വനത്തില് കുടുങ്ങിയ യുവാക്കളെ രണ്ടുദിവസത്തിനുശേഷം കണ്ടെത്തി
വെള്ളച്ചാട്ടം കാണാന് പോയി വനത്തില് കുടുങ്ങിയ യുവാക്കളെ രണ്ടുദിവസത്തിനുശേഷം കണ്ടെത്തി. ചാവക്കാട് തിരുവത്ര കടപ്പുറം പഞ്ചവടി വീട്ടില് മൂര്ത്തിയുടെ മകന് ഉണ്ണികൃഷ്ണന് (26), വടക്കേക്കാട് ചിരിയങ്കണ്ടത്ത് സിറിള് (24) എന്നിവരെയാണ് ചീരക്കുണ്ടില്നിന്ന് 12 കിലോമീറ്റര് അകലെ വനത്തിനുള്ളില് കണ്ടെത്തിയത്.
ഇലഞ്ഞിപ്പാറ വെള്ളച്ചാട്ടത്തിന് മൂന്ന് കിലോമീറ്റര് അകലെയാണിത്. ഞായറാഴ്ച ഉച്ചകഴിഞ്ഞാണ് ഇവര് ബൈക്കില് വെള്ളച്ചാട്ടം കാണാന് എത്തിയത്. വനത്തില് കയറിയ ഇവര് ആദ്യം ഓലക്കയം വെള്ളച്ചാട്ടം കണ്ടു. പിന്നീട് നാല് കിലോമീറ്റര് കൂടി കയറി ഇലഞ്ഞിപ്പാറ വെള്ളച്ചാട്ടത്തിന് അരികില് എത്തിയപ്പോഴേക്കും ഇരുട്ട് പരക്കാന് തുടങ്ങി.
അതോടെ തിരിച്ചിറങ്ങി. കുറച്ച് ദൂരം പിന്നിട്ടപ്പോഴാണ് വഴിതെറ്റിയത്. അതിനകം സിറിള് തളര്ന്നിരുന്നു. മറ്റു മാര്ഗങ്ങള് ഇല്ലാത്തതിനാല് അവര് രാത്രി പാറയുടെ മുകളില് കഴിഞ്ഞു. തിങ്കളാഴ്ച വീട്ടിലേക്ക് ഫോണില് ബന്ധപ്പെടാന് ശ്രമിച്ചെങ്കിലും സിഗ്നല് കിട്ടിയില്ല. ഉച്ചകഴിഞ്ഞാണ് ഫോണില് കിട്ടിയത്. ഉടനെ സിറിള് സഹോദരിയെ വിളിച്ച് വിവരം അറിയിച്ചു. വൈകാതെ ഫോണിലെ ചാര്ജ് കഴിഞ്ഞു. കൊണ്ടുവന്ന ഭക്ഷണം രാത്രിയോടെ തീര്ന്നു. തിങ്കളാഴ്ച പകല് മുഴുവന് വെള്ളം കുടിച്ചാണ് കഴിഞ്ഞത്. പകലും രാത്രിയും തിരച്ചിലുകാരുടെ ശബ്ദം കേട്ടെങ്കിലും ദിശ കണ്ടെത്താന് കഴിഞ്ഞില്ലെന്ന് അവര് പറഞ്ഞു. ചൊവ്വാഴ്ച വൈകീട്ട് മൂന്നോടെയാണ് വരന്തരപ്പിള്ളി സഹകരണ ബാങ്ക് പ്രസിഡന്റ് ബാവയുടെ നേതൃത്വത്തിലുള്ള സംഘം ഇവരെ വനത്തില് കണ്ടെത്തിയത്. ഇവരുടെ സഹായത്തോടെ ചീരക്കുണ്ടില് എത്തി.
അപ്പോഴേക്ക് പുത്തൂര് പഞ്ചായത്ത് പ്രസിഡന്റ് ഉള്പ്പെടെയുള്ളവര് ഭക്ഷണവുമായി കാത്തിരിക്കുകയായിരുന്നു. തുടര്ന്ന് ഒല്ലൂര് പൊലീസ് ഇവരെ ജില്ല ആശുപത്രിയില് എത്തിച്ചു. വൈദ്യപരിശോധനക്ക് ശേഷം ഒല്ലൂര് സ്റ്റേഷനില് എത്തിച്ച് മൊഴിയെടുത്തു.
തുടര്ന്ന് വനം വകുപ്പ് ഉദ്യോഗസ്ഥര് മൊഴിയെടുത്തു. വനത്തില് അതിക്രമിച്ച് കയറിയതിന് ഇവര്ക്കെതിരെ കേസെടുക്കും. ഇവരെ കാണാതായെന്ന പരാതിയുള്ളതിനാല് കോടതിയില് ഹാജരാക്കി ബന്ധുക്കള്ക്കൊപ്പം വിട്ടു.ഹ
https://www.facebook.com/Malayalivartha