പതിനാലുകാരനായ ജിത്തുജോബിനെ അമ്മ കൊന്ന് കത്തിച്ച ശേഷം മൃതദേഹത്തിന്റെ ഭാഗങ്ങള് മുറിച്ച് മാറ്റിയെന്ന് പോസ്റ്റ്മോര്ട്ടം റിപ്പോര്ട്ട്
കൊല്ലം കുണ്ടറയില് അമ്മ മകനെ കൊലപ്പെടുത്തിയ സംഭവത്തില് ഞെട്ടിക്കുന്ന വിവരങ്ങള് പോസ്റ്റ്മോര്ട്ടം റിപ്പോര്ട്ടിലൂടെ പുറത്ത് വന്നു. പതിന്നാലുകാരനായ ജിത്തുജോബിനെ കത്തിച്ച ശേഷം മൃതദേഹത്തിന്റെ ഭാഗങ്ങള് മുറിച്ച് മാറ്റിയതാണെന്ന് റിപ്പോര്ട്ടില് വ്യക്തമാക്കുന്നു. അസ്ഥിയടക്കം കത്തിച്ചതായി തിരുവനന്തപുരം മെഡിക്കല് കോളജിലെ ഡോക്ടര്മാര് കണ്ടെത്തി. കയ്യിലും കാലിലും കഴുത്തിലും വെട്ടേറ്റനിലയിലും പാദങ്ങള് മുറിച്ചുമാറ്റിയ നിലയിലും ഒരു കാലിന്റെ മുട്ടിന് താഴെ വെട്ടിനുറുക്കിയ അവസ്ഥയിലുമാണ് കണ്ടെത്തിയത്. മകനെ ഷാള് ഉപയോഗിച്ച് കൊന്ന് കത്തിച്ച ശേഷം ശരീരഭാഗങ്ങള് മുറിച്ച് മാറ്റിയതാണെന്ന് അമ്മ ജയ മൊഴിനല്കിയിരുന്നു. അത് ശരിവയ്ക്കുന്നതാണ് പോസ്റ്റ്മോര്ട്ടം റിപ്പോര്ട്ട്. പൊലീസ് ആദ്യം ഇത് വിശ്വസിച്ചിരുന്നില്ല.
കഴിഞ്ഞ തിങ്കളാഴ്ച രാത്രിയാണ് ജിത്തുവിനെ കാണാതായത്. സ്കെയില് വാങ്ങാന് 50 രൂപയുമായി കടയില് പോയ ജിത്തു മാത്രി വൈകിയും വരാത്തതിനെ തുടര്ന്ന് പിതാവ് ചാത്തന്നൂര് പൊലീസില് പരാതി നല്കിയിരുന്നു. കഴിഞ്ഞ ദിവസം മൃതദേഹം കുടുംബവീടിനോട് ചേര്ന്നുള്ള പുരയിടത്തില് കത്തിക്കരിഞ്ഞ നിലയില് കണ്ടെത്തുകയായിരുന്നു. സംഭവത്തില് അമ്മ ജയ കുറ്റസമ്മതം നടത്തിയെങ്കിലും ശാസ്ത്രീയ അന്വേഷണത്തിലൂടെ മാത്രമേ കൊലപാതക കാരണം കണ്ടെത്താനാകൂ എന്ന നിലപാടിലായിരുന്നു പൊലീസ്. സംഭവത്തില് കൂടുതല് പേര് ഉള്പ്പെട്ടിട്ടുണ്ടോ എന്ന് തീര്ച്ചപ്പെടുത്താനുമായിട്ടില്ല.
കത്തിച്ച ശേഷം മൃതദേഹം വീടിന് പരിസരത്ത് കൊണ്ടിട്ടതാകാമെന്നാണ് പൊലീസ് സംശയിച്ചത്. അക്കാര്യം പോസ്റ്റ്മോര്ട്ടം റിപ്പോര്ട്ടില് സ്ഥിരീകരിച്ചു. മകന്റെ ശരീരത്തില് പിശാച് കൂടിയിട്ടുണ്ടെന്നും അതിനാലാണ് കൊലപ്പെടുത്തിയതെന്നുമാണ് ഏറ്റവും ഒടുവില് ജയ നല്കിയിരിക്കുന്ന മൊഴി. മകനെ കൊലപ്പെടുത്തിയതില് തനിക്ക് ദു:ഖമില്ലെന്നും ഇവര് മൊഴി നല്കിയിട്ടുണ്ട്. ഭര്തൃമാതാവുമായി തര്ക്കിച്ചതിനെ തുടര്ന്ന് മകനെ കൊലപ്പെടുത്തിയെന്നായിരുന്നു കഴിഞ്ഞ ദിവസം ഇവര് മൊഴി നല്കിയിരുന്നത്. ജിത്തുവിന്റെ ശരീരഭാഗങ്ങള് പൂര്ണമായും കണ്ടെടുക്കാന് പൊലീസിന് കഴിഞ്ഞിട്ടില്ല. ഇതിനെ തുടര്ന്ന് പൊലീസ് വീട്ടുപരിസരത്ത് വിശദമായ പരിശോധന തുടരുകയാണ്. ശരീരഭാഗങ്ങള് വീട്ടുപരിസരത്ത് തന്നെ ഒളിപ്പിച്ചെന്നാണ് ജയമോള് മൊഴി നല്കിയിരിക്കുന്നത്.
https://www.facebook.com/Malayalivartha