ഓഖിയെ തുടര്ന്ന് മാറ്റി വച്ച പടയൊരുക്കം നാളെ രാഹുല് ഗാന്ധി ഉദ്ഘാടനം ചെയ്യും
ഓഖി ചുഴലിക്കാറ്റ് ദുരന്തത്തെ തുടര്ന്ന് മാറ്റിവെച്ച 'പടയൊരുക്കം' ജാഥ സമാപനം വ്യാഴാഴ്ച നിയുക്ത കോണ്ഗ്രസ് അധ്യക്ഷന് രാഹുല് ഗാന്ധി ഉദ്ഘാടനം ചെയ്യും. വൈകീട്ട് നാലരക്ക് തിരുവനന്തപുരം സെന്ട്രല് സ്റ്റേഡിയത്തില് നടക്കുന്ന സമാപന സമ്മേളനത്തില് ലക്ഷംപേര് പങ്കെടുക്കുമെന്ന് സംഘാടകര് അറിയിച്ചു.
കേന്ദ്രസംസ്ഥാന സര്ക്കാറുകളുടെ ജനദ്രോഹ നയങ്ങള്ക്കെതിരെ യു.ഡി.എഫിന്റെ ആഭിമുഖ്യത്തില് പ്രതിപക്ഷനേതാവ് രമേശ് ചെന്നിത്തല നയിച്ച 'പടയൊരുക്കം' ജാഥ നവംബര് ഒന്നിന് കാസര്കോട് കുമ്പളയില്നിന്ന് ആരംഭിച്ച് 30ന് തിരുവനന്തപുരം വെള്ളറടയിലാണ് സമാപിച്ചത്. സമാപനത്തോടനുബന്ധിച്ച് ഡിസംബര് ഒന്നിന് നടത്താന് നിശ്ചയിച്ചിരുന്ന ശംഖുംമുഖത്ത് നടത്താനിരുന്ന സമ്മേളനം ഓഖി ദുരന്തത്തിന്റെ പശ്ചാത്തലത്തില് മാറ്റിവെക്കുകയായിരുന്നു.
രാഹുല് ഗാന്ധിയുടെ സൗകര്യം കൂടി പരിഗണിച്ച് കഴിഞ്ഞയാഴ്ച ചേര്ന്ന യു.ഡി.എഫ് യോഗമാണ് മാറ്റിവെച്ച സമ്മേളനം 14ന് നടത്താന് നിശ്ചയിച്ചത്. സമാപന സമ്മേളനത്തില് കെ.പി.സി.സി പ്രസിഡന്റ് എം.എം. ഹസന് അധ്യക്ഷതവഹിക്കും. രമേശ് ചെന്നിത്തല മുഖ്യപ്രഭാഷണം നടത്തും.വ്യാഴാഴ്ച രാവിലെ 11ന്തിരുവനന്തപുരം വിമാനത്താവളത്തില് എത്തുന്ന രാഹുല് ഗാന്ധി അവിടെനിന്ന് ഓഖി ദുരന്തത്തില് നിരവധിപേര് മരിച്ച പൂന്തുറയും വിഴിഞ്ഞവും ആദ്യം സന്ദര്ശിക്കും. വൈകീട്ട് മൂന്നിന് പൊലീസ് ഗ്രൗണ്ടില് മുന്മന്ത്രി ബേബിജോണ് ജന്മശതാബ്ദി ആഘോഷം ഉദ്ഘാടനം ചെയ്യും. യു.ഡി.എഫ് സമ്മേളനത്തിലും പങ്കെടുത്തശേഷം രാഹുല് ഗാന്ധി ഡല്ഹിക്ക് മടങ്ങും.
https://www.facebook.com/Malayalivartha