നടിയെ ആക്രമിച്ച കേസ്; നടിമാര്‍, നായകന്‍മാര്‍, വില്ലന്‍മാര്‍, സഹനടന്‍മാര്‍, സംവിധായകര്, നിര്‍മാതാക്കള്‍ അങ്ങനെ വലിയൊരു മാസാണ് കോടതി കയറുന്നത്
ലോകസിനിമയുടെ ചരിത്രത്തില്‍ ആദ്യമായായിരിക്കും ഒരു കേസിന്റെ വിചാരണയ്ക്ക് ഇത്രയധികം സിനിമാ പ്രവര്‍ത്തകര്‍ കോടതി കയറേണ്ടി വരുന്നത്. കൊച്ചിയില്‍ നടിയെ ആക്രമിച്ച കേസിന്റെ വിചാരണയില്‍ പ്രതിയായും സാക്ഷികളായും അന്‍പതിലധികം ചലച്ചിത്ര പ്രവര്‍ത്തകരാണ് അങ്കമാലി കോടതി കയറുന്നത്. നടന്‍ ദിലീപ് എട്ടാം പ്രതിയാണ്. നടി മഞ്ജുവാര്യര്‍ ഉള്‍പ്പെടെ അന്‍പതിലധികം സാക്ഷികള്‍. പരാതിക്കാരി മലയാളത്തിലെ ഒരു യുവനടി. സിനിമയുടെ ഏതാണ്ട് എല്ലാ മേഖലയിലും പ്രവര്‍ത്തിക്കുന്നവരെ ഈ കേസുമായി ബന്ധപ്പെട്ട് പൊലീസ് ചോദ്യം ചെയ്തിരുന്നു. സിനിമാ താരങ്ങളുടെ ഉള്‍പ്പെടെ ഡ്രൈവറായിരുന്നു പ്രധാന പ്രതിയായ പള്‍സര്‍ സുനി. ഇയാളുടെ കൂടെയുണ്ടായിരുന്ന മാര്‍ട്ടിനും ഡ്രൈവറാണ്.
നിര്‍മാതാവ് ആന്റോ ജോസഫും നടനും നിര്‍മാതാവുമായ ലാലുമാണ് നടി ആക്രമിക്കപ്പെട്ട സംഭവം പൊലീസിനെ അറിയിച്ചത്. ലാലിന്റെ പ്രൊഡക്ഷന്‍ കമ്പനിയിലെ വണ്ടിയില്‍ കൊച്ചിയിലേക്ക് വരുമ്പോഴാണ് നടിയെ ആക്രമിച്ച് തട്ടിക്കൊണ്ടു പോയത്. ദിലീപിനെയും സുഹൃത്തും സംവിധായകനുമായ നാദിര്‍ഷയെയും 13 മണിക്കൂറാണ് പൊലീസ് ആലുവ പൊലീസ് ക്ലബില്‍ ചോദ്യം ചെയ്തത്. പിന്നീട് നടന്‍ സിദ്ധിഖിന്റെ മൊഴി എടുത്തു. നടി കാവ്യാമാധവനെയും അമ്മ ശ്യാമളയെയും വീട്ടിലെത്തി ചോദ്യം ചെയ്തു. കാവ്യയോട് പൊലീസ് ക്ലബില്‍ ഹാജരാകാന്‍ ആവശ്യപ്പെട്ടെങ്കിലും വരാന്‍ പറ്റില്ലെന്ന് അറിയിച്ചിരുന്നു. ദിലീപ് പള്‍സര്‍ സുനിയെ പരിചയപ്പെടുന്നത് സൗണ്ട് തോമ എന്ന ചിത്രത്തിന്റെ ലൊക്കേഷനില്‍ വച്ചാണെന്നാണ് സുനിയുടെ മൊഴി. ഇതേ തുടര്‍ന്ന് ചിത്രത്തിന്റെ സംവിധായകന്‍ വൈശാഖിന്റെ മൊഴി രേഖപ്പെടുത്തിയിരുന്നു. അതിനും മുമ്പ് ദിലീപ് നിരപരാധിയാണെന്ന് വിശ്വസിക്കുന്നെന്ന് വ്യക്തമാക്കി വൈശാഖ് ഫെയിസ്ബുക്ക് പോസ്റ്റ് ഇട്ടിരുന്നു.
ദിലീപിന്റെ സുഹൃത്തായ റിമിടോമിയെ പൊലീസ് പല തവണയായി മണിക്കൂറുകളോളം ചോദ്യം ചെയ്തിരുന്നു. റിമിയുടെ രഹസ്യമൊഴിയും രേഖപ്പെടുത്തിയിട്ടുണ്ട്. ദിലീപിന്റെ സാമ്പത്തിക ഇടപാടുകളില്‍ റിമിക്ക് പങ്കുണ്ടെന്നാണ് മറ്റൊരു പ്രധാന ആക്ഷേപം. അമ്മയുടെ ജനറല്‍ സെക്രട്ടറിയായ ഇടവേള ബാബുവിനെയും ചോദ്യം ചെയ്തു. അമ്മ സംഘടിപ്പിച്ച താരനിശയുമായി ബന്ധപ്പെട്ട കാര്യങ്ങളാണ് പൊലീസ് ചോദിച്ചതെന്ന് താരം വ്യക്തമാക്കിയിരുന്നു. അമ്മയുടെ ഷോയുടെ റിഹേഴ്‌സലിനിടെ ദിലീപ് ആക്രമണത്തിനിരയായ നടിയുമായി വാക്ക്തര്‍ക്കത്തിലേര്‍പ്പെട്ടെന്ന് ചില താരങ്ങള്‍ വ്യക്തമാക്കിയതിനെ തുടര്‍ന്നായിരുന്നു ഇത്. ഇതുവരെയായിട്ടും ദിലീപിനെതിരെ ആക്രമണത്തിനിരയായ നടി യാതൊന്നും പറഞ്ഞിട്ടില്ല എന്നത് ശ്രദ്ധേയമാണ്.
നിര്‍മാതാവ് ലിബര്‍ട്ടി ബഷീര്‍ ദിലീപിന്റെ സിനിമാമേഖലയിലെ കുതന്ത്രങ്ങളെ കുറിച്ച് അടക്കം അന്വേഷണ സംഘത്തിന് വിവരങ്ങള്‍ നല്‍കിയിരുന്നു. മിമിക്രിക്കെതിരെ ചാനലില്‍ അഭിപ്രായം പറഞ്ഞതിന് ദിലീപ് തന്നെ ഭീഷണിപ്പെടുത്തുകയും നിരവധി സിനിമകളിലെ അവസരം ഇല്ലാതാക്കിയെന്നും നടന്‍ അനൂപ് ചന്ദ്രന്‍ പൊലീസിന് മൊഴി നല്‍കിയിരുന്നു. ദിലീപ് ഭാമയെ സിനിമകളില്‍ നിന്ന് ഒഴിവാക്കാന്‍ ഇടപെട്ടെന്ന് വാര്‍ത്തകള്‍ വന്നിരുന്നെങ്കിലും ഭാമ ഇത് നിഷേധിച്ചിരുന്നു. ദിലീപ് നായകനായ ജോര്‍ജേട്ടന്‍സ് പൂരത്തിലെ അഭിനേതാക്കള്‍ ഉള്‍പ്പെടെയുള്ളവര്‍ സാക്ഷികളുടെ പട്ടികയിലുണ്ട്. ദിലീപുമായി വളരെ അടുപ്പമുള്ള ധര്‍മജന്‍ ബോള്‍ഗാട്ടിയെയും ചോദ്യം ചെയ്തിരുന്നു.
https://www.facebook.com/Malayalivartha
