അധ്യാപകന്‍ പീഡിപ്പിച്ച കുട്ടിയുടെ കുടുംബം അനുഭവിക്കുന്ന വേദന
പ്രഥമാധ്യാപകന്‍ പീഡിപ്പിച്ചു ഗര്‍ഭിണിയാക്കിയ ബാലികയുടെ കുടുംബത്തിന് മാനഹാനി മാത്രമല്ല പുറത്തിറങ്ങാനും അനുവാദമില്ല. സര്‍ക്കാര്‍ റസിഡന്‍ഷ്യല്‍ സ്‌കൂളിലെ ഒന്‍പതാം ക്ലാസ് വിദ്യാര്‍ഥിനിയാണ് പീഡനത്തിനിരയായത്. മൂന്നാഴ്ച മുമ്പാണു ഒഡീഷ കോരാപുത് ജില്ലയിലെ ബാള്‍ഡയില്‍ പട്ടികവര്‍ഗക്കാര്‍ക്കായുള്ള സര്‍ക്കാര്‍ റസിഡന്‍ഷ്യല്‍ സ്‌കൂളിലെ ഒന്‍പതാം ക്ലാസ് വിദ്യാര്‍ഥിനിയെ പീഡിപ്പിച്ചതിനു പ്രഥമാധ്യാപകന്‍ ബിദുഭൂഷണ്‍ നായക് അറസ്റ്റിലായത്.
കുട്ടിയുടെ ഗര്‍ഭം അഞ്ചുമാസമായതിനാല്‍ അലസിപ്പിക്കാനാവില്ലെന്നു ഡോക്ടര്‍മാര്‍ വ്യക്തമാക്കി. മകളുടെ ആരോഗ്യം സംബന്ധിച്ചു വീട്ടുകാര്‍ ആശങ്കാകുലരായിരിക്കേയാണു ഗര്‍ഭധാരണത്തിനു സദ്യ നടത്തണമെന്ന ആവശ്യമുന്നയിച്ച് ഗ്രാമവാസികള്‍ കുടുംബത്തിനെതിരേ ഉപരോധം ഏര്‍പ്പെടുത്തിയത്. ഇത്തരമൊരു സദ്യ നടത്താന്‍ കുറഞ്ഞതു 30,000 രൂപയെങ്കിലും ചെലവാകുമെന്നും കൂലിപ്പണിക്കാരനായ തന്നെക്കൊണ്ട് അതു സാധിക്കില്ലെന്നും കുട്ടിയുടെ പിതാവ് പറയുന്നു.
കുട്ടിയുടെ പിതാവിന്റെ പരാതി പ്രകാരമാണു പ്രഥമാധ്യാപകനെതിരേ പോലീസ് കേസെടുത്തത്. എന്നാല്‍, സംഭവം അവിഹിതബന്ധമാണെന്നും ലൈംഗികപീഡനമല്ലെന്നുമാണ് ഇതുസംബന്ധിച്ച് അന്വേഷണം നടത്തിയ വകുപ്പുതലസമിതിയുടെ കണ്ടെത്തലെന്നു ജില്ലാ പട്ടികവര്‍ഗക്ഷേമ ഓഫീസര്‍ ജഗന്നാഥ് സോറന്‍ പറയുന്നു!
അതുകൊണ്ടുതന്നെ സാമ്പത്തികസഹായം ശിപാര്‍ശ ചെയ്യാന്‍ നിവൃത്തിയില്ല. ഇനി ഇക്കാര്യത്തില്‍ തീരുമാനമെടുക്കേണ്ടതു ജില്ലാ കലക്ടറാണെന്നും സോറന്‍ പറഞ്ഞു. അധ്യാപകനു പുറമേ ഹോസ്റ്റല്‍ മേട്രനും സംഭവത്തില്‍ പങ്കുണ്ടെന്നാണ് അന്വേഷണസമിതിയുടെ കണ്ടെത്തല്‍.
ഒഡീഷയില്‍ ഇരകള്‍ക്കുള്ള നഷ്ടപരിഹാരപദ്ധതി (2017) പ്രകാരം ബലാത്സംഗത്തിനിരയായ വ്യക്തിക്ക് മൂന്നുലക്ഷം രൂപ സാമ്പത്തികസഹായം നല്‍കാന്‍ വ്യവസ്ഥയുണ്ട്.
നാഷണല്‍ ക്രൈം റെക്കോഡ്‌സ് ബ്യൂറോയുടെ കണക്കുപ്രകാരം സ്ത്രീകള്‍ക്കെതിരേ ഏറ്റവുമധികം കുറ്റകൃത്യങ്ങള്‍ നടക്കുന്ന സംസ്ഥാനങ്ങളിലൊന്നാണ് ഒഡീഷ. കഴിഞ്ഞവര്‍ഷം മാത്രം 2144 ബലാത്സംഗക്കേസുകളാണു പോലീസ് രജിസ്റ്റര്‍ ചെയ്തത്.
https://www.facebook.com/Malayalivartha
