മന്ത്രിയായിരിക്കെ എ.കെ ശശീന്ദ്രന്‍ ഔദ്യോഗിക വസതിയില്‍ വച്ച് മാധ്യമപ്രവര്‍ത്തകയെ പീഡിപ്പിക്കാന്‍ ശ്രമിച്ചെന്ന കേസില്‍ ജാമ്യം അനുവദിച്ചു. തിരുവനന്തപുരം സിജെഎം കോടതിയില്‍ ഹാജരായ ശശീന്ദ്രന് ജാമ്യം അനുവദിച്ചത്. ശശീന്ദ്രന്റെ രാജിക്കിടയാക്കിയ ഫോണ്‍ കെണി കേസിലെ പ്രതിയായ മാധ്യമപ്രവര്‍ത്തക നല്‍കിയ പരാതിയിലാണ് കോടതി നേരിട്ട് കേസെടുത്തത്. കേസ് പിന്‍വലിക്കാനായി നേരത്തെ യുവതി ഹൈക്കോടതിയെ സമീപിച്ചിരുന്നു. അനുമതി നല്‍കാത്തതിനെ തുടര്‍ന്ന് യുവതി അപേക്ഷ പിന്‍വലിച്ചു. ഇതോടെ ശശീന്ദ്രന്റെ മന്ത്രിസഭാ പുനപ്രവേശനത്തിന് വഴിയടഞ്ഞിരുന്നു.

പരാതി പിന്‍വലിക്കാമെന്ന് ശശീന്ദ്രനുമായി കോടതിക്ക് പുറത്ത് നടത്തിയ ഒത്ത് തീര്‍പ്പ് ചര്‍ച്ചയില്‍ മാധ്യമപ്രവര്‍ത്തക സമ്മതിച്ചിരുന്നു. അതനുസരിച്ച് യുവതി കോടതിയ സമീപിച്ചെങ്കിലും കേസ് നീട്ടിവെച്ചു. പിന്നീട് പരിഗണിച്ചപ്പോഴാണ് നിലപാട് മാറ്റിയത്. അതില്‍ ദുരൂഹതയുണ്ടെന്നാണ് രാഷ്ട്രീയ നിരീക്ഷകര്‍ വിലയിരുത്തുന്നത്. എന്‍.സി.പിയിലെ ഗ്രൂപ്പ് കളിയുടെ ഭാഗമാണിതെന്നും ആക്ഷേപമുണ്ട്. ഫോണ്‍കെണിയുടെ വാര്‍ത്ത മംഗളം പൂറത്ത് കെണ്ടുവന്ന അന്ന് തന്നെ ശശീന്ദ്രന്‍ രാജിവച്ചിരുന്നു. പിന്നീട് ചാനല്‍ സി.ഇ.ഒ അടക്കം അഞ്ച് പേര്‍ അറസ്റ്റിലായിരുന്നു. അവര്‍ക്ക് ജാമ്യം കിട്ടിയ ശേഷം സര്‍ക്കാര്‍ ജുഡീഷ്യല്‍ അന്വേഷണം പ്രഖ്യാപിച്ചിരുന്നു.

ജുഡീഷ്യല്‍ അന്വേഷണവുമായി ആരോപണ വിധേയരായ മാധ്യമപ്രവര്‍ത്തകര്‍ സഹകരിച്ചില്ല. ശശീന്ദ്രനെതിരെ മതിയായ തെളിവുകളോ മൊഴികളോ ലഭിക്കാത്തതിനാല്‍ അദ്ദേത്തിന് അന്വേഷണ കമ്മിഷന്‍ ക്ലീന്‍ ചിറ്റ് നല്‍കി. ഇതോടെ മന്ത്രിസഭാ പുന: പ്രവേശനത്തിനുള്ള സാധ്യതകളും തെളിഞ്ഞു. എന്നാല്‍ തന്നെ പീഡിപ്പിക്കാന്‍ ശ്രമിച്ചെന്ന് ആരോപിച്ച് യുവതി നല്‍കിയ കേസ് ശശീന്ദ്രന് കുരുക്കായി. കേസില്‍ ജാമ്യം ലഭിച്ചെങ്കിലും തീര്‍പ്പാക്കാതെ മന്ത്രിക്കസേരയിലെത്താന്‍ കഴിയില്ല.