ജിഷ്ണുപ്രണോയ് കേസിൽ സിബിഐ അന്വേഷണം ആവശ്യപ്പെട്ട് മഹിജ നാളെ സുപ്രീം കോടതിയെ സമീപിക്കും
ജിഷ്ണു പ്രണോയ് കേസില് സിബിഐ അന്വേഷണം ആവശ്യപ്പെട്ട് ജിഷ്ണുവിന്റെ അമ്മ മഹിജ നാളെ സുപ്രീം കോടതിയെ സമീപിക്കും. സംസ്ഥാന പോലീസ് അന്വേഷണം ശരിയായ ദിശയില് അല്ലെന്നും പോലീസില് വിശ്വാസം പൂര്ണ്ണമായും നഷ്ടമായെന്നും മഹിജ കോടതിയെ അറിയിക്കും. കൃഷ്ണദാസടക്കമുള്ള ആരോപണ വിധേയരെ സംരക്ഷിക്കാന് പോലീസ് ശ്രമിച്ചുവെന്ന ഗുരുതര ആരോപണങ്ങളാണ് കേസില് കക്ഷി ചേരാന് സമര്പ്പിക്കുന്ന അപേക്ഷയില് മഹിജ ഉന്നയിക്കുക.
ജിഷ്ണു പ്രണോയ്, ഷഹീര് ഷൌക്കത്തലി കേസുകളില് കൃഷ്ണദാസ് അടക്കമുള്ള പ്രതികളുടെ ജാമ്യം റദ്ധാക്കണമെന്ന് ആവശ്യപ്പെട്ടുള്ള ഹര്ജി സുപ്രീം കോടതി തിങ്കളാഴ്ച പരിഗണിക്കാനിരിക്കെയാണ് ജിഷ്ണുവിന്റെ അമ്മ മഹിജ സുപ്രീം കോടതിയെ സമീപിക്കുന്നത്. പോലീസ് അന്വേഷണത്തില് തുടക്കം മുതല് സംഭവിച്ച വീഴ്ചകള് തുറന്നു കാട്ടിയാണ് സിബിഐ അന്വേഷണത്തിനായി മഹിജ അപേക്ഷ നല്കുക.
മാനേജ്മെന്റിലെ ഉന്നതര് അന്വേഷണത്തെ സ്വാധീനിക്കാന് സാധ്യതയുണ്ട്. പത്തു മാസത്തെ അന്വേഷണത്തില് കാര്യമായി ഒന്നും കണ്ടെത്തിയിട്ടില്ല. ജാമ്യത്തില് ഇറങ്ങിയവര് തെളിവ് നശിപ്പിക്കും. ജിഷ്ണുവിന്റെ രക്തപ്പാടുള്ള മുറി പോലീസ് സീല് ചെയ്തില്ല. തൂങ്ങി കിടക്കുന്നത് കണ്ട കൊളുത്തും തുണിയും ഫോറന്സിക് പരിശോധനകള്ക്കായി അയച്ചില്ല. ഡി. വൈ. എസ്.പിയും സി.ഐയും സംഭവ സ്ഥലം സന്ദര്ശിച്ചില്ല. ജിഷ്ണുവിനെ ഇടിമുറിയില് കയറ്റി മര്ദ്ധിക്കണമെന്നു കൃഷ്ണദാസ് നിര്ദ്ദേശം നല്കിയിരുന്നതായി അറിഞ്ഞിട്ടു പോലും കൊലപാതക സാധ്യതയെ പറ്റി അന്വേഷിച്ചില്ലെന്നും മഹിജ കോടതിയെ അറിയിക്കും.
എഫ് ഐ ആര് രജിസ്റ്റര് ചെയ്യുന്നതിന് മുന്പ് ജിഷ്ണുവിന്റെ സഹപാടികളുടെയോ സുഹൃത്തുക്കളുടെയോ മൊഴി എടുത്തില്ല. മൂന്നു ദിവസത്തേക്ക് ആരോപണ വിധേയരെ അറസ്റ്റ് ചെയ്യാത്തതും ദുരൂഹം. സ്വാശ്രയ കോളേജുകള് ഇടിമുറികള് ആകുമ്ബോള് ജിഷ്ണു കേസില് മാതൃകാപരമായ നടപടി എടുക്കേണ്ടത് അനിവാര്യമാണെന്നും അപേക്ഷയില് ചൂണ്ടിക്കാട്ടും. ജിഷ്ണു പ്രണോയ് കേസ് സി ബി ഐ അന്വേഷിക്കുന്നതില് എതിര്പ്പില്ല എന്ന് സംസ്ഥാന സര്ക്കാര് നേരത്തെ സുപ്രീം കോടതിയെ അറിയിച്ചിരുന്നു. അതേസമയം കേസ് ഏറ്റെടുക്കുന്നതില് നിലപാടറിയിക്കാന് കോടതി നേരത്തെ നിര്ദ്ധേശിച്ചെങ്കിലും സിബിഐ ഇതുവരെയും നിലപാട് വ്യക്തമാക്കിയിട്ടില്ല.
https://www.facebook.com/Malayalivartha