ഹര്ത്താലിലെ ജനരോഷം ഭയന്ന് കോണ്ഗ്രസ് സോളാര് സമരത്തിനിറങ്ങില്ല; സമരത്തിനിടെ സംഘര്ഷമുണ്ടായാല് പ്രശ്നം കൂടുതല് വഷളാകും
സോളാര് അന്വേഷണ കമ്മീഷന് റിപ്പോര്ട്ടിനെ തുടര്ന്ന് എല്.ഡി.എഫ് സര്ക്കാര് ഉമ്മന്ചാണ്ടി അടക്കമുള്ള നേതാക്കള്ക്കെതിരെ ബലാല്സംഗം അടക്കമുള്ള കേസെടുക്കാന് തീരുമാനിച്ച സാഹചര്യത്തില് കേസിനെ നിയമപരമായും രാഷ്ട്രീയമായും നേരിട്ടാല് മതിയെന്നും പ്രത്യേകസമര പരിപാടികള് വേണ്ടെന്നും കെ.പി.സി.സി തീരുമാനിച്ചത് ജനരോഷം ഭയന്ന്. കഴിഞ്ഞ 16ന് ഇന്ധനവില വര്ദ്ധനവിനെതിരെ കോണ്ഗ്രസ് നേതൃത്വത്തില് നടത്തിയ ഹര്ത്താലിനെതിരെ സംസ്ഥാന വ്യാപകമായി ജനങ്ങള് പ്രതിഷേധവുമായി എത്തിയിരുന്നു. സമരം നടത്തിയത് കൊണ്ട്
പെട്രോള്, ഡീസല് വില കുറയില്ലെന്നും ഞങ്ങള്ക്ക് ദുരിതം മാത്രമാണ് ഉണ്ടാകുന്നതെന്നും ചൂണ്ടിക്കാട്ടി ആളുകള് രംഗത്തെത്തിയിരുന്നു. സാധാരണ കോണ്ഗ്രസ് നിലപാടുകളെ പിന്തുണയ്ക്കുന്ന മനോരമ പോലും ഹര്ത്താലിനെതിരെ എഡിറ്റോറിയല് എഴുതി. വി.ഡി സതീശന് തന്റെ എതിര്പ്പ് പരസ്യമായി പ്രകടിപ്പിക്കുകയും ചെയ്തു.
ഈ സാഹചര്യങ്ങള് കണക്കിലെടുത്താണ് സോളാര് കേസില് സര്ക്കാരിനെതിരെ പ്രത്യേക സമരപരിപാടികള് സംഘടിപ്പിക്കേണ്ടെന്ന് ശനിയാഴ്ച ചേര്ന്ന കെ.പി.സി.സി നിര്വാഹകസമിതി യോഗം തീരുമാനിച്ചത്. ഐ, എ ഗ്രൂപ്പ് നേതാക്കള് പ്രതിസ്ഥാനത്തുള്ളതിനാല് ഇരുവിഭാഗവും ആദ്യം യോഗം ചേര്ന്ന് സമവായത്തിലെത്തിയിരുന്നു. സമരപരിപാടികളുമായി മുന്നോട്ട് പോയാല് പാര്ട്ടിയേയും നേതാക്കളെയും അത് ബാധിക്കുമെന്ന് നേതൃത്വം ചൂണ്ടിക്കാട്ടി. ഉമ്മന്ചാണ്ടിയെ പോലുള്ള മുതിര്ന്ന നേതാവിനെതിരെ ബലാല്സംഗ കേസ് ചുമത്തിയത് പ്രവര്ത്തകരെ ചൊടിപ്പിച്ചിട്ടുണ്ട്. അതിനാല് സമരപരിപാടികളുമായി മുന്നോട്ട് പോയാല് പലയിടത്തും സംഘര്ഷങ്ങളുണ്ടായേക്കും. അങ്ങനെ സംഭവിച്ചാല് സംസ്ഥാനത്തെ ക്രമസമാധാനം തകര്ത്ത് സര്ക്കാരിനെ പ്രതിസന്ധിയിലാക്കാന് ആരോപണവിധേയരായ നേതാക്കള് മുന്നിട്ടിറങ്ങിയിരിക്കുകയാണെന്ന് മുഖ്യമന്ത്രിക്ക് സ്ഥാപിക്കാനാകും.
ഇതെല്ലാം മുന്കൂട്ടി കണ്ടാണ് സമരപരിപാടികളില് നിന്ന് പിന്മാറിയത്. പകരം രാഷ്ട്രീയ വിശദീകരണ യോഗങ്ങളാവും നടത്തുക. ടി.പി ചന്ദ്രശേഖരന് വധക്കേസില് സി.പി.എം പ്രതിരോധത്തിലായപ്പോള് സമരം നടത്തുകയല്ല, മറിച്ച് ഉത്തരകേരളത്തില് രാഷ്ട്രീയവിശദീകരണ യോഗങ്ങള് സംഘടിപ്പിച്ച്, അണികളെ കാര്യങ്ങള് ബോധ്യപ്പെടുത്തുകയാണുണ്ടായത്. ആ രീതി തന്നെയാണ് കോണ്ഗ്രസ് സോളാര് കേസിനെ നേരിടാനും ഉപയോഗിക്കുന്നത്. മാത്രമല്ല പാര്ട്ടിയില് മുമ്പെങ്ങും ഇല്ലാത്ത ഐക്യവും ഇക്കാര്യത്തില് രൂപപ്പെട്ടിട്ടുണ്ട്. സോളാര് കേസില് ഉമ്മന്ചാണ്ടിയെ കുറ്റപ്പെടുത്തിയത് വി.എം സുധീരന് മാത്രമാണ്. പക്ഷെ, അപ്പോഴും ഉമ്മന്ചാണ്ടിക്കെതിരായ ലൈംഗിക ആരോപണം വിശ്വസിക്കുന്നില്ലെന്ന് അദ്ദേഹം വ്യക്തമാക്കിയിട്ടുണ്ട്.
https://www.facebook.com/Malayalivartha