ദുര്ഗാ ദേവിയെ അധിക്ഷേപിക്കുന്നു എന്നാരോപിച്ചാണ് ചിത്രം ഒഴിവാക്കിയത്; ഹൈക്കോടതി അത് അനുവദിച്ചില്ല
ആവിഷ്ക്കാര സ്വാതന്ത്ര്യത്തിന്റെ കടയ്ക്കല് കത്തിവയ്ക്കാനുള്ള നരേന്ദ്രമോദി സര്ക്കാരിന്റെ ശ്രമങ്ങള്ക്ക് വലിയ തിരിച്ചടി. സെക്സി ദുര്ഗ എന്ന പേരിട്ടതിനെ തുടര്ന്ന് വിവാദമാവുകയും പിന്നീട് പേര് മാറ്റുകയും ചെയ്ത എസ്. ദുര്ഗ എന്ന സിനിമ ഗോവയില് നടക്കുന്ന രാജ്യാന്തര ചലച്ചിത്രമേളയില് പ്രദര്ശിപ്പിക്കണമെന്ന് കേരള ഹൈക്കോടതി ഉത്തരവിട്ടു. സിനിമ പനോരമയില് നിന്ന് ഒഴിവാക്കിയതിനെ തുടര്ന്ന് സംവിധായകന് സനല്കുമാര് ശശിധരന് കോടതിയെ സമീപിക്കുകയായിരുന്നു. ദുര്ഗാദേവിയെ അധിക്ഷേപിക്കുന്നെന്ന ആക്ഷേപം ഉന്നയിച്ച് സംസ്ഥാന ബി.ജെ.പി അധ്യക്ഷന് കുമ്മനം രാജശേഖരന് അടക്കമുള്ളവര് ചിത്രത്തിനെതിരെ രംഗത്ത് വന്നിരുന്നു.
നിരവധി രാജ്യാന്തര ചലച്ചിത്രമേളകളില് പ്രദര്ശിപ്പിച്ചിട്ടുള്ള എസ്. ദുര്ഗ എന്ന സെക്സി ദുര്ഗയ്ക്ക് അന്താരാഷ്ട്രതലത്തില് ഏറ്റവും ശ്രദ്ധേയമായ റോയിട്ടര്ഡാം ഫെസ്റ്റിവലില് പുരസ്ക്കാരം ലഭിച്ചിട്ടുണ്ട്. ഇന്ത്യയിലെ ഇന്നത്തെ സാഹചര്യത്തില് യുവാവിനും യുവതിക്കും രാത്രിയാത്രയില് നേരിടുന്ന പ്രശ്നങ്ങളാണ് സിനിമ പറയുന്നത്. ലൈംഗിക സ്വാതന്ത്ര്യത്തിനും ഒരുമിച്ച് ജീവിക്കാനും സഞ്ചരിക്കാനും ഉള്ള അവകാശത്തിന്മേലും തീവ്രശക്തികളും ഭരണകൂടവും കടന്നുകയറുന്നിടത്താണ് ഈ ചലച്ചിത്രത്തിന്റെ പ്രസക്തി. ചിത്രം പനോരമയില് നിന്ന് ഒഴിവാക്കിയതില് പ്രതിഷേധിച്ച് ജൂറി ചെയര്മാന് സുജോയ് ഘോഷ് രാജിവച്ചിരുന്നു. പിന്നാലെ രണ്ട് അംഗങ്ങളും രാജിവെച്ചു.
പുതിയ ചെയര്മാനെ രണ്ട് ദിവസം മുമ്പാണ് തീരുമാനിച്ചത്. അതിന് ശേഷമാണ് തിങ്കളാഴ്ച ഗോവയിലെ പനാജിയില് ഫിലിംഫെസ്റ്റിവല് ആരംഭിച്ചത്. ന്യൂഡ് എന്ന മറാത്തി സിനിമയും മേളയില് നിന്ന് ഒഴിവാക്കിയിരുന്നു. ഇതോടെ ഫെസ്റ്റിവല് ബഹിഷ്ക്കരിക്കണമെന്ന് നടി ശബാനാ ആസ്മി ആഹ്വാനം ചെയ്തിരുന്നു. സമാനമായ ഭീഷണിയായ സഞ്ജയ് ലീലാ ബന്സാലിയുടെ പത്മാവതിയും നേരിടുന്നത്. ചിത്രത്തിന്റെ പ്രദര്ശനാനുമതി തടയണമെന്ന ഹര്ജി കഴിഞ്ഞ ദിവസം സുപ്രിംകോടതി തള്ളിയിരുന്നു. സിനിമ റിലീസ് ചെയ്യണോ, വേണ്ടയോ എന്ന് സെന്സര്ബോര്ഡാണ് തീരുമാനിക്കേണ്ടതെന്നും അതില് കൈകടത്തുന്നില്ലെന്നും കോടതി വ്യക്തമാക്കിയിരുന്നു.
https://www.facebook.com/Malayalivartha