വല്ല്യേട്ടന് പണികൊടുത്ത കൊച്ചേട്ടന്റെ വീട്ടില്‍ ചക്കളത്തില്‍പ്പോര്, പരസ്യ പ്രതികരണം നടത്താതെ സി.പി.എം കരുനീക്കുന്നു
സി.പി.ഐയെ അടിക്കാന്‍ സി.പി.എം ചീകി മിനുക്കിവെച്ച ചൂരലെടുത്ത് കെ.ഇസ് ഇസ്മയില്‍ പാര്‍ട്ടി സംസ്ഥാന സെക്രട്ടറി കാനം രാജേന്ദ്രനെ അടിച്ചു. മന്ത്രി തോമസ് ചാണ്ടിയുടെ രാജി വൈകിയില്ലെന്നും മന്ത്രിസഭാ യോഗത്തില്‍ നിന്നും മന്ത്രിമാര്‍ വിട്ടു നിന്നത് ശരിയായില്ലെന്നും ഇസ്മയില്‍ തുറന്നടിച്ചത് കാനത്തിനേറ്റ കനത്ത പ്രഹരമാണ്. ഗ്രൂപ്പ് പോരില്‍ ഇസ്മയിലിനെ മലര്‍ത്തിയടിച്ച് അജയ്യനായി വാഴുന്ന കാനത്തിന് പണി കൊടുക്കാന്‍ പതുങ്ങിയിരിക്കുകയായിരുന്നു ഇസ്മയില്‍. അതിനിടെയാണ് തോമസ് ചാണ്ടിയുടെ രാജി വിവാദവും അതിനെ ചൊല്ലി സി.പി.എമ്മുമായി തര്‍ക്കവും ഉണ്ടായത്. തോമസ് ചാണ്ടിയുടെ റിസോര്‍ട്ടിലേക്കുള്ള സീറോ ജെട്ടി റോഡ് ടാര്‍ ചെയ്യാന്‍ താന്‍ എം.പി ഫണ്ട് അനുവദിച്ചത് പാര്‍ട്ടി സംസ്ഥാന കൗണ്‍സില്‍ നിര്‍ദ്ദേശപ്രകാരമാണെന്ന് ഇസ്മയില്‍ എഫ്.ബി പോസ്റ്റും ഇട്ടതോടെ പാളയത്തില്‍ പടയായി.
ഇത് കണ്ട് കാനം പാര്‍ട്ടി അസിസ്റ്റന്റ് സെക്രട്ടറി പ്രകാശ് ബാബുവിനെ കളത്തിലിറക്കി പ്രതിരോധിച്ചു. ഇസ്മയിലിന്റെ വിമര്‍ശനം ജാഗ്രതകുറവ് മൂലമാണെന്നും അടുത്ത സംസ്ഥാന എക്‌സിക്യൂട്ടീവ് ഇക്കാര്യം ചര്‍ച്ച ചെയ്യുമെന്നും പ്രകാശ് ബാബു വ്യക്തമാക്കി. ഇതോടെ സി.പി.എം സി.പി.ഐ പോര് സി.പി.ഐയിലെ തമ്മിലടിയായി മാറുകയാണ്. ഇസ്മയിലിനെയും സി.ദിവാകരനെയും ഒതുക്കിയാണ് കാനവും സംഘവും പാര്‍ട്ടി പിടിച്ചെടുത്തത്. അതിന് മുമ്പ് ഇസ്മയിലും സി.ദിവാകരനും അടക്കമുള്ള മറ്റൊരു സംഘം പാര്‍ട്ടി കയ്യേറിവച്ചിരിക്കുകയായിരുന്നു. സി.കെ ചന്ദ്രപ്പന്‍ സെക്രട്ടറിയായതോടെയാണ് ഗ്രൂപ്പ് വൈരത്തിന് കുറച്ചെങ്കിലും അറുതി വന്നത്. ചന്ദ്രപ്പന്‍ മരിച്ചതോടെ അത് കൂടി.
മുന്നണിയില്‍ ചര്‍ച്ച ചെയ്യാതെ മന്ത്രിമാര്‍ വിട്ടുനിന്നത് സി.പി.ഐ എക്‌സിക്യൂട്ടീവ് ചര്‍ച്ച ചെയ്യുമെന്നും ഇസ്മയില്‍ പറഞ്ഞിരുന്നു. ഇതോടെ സി.പി.എം അദ്ദേഹത്തിനെ പിന്തുണച്ചെത്തി. ഇസ്മയിലിന്റെ പ്രസ്താവനയും എഫ്.ബി പോസ്റ്റും ദേശാഭിമാനി ഒന്നാം പേജിലാണ് നല്‍കിയിരിക്കുന്നത്. മുന്നണിയോഗം ചേരുമ്പോള്‍ ഇസ്മയിലിന്റെ വാക്കുകള്‍ ഉപയോഗിച്ച് സി.പി.ഐയെ മെരുക്കാമെന്ന തരത്തിലാണ് സി.പി.എം നീങ്ങുന്നത്. തങ്ങളെ ജനമധ്യത്തില്‍ താറടിച്ച് കയ്യടി നേടിയ സി.പി.ഐയെ, അവരുടെ നേതാക്കളെ തമ്മിലടിപ്പിച്ച് നാണം കെടുത്തുകയാണ് ലക്ഷ്യം.
https://www.facebook.com/Malayalivartha
