ആരോപണ വിധേയര്ക്ക് പിണറായി റിപ്പോര്ട്ട് നല്കാത്തത് ആദ്യമായല്ല; പാര്ട്ടി സെക്രട്ടറിയായിരുന്നപ്പോള് സി.പി.എം നേതാക്കള്ക്കെതിരെയുള്ള റിപ്പോര്ട്ടിന്റെ പകര്പ്പ് പോലും നല്കിയില്ല
സോളാര് ജുഡീഷ്യല് കമ്മീഷന് റിപ്പോര്ട്ട് കിട്ടാന് മുന്മുഖ്യമന്ത്രി ഉമ്മന്ചാണ്ടി മുഖ്യമന്ത്രി പിണറായി വിജയന് കത്ത് നല്കിയിട്ടും അനുകൂല നിലപാട് എടുക്കാത്തതില് പ്രതിഷേധം ഉയരുമ്പോള് ഇതേ രീതിയിലുള്ള മറ്റൊരു സംഭവമാണ് സി.പി.എമ്മുകാര് പറയുന്നത്. ആ സംഭവത്തിലും പിണറായി റിപ്പോര്ട്ട് നല്കിയില്ല. അദ്ദേഹം പാര്ട്ടി സെക്രട്ടറിയായിരിക്കുമ്പോഴാണ് സേവ് സി.പി.എം ഫോറം അന്വേഷണ കമ്മീഷന് റിപ്പോര്ട്ടിന്റെ അടിസ്ഥാനത്തില് സംസ്ഥാന നേതാക്കളായ കെ.എന് രവീന്ദ്രനാഥിനും എം.എം ലോറന്സിനുമെതിരേ അച്ചടക്കനടപടികള്ക്ക് നീക്കം തുടങ്ങി. ഇത് മനസിലാക്കിയ ഇരുവരും പിണറായി വിജയനെ സമീപിച്ചു. റിപ്പോര്ട്ടിന്റെ പകര്പ്പ് തങ്ങള്ക്ക് നല്കണമെന്ന് അഭ്യര്ത്ഥിച്ചു.
എന്നാല് പാര്ട്ടി സെക്രട്ടറിയായിരുന്ന പിണറായി റിപ്പോര്ട്ട് നല്കിയില്ല. തങ്ങള്ക്കെതിരെയുള്ള ആരോപണങ്ങളെ കുറിച്ച് അറിയാതെ വിഷയം ചര്ച്ച ചെയ്യാനോ, മറുപടി നല്കാനോ കഴിയില്ലെന്ന് എം.എം ലോറന്സും കെ.എന് രവീന്ദ്രനാഥും വ്യക്തമാക്കി. പക്ഷെ, വി.എസ് , പിണറായി പോര് രൂക്ഷമായിരുന്ന അന്ന് രവീന്ദ്രനാഥ് അടക്കമുള്ളവരെ പുകച്ച് പുറത്ത്ചാടിക്കാനുള്ള ആയുധമായി റിപ്പോര്ട്ടിനെ ഉപയോഗിക്കാനായിരുന്നു നീക്കം. അപകടം തിരിച്ചറിഞ്ഞ രവീന്ദ്രനാഥും ലോറന്സും ജനറല് സെക്രട്ടറിയായിരുന്ന ഹര്ക്കിഷന് സിംഗ് സുര്ജിത്തിന് പരാതി നല്കി. അങ്ങനെ റിപ്പോര്ട്ടും കിട്ടി. പാര്ട്ടി സെക്രട്ടറിയായിരുന്ന കാലത്ത് പിണറായി ഏകാധിപത്യമാണ് നടപ്പിലാക്കിയിരുന്നത്. കമ്മിറ്റികളില് തനിക്കെതിരെ വിമര്ശനം ഉന്നയിച്ചവരെയൊക്കെ അന്ന് വെട്ടിനിരത്തിയിരുന്നു.
അന്ന് ലോറന്സും രവീന്ദ്രനാഥും നേരിട്ട അവസ്ഥയിലാണ് ഉമ്മന്ചാണ്ടിയും കൂട്ടരും. ബലാല്സംഗം ഉള്പ്പെടെയുള്ള കേസുകള് എടുക്കുമെന്ന് മുഖ്യമന്ത്രി പ്രഖ്യാപിച്ചിട്ടും അതിനാധാരമായ വസ്തുതകള് എന്തെന്ന് അറിയാനുള്ള സ്വാഭാവിക നീതി കിട്ടുന്നില്ല. അന്വേഷണ ഉത്തരവ് പുറത്ത് വന്ന ശേഷം കോടതിയെ സമീപിച്ചാല് ഉമ്മന്ചാണ്ടിക്ക് കമ്മീഷന് റിപ്പോര്ട്ടിന്റെ പകര്പ്പ് കിട്ടും. അത് സര്ക്കാരിന് നാണക്കേടാകുമെന്ന് മനസിലാക്കിയാണ് നവംബറില് നിയമസഭ വിളിച്ച് കൂട്ടാന് തീരുമാനിച്ചത്. അതും ഒരു മണിക്കൂറാണ് സഭ സമ്മേളക്കുന്നത്. കമ്മീഷന് റിപ്പോര്ട്ട് സഭയില് വയ്ക്കുന്നതല്ലാതെ ചര്ച്ചയുണ്ടാകില്ല. സര്ക്കാര് ബുദ്ധിപൂര്വ്വമാണ് ഈ നീക്കം നടത്തിയിരിക്കുന്നത്.
അതേസമയം ടേംസ് ഓഫ് റഫറന്സിന് വെളിയിലുള്ള കാര്യങ്ങള് കമ്മീഷന് അന്വേഷിച്ചെന്ന പ്രതിപക്ഷത്തിന്റെ ആരോപണം മുഖ്യമന്ത്രി പിണറായി വിജയന് ഗൗരവമായാണ് കാണുന്നത്. ഇതേക്കുറിച്ച് പരിശോധിക്കാന് അദ്ദേഹം നിയമവകുപ്പിനോട് ആവശ്യപ്പെട്ടിട്ടുണ്ട്. വലിയ വിവാദങ്ങളില്ലാതെ മുന്നോട്ട്പോകുന്ന സര്ക്കാരിന്റെ പ്രതിച്ഛായയ്ക്ക് കോട്ടം തറ്റാന് ഈ വിഷയം കാരണമാകരുതെന്ന് അദ്ദേഹത്തിന് നിര്ബന്ധമുണ്ടെന്നാണ് അറിയുന്നത്. എന്നാല് വിഷയം രാഷ്ട്രീയമായി ഉന്നയിക്കുക മാത്രമാണ് സി.പി.എമ്മും ഇടത്പക്ഷവും ഉദ്ദേശിക്കുന്നത്.
https://www.facebook.com/Malayalivartha