മലയാള സിനിമയിലെ സ്ത്രീകൾ ചേർന്ന് രൂപീകരിച്ച വിമന്‍ ഇന്‍ സിനിമ കളക്ടീവ് എന്ന സംഘടനക്കെതിരെ കോണ്‍ഗ്രസ്സ് നേതാവ് പിസി വിഷ്ണുനാഥ്. സുരഭി ലക്ഷ്മിയെ ഐ.എഫ്‌.എഫ്.കെ അവഗണിച്ച സംഭവത്തില്‍ ഡബ്ല്യൂസിസി പ്രതികരിക്കാത്തതാണ് ഈ വിമര്‍ശനത്തിന് കാരണമായത്. സിനിമയിലെ സ്ത്രീകളുടെ ഈ സംഘടനയ്ക്ക് വിമന്‍ ഇന്‍ സിനിമ കളക്ടീവ് എന്നല്ല, മറിച്ച്‌ വിമന്‍ ഇന്‍ സിനിമ സെലക്ടീവ് എന്നാണ് പേരിടേണ്ടതെന്നും അദ്ദേഹം പറഞ്ഞു.

വിവാദമുണ്ടായപ്പോള്‍ സംഘടന പോലും ഈ പ്രശ്നം ഉന്നയിച്ചില്ല. വിമന്‍ ഇന്‍ സിനിമ കളക്ടീവ് ആയിരുന്നുവെങ്കില്‍ ഈ പ്രശ്നത്തിന് അവര്‍ ഒരു പരിഹാരം കാണുമായിരുന്നു. മാത്രമല്ല സിനിമയിലെ സ്ത്രീ പ്രാതിനിധ്യത്തെക്കുറിച്ച്‌ ചലച്ചിത്ര മേളയില്‍ ഓപ്പണ്‍ ഫോറം നടന്നു. അവിടെ പോലും ദേശീയ പുരസ്ക്കാരം ലഭിച്ച സ്ത്രീക്ക് ഒരു കസേര കൊടുത്തില്ല. ഈ സംഘടനയെക്കുറിച്ച്‌ തനിക്ക് നല്ല പ്രതീക്ഷയുണ്ടായിരുന്നുവെന്നും എന്നാലിപ്പോള്‍ അതില്ലെന്നും വിഷ്ണുനാഥ് വ്യക്തമാക്കി.