ടി.പി കേസിലെ ഗൂഢാലോചനയില് നിന്ന് പി. മോഹനനെ രക്ഷിച്ച തന്ത്രം ദിലീപിനും രക്ഷയാകുമോ?
കോളിളക്കം സൃഷ്ടിച്ച ടി.പി ചന്ദ്രശേഖരന് വധക്കേസില് നിന്ന് സി.പി.എം കോഴിക്കോട് ജില്ലാ സെക്രട്ടറി പി..മോഹനനെ രക്ഷിച്ച അതേ തന്ത്രത്തിലൂടെ നടിയെ ആക്രമിച്ച കേസിന്റെ ഗൂഢാലോചനയില് കുറ്റാരോപിതനായ ദിലീപിനെയും അഡ്വ. രാമന്പിള്ള ഊരിയെടുക്കുമോ? നിയമവിദഗ്ധരടക്കമുള്ളവര് ഇക്കാര്യം ചര്ച്ച ചെയ്യുന്നുണ്ട്. ദിലീപിന് ആശ്വാസമാകുന്ന മാര്ഗവും ഇതാണ്. കുറ്റകൃത്യം നടന്നപ്പോള് പ്രതി വേറൊരിടത്തായിരുന്നു എന്ന് തെളിവുകള് സഹിതം നിരത്തി വാദിച്ച് രക്ഷപെടുത്തുന്ന രീതിയാണിത്. നിയമത്തില് ഇതിന് 'ആലബൈ' എന്നാണ് പറയുന്നത്. ടി.പി വധക്കേസില് കോഴിക്കോട് വടകരയിലുള്ള ഒരു പൂക്കടയില് വെച്ച് എം. മോഹനന്റെ നേതൃത്വത്തില് ഗൂഢാലോചന നടത്തിയെന്നായിരുന്നു പ്രോസിക്യൂഷന് വാദം.
എന്നാല് ഗൂഢാലോചന നടത്തിയെന്ന് പ്രോസിക്യൂഷന് പറഞ്ഞ സമയത്ത് മോഹനന് പൂക്കടയില് ഇല്ലായിരുന്നെന്നും അന്നേ ദിവസം, സി.പി.എമ്മിന്റെ പാര്ട്ടി കോണ്ഗ്രസുമായി ബന്ധപ്പെട്ട് നടന്ന റാലിയില് പങ്കെടുക്കാന് വടകരയില് ഉണ്ടായിരുന്നെന്നുമാണ് വക്കിലായ ബി. രാമന്പിള്ള വാദിച്ചത്. ഇതിനായി റാലിക്ക് മുന്നോടിയായുള്ള ദീപശാഖാ പ്രയാണത്തിന്റെ ചിത്രങ്ങളും കോടതിയില് ഹാജരാക്കി. ദേശാഭിമാനിയില് ഈ ചിത്രങ്ങള് അടിച്ച് വന്നതിന്റെ കോപ്പിയും ഹാജരാക്കി. ഫോട്ടോകളിലൊന്നില് ദേശാഭിമാനി മുന് എഡിറ്ററായിരുന്ന വി.ദക്ഷിണാമൂര്ത്തിയുടെ വാച്ചിലെ സമയവും പ്രതിഭാഗം ചൂണ്ടിക്കാട്ടി. ഇതായിരുന്നു നിര്ണായക തെളിവ്. പ്രോസിക്യൂഷന് പറഞ്ഞ സമയത്ത് പി..മോഹനന് പൂക്കടയില് ഇല്ലായിരുന്നു എന്ന് തെളിഞ്ഞതോടെ കോടതി വെറുതെ വിടുകയായിരുന്നു.
ഇതേ രീതി തന്നെയാണ് ദിലീപും പിന്തുടരുന്നതെന്ന് തോന്നുന്നു. നടി ആക്രമിക്കപ്പെട്ട സംഭവം നടന്ന ഫെബ്രുവരി 17ന് താന് ആശുപത്രിയിലായിരുന്നെന്ന് ദിലീപ് അന്വേഷണ സംഘത്തെ അറിയിച്ചിട്ടുണ്ട്. അതിനുള്ള മെഡിക്കല് രേഖകളും ഹാജരാക്കിയിരുന്നു. എന്നാല് ഇത് വ്യാജമാണെന്നാണ് പൊലീസ് പറയുന്നത്. അതേസമയം ആലുവയിലെ വീടിനടുത്തുള്ള ആശുപത്രിയില് വര്ഷങ്ങളായി ദിലീപ് ചികില്സ തേടാറുണ്ടെന്നും അഡ്മിറ്റായാല് രാത്രി വീട്ടില് പോവുകയാണ് പതിവെന്നും ഡോക്ടര് മാധ്യമങ്ങളോട് പറഞ്ഞിട്ടുണ്ട്. അതിനാല് 'ആലബൈ' ദിലീപിനെ രക്ഷിക്കുമോ എന്ന് കാത്തിരുന്ന് കാണാം.
https://www.facebook.com/Malayalivartha