂര് പോലീസ് അറസ്റ്റ് ചെയ്തത്. സ്ഥാപനം തുടങ്ങുന്നതിന് മുമ്പ് ജോലിയില് പരിശീലനം നല്കാനാണെന്ന് പറഞ്ഞാണ് സ്ഥാപനത്തിലേക്ക് വിളിച്ചുവരുത്തിയത്. ജോലിക്കിടയില് സന്തോഷ് യുവതിയുടെ കൈയ്യില് കടന്നുപിടിക്കുകയായിരുന്നു.
ഉടന്തന്നെ യുവതി സന്തോഷിന്റെ കരണത്തടിച്ചു. ബഹളം കേട്ട് മറ്റുള്ളവര് എത്തിയപ്പോള് പീഡനമാണെന്ന് വ്യക്തമായതോടെ അവരും സന്തോഷിനെ കൈകാര്യം ചെയ്തു. വിവരമറിഞ്ഞ് സ്ഥലത്തെത്തിയ പോലീസ് സന്തോഷിനെ കസ്റ്റഡിയിലെടുക്കുകയായിരുന്നു. ഇതിനിടയില് ചിലര് ഇടപെട്ട് ഒത്തുതീര്പ്പിന് ശ്രമിച്ചെങ്കിലും യുവതി പരാതിയില് ഉറച്ചുനിന്നതോടെയാണ് സന്തോഷിനെ അറസ്റ്റ് ചെയ്തത്.
https://www.facebook.com/Malayalivartha