ബി.ജെ.പി കൗണ്സിലര്മാരെ ജാതിപ്പേര് വിളിച്ച് ആക്ഷേപിച്ചെന്ന പരാതിയില് തിരുവനന്തപുരം നഗരസഭാ മേയര് വി.കെ. പ്രശാന്തിനെതിരെ കേസ്
ബി.ജെ.പി കൗണ്സിലര്മാരെ ജാതിപ്പേര് വിളിച്ച് ആക്ഷേപിച്ചെന്ന പരാതിയില് തിരുവനന്തപുരം നഗരസഭാ മേയര് വി.കെ.പ്രശാന്തിനെതിരെ കേസെടുത്തു. പട്ടികജാതി അതിക്രമ നിയന്ത്രണ നിയമം അനുസരിച്ചാണ് മേയര് അടക്കമുള്ള നാല് പേര്ക്കെതിരെ മ്യൂസിയം പൊലീസ് കേസെടുത്തത്. സംഭവത്തെക്കുറിച്ച് അന്വേഷിച്ച് മൂന്നാഴ്ചക്കള്ക്കകം റിപ്പോര്ട്ട് നല്കണമെന്നാണ് ദേശീയ പട്ടികജാതി കമ്മിഷന് നല്കിയ നിര്ദ്ദേശം
അതേസമയം, ജാതിപ്പേര് വിളിച്ചെന്നും അസഭ്യം പറഞ്ഞെന്നും കാട്ടി എല്.ഡി.എഫ് കൗണ്സിലര്മാരും പരാതി നല്കി. എല്.ഡി.എഫ് കൗണ്സിലറായ സിന്ധു ശശിയെ തിങ്കളാഴ്ച പാളയം ബസ് സ്റ്റാന്ഡിലും സി. സത്യനെ ആറ്റുകാല് ആശുപത്രിക്ക് സമീപത്തും വച്ച് ബി.ജെ.പി അംഗങ്ങള് ജാതിപ്പേര് വിളിക്കുകയും അസഭ്യം പറയുകയും ചെയ്തെന്നാണ് പരാതി. ബി.ജെ.പി കൗണ്സിലര്മാരായ കരമന അജിത്, അനികുമാര്, ഗിരി, ജി.എസ്. മഞ്ജു, സിമി ജ്യോതിഷ് എന്നിവര്ക്കെതിരെയാണ് ദേശീയ, സംസ്ഥാന പട്ടികജാതി കമ്മിഷനുകള്ക്കും , സിറ്റി പൊലീസ് കമ്മിഷണര്ക്കും പരാതി നല്കിയത്. ഇതനുസരിച്ച് നാല് ബി.ജെ.പി കൗണ്സിലര്മാര്ക്കെതിരെയും സമാനമായ വകുപ്പുകള് ചുമത്തി കേസെടുത്തിട്ടുണ്ട്.
മെഡിക്കല് കോളേജാശുപത്രിയില് ചികിത്സയില് കഴിയുന്ന മേയറെ രണ്ട് നാള്ക്കകം ഡിസ്ചാര്ജ് ചെയ്യും. രണ്ടാഴ്ചത്തെ നിര്ബന്ധിത വിശ്രമം മെഡിക്കല് ബോര്ഡ് നിര്ദ്ദേശിച്ചിട്ടുണ്ട്. നഗരസഭയിലെ ആക്രമണത്തില് പങ്കെടുത്തെന്ന ആരോപണത്തെ തുടര്ന്ന് അറസ്റ്റ് ചെയ്ത ബി.ജെ.പി പ്രവര്ത്തകന് വലിയവിള മൈത്രി നഗര് എരുത്താട്ടുകോണം വീട്ടില് ആനന്ദിനെ റിമാന്ഡ് ചെയ്തു.
https://www.facebook.com/Malayalivartha