ശ്രീജിവിന്റെ മരണത്തില്‍ ആരോപണവിധേയരായ പൊലീസുകാര്‍ക്കെതിരെ നടപടി സ്വീകരിക്കാന്‍ ഹൈക്കോടതിയില്‍ നിലവിലുള്ള സ്റ്റേ നീക്കണമെന്ന് സര്‍ക്കാര്‍
ശ്രീജിവിന്റെ മരണത്തിന് ഉത്തരവാദികളായ പൊലീസുകാര്‍ക്കെതിരെ നടപടി സ്വീകരിക്കാന്‍ സര്‍ക്കാര്‍ നടപടി തുടങ്ങി. ഇതിന്റെ ഭാഗമായി പൊലീസുകാര്‍ ഹൈക്കോടതിയില്‍ നിന്ന് വാങ്ങിയ സ്റ്റേ നീക്കണമെന്ന് ആവശ്യപ്പെട്ട് സര്‍ക്കാര്‍ ഹൈക്കോടതിയെ സമീപിച്ചു. ആരോപണവിധേയരായ പൊലീസുകാര്‍ക്കെതിരെ നടപടി സ്വീകരിക്കണമെന്ന് പൊലീസ് കംപ്ലയിന്റ് അതോറിട്ടി നിര്‍ദ്ദേശിച്ചിരുന്നു. ഇതിനെതിരെ സി.ഐ ഗോപകുമാര്‍ ഹൈക്കോടതിയെ സമീപിച്ചിരുന്നു. സിംഗിള്‍ ബെഞ്ച് പൊലീസ് കംപ്ലയിന്റ് അതോറിട്ടിയുടെ നിര്‍ദ്ദേശം സ്റ്റേ ചെയ്തു. ഇതിനെതിരെ സര്‍ക്കാര്‍ ഹൈക്കോടതിയില്‍ അപ്പീല്‍ നല്‍കിയില്ല. എന്നാല്‍ ശ്രീജിവിന്റെ സഹോദരന്‍ ശ്രീജിത്ത് എഴുനൂറ്റി അറുപതിലധികം ദിവസമായി നടത്തിവരുന്ന നിരാഹം ജനശ്രദ്ധയാകര്‍ഷിച്ചതോടെ സര്‍ക്കാര്‍ സ്റ്റേ നീക്കാന്‍ നിര്‍ബന്ധിതരാവുകയായിരുന്നു.
സര്‍ക്കാര്‍ നല്‍കിയ ഹര്‍ജി കോടതി താമസിക്കാതെ പരിഗണിക്കും. ശ്രീജിവിന്റെ മരണം സി.ബി.ഐ അന്വേഷിക്കണമെന്ന് ആവശ്യപ്പെട്ട് അമ്മ രമണി പ്രമീള ഹൈക്കോടതിയില്‍ ഹര്‍ജി നല്‍കിയിട്ടുണ്ട്. ഇക്കാര്യത്തില്‍ കോടതി സര്‍ക്കാരിന്റെയും സി.ബി.ഐയുടെയും വിശദീകരണം തേടിയിരുന്നു. സര്‍ക്കാര്‍ സി.ബി.ഐ അന്വേഷണത്തെ എതിര്‍ത്തില്ല. അതിന് ശേഷമാണ് പൊലീസുകാര്‍ക്കെതിരെ നടപടി എടുക്കരുതെന്ന് ആവശ്യപ്പെട്ടുള്ള സ്റ്റേ നീക്കണമെന്ന് ഹര്‍ജി നല്‍കാന്‍ ഒരുങ്ങുന്നത്. ഇപ്പോള്‍ ചവറ സി.ഐ ആണ് ഗോപകുമാര്‍. മറ്റൊരു ഉദ്യോഗസ്ഥനായ ഫിലിപ്പോസ് നെയ്യാറ്റിന്‍കര സ്റ്റേഷനിലെ ഗ്രേഡ് എസ്.ഐയാണ്.
ആരോപണവിധേയരായ പൊലീസുകാരുടെ ശബളത്തില്‍ നിന്ന് 10 ലക്ഷം രൂപ ശ്രീജിവിന്റെ വീട്ടുകാര്‍ക്ക് നല്‍കണമെന്നാണ് പൊലീസ് കംപ്ലയിന്റ് അതോറിട്ടി നിര്‍ദ്ദേശിച്ചത്. കോടതി അത് സ്റ്റേ ചെയ്തതോടെ മനുഷ്യാവകാശ കമ്മിഷന്‍ ഇടപെട്ടാണ് ശ്രീജിവിന്റെ അമ്മ രമണി പ്രമീളയ്ക്കും സഹോദരന്‍ ശ്രീജിത്തിനും 10 ലക്ഷം രൂപ സര്‍ക്കാരില്‍ നിന്ന് അനുവദിപ്പിച്ചത്. മരണവുമായി ബന്ധപ്പെട്ട പോസ്റ്റ്‌മോര്‍ട്ടം റിപ്പോര്‍ട്ടും മറ്റും മനുഷ്യാവകാശ കമ്മീഷന്‍ ആവശ്യപ്പെട്ടെങ്കിലും പൊലീസ് നല്‍കിയിരുന്നില്ല.
https://www.facebook.com/Malayalivartha
