വടയമ്പാടി ഭൂ അവകാശ സമരം: മേഖലയില് മാവോയിസ്റ്റ് സാന്നിധ്യം തിരിച്ചറിഞ്ഞതുമായി ബന്ധപ്പെട്ട് പൊലീസ് വ്യാപക പരിശോധന തുടങ്ങി
വടയമ്പാടി ഭജന മഠത്തെ ദളിത് ഭൂ അവകാശ സമരവുമായി ബന്ധപ്പെട്ട് മേഖലയില് മാവോയിസ്റ്റ് സാന്നിധ്യം തിരിച്ചറിഞ്ഞതുമായി ബന്ധപ്പെട്ട് പൊലീസ് വ്യാപക പരിശോധന തുടങ്ങി. മേഖലയില് സായുധ പൊലീസിനെ വിന്യസിച്ചു. സമീപത്തെ വീടുകളില് പരിചയക്കാരല്ലാത്ത നിരവധി പേര് താമസിക്കുന്നതായി പൊലീസ് പറയുന്നു. ഇവരെ കണ്ടെത്താനുള്ള നീക്കമാണ് പൊലീസ് നടത്തുന്നത്.
കഴിഞ്ഞ ഞായറാഴ്ച പുലര്ച്ചെ സമര പന്തല് പൊളിച്ച് നീക്കിയത് സംഘര്ഷത്തില് കലാശിച്ചിരുന്നു. സമര വേദിയ്ക്കടുത്തു നിന്നും മാവേയിസ്റ്റുകളെന്നു സംശയത്താല് രണ്ട് പേരെ പൊലീസ് പിടികൂടിയിട്ടുമുണ്ട്. കണ്ണൂര് പയ്യന്നൂര് ചിറക്കുണ്ടില് അഭിലാഷ്(28), മൂവാറ്റുപുഴ വൈശാഖം അനന്തു(22) എന്നിവരെയും പൊലീസിന്റെ കൃത്യ നിര്വ്വഹണം തടസപ്പെടുത്തിയതിനു വടയമ്പാടി ഐവേല് ശശിധരനെ(41)യുമാണ് അറസ്റ്റ് ചെയ്തത്. അഭിലാഷ് നിറ്റ ജലാറ്റിന് ആക്രമണ കേസിലെ പ്രതിയാണെന്നും അനന്തു മാവോയിസ്റ്റ് വിദ്യാര്ഥി സംഘടനാ ഭാരവാഹിയാണെന്നും പൊലീസ് പറയുന്നു.
ഭജന മഠത്ത് റവന്യൂ,പഞ്ചായത്ത് വകുപ്പുകള് സംയുക്തമായി സമര പന്തല് പൊളിച്ചു നീക്കിയതിന് പിന്നാലെ ദുരൂഹ സാഹചര്യത്തില് കണ്ടെത്തിയ ഇവരെ പോലീസ് പിടികൂടുകയായിരുന്നു. സമര പന്തല് പൊളിച്ച് നീക്കുന്നതിനെതിരെ പ്രതിഷേധവുമായെത്തിയ എട്ട് സമര സമിതി പ്രവര്ത്തരെ അറസ്റ്റു ചെയ്ത് നീക്കിയ ശേഷമായിരുന്നു പൊലീസ് നടപടി. വടയമ്പാടി ഭജന മഠത്തെ ഒന്നരയേക്കറോളം വരുന്ന റവന്യൂ പുറമ്പോക്ക് ഭൂമി എന്.എസ്.എസിന് പതിച്ച് നല്കിയെന്നാരോപിച്ചാണ് സമര സമിതി രൂപീകരിച്ച് സമരം തുടങ്ങിയത്. ദളിത് കുടംബങ്ങള് ഉപയോഗിച്ചിരുന്ന പൊതുമൈതാനമാണ് കൈയ്യേറിയതെന്ന് സമര സമിതി ആരോപിക്കുന്നു. ഇതിനെ തുടര്ന്ന് വിവിധ ദളിത് സംഘടനകളുടെ നേതൃത്വത്തില് ദളിത് ഭൂ അവകാശ സമര മുന്നണി രൂപീകരിച്ച് മൈതാനത്തിന് മുന്നില് കുടില് കെട്ടി സമരമാരംഭിക്കുകയും കഴിഞ്ഞ അംബേദ്ക്കര് ജന്മദിനത്തില് മൈതാനത്തിന് ചുറ്റും കെട്ടിയ മതില് സമരക്കാര് പൊളിക്കുകയും ചെയ്തു. ഇതിന് ശേഷം വിവിധ തുറകളില് നടത്തിയ ചര്ച്ചകളെ തുടര്ന്ന് മൈതാനം പൊതു ഉടമസ്ഥതിയിലാക്കാന് തീരുമാനിച്ചതോടെ സമരം അവസാനിപ്പിക്കുകയായിരുന്നു.
ഇതിനിടെ എന്.എസ്.എസ് വക ഭജന മഠം ക്ഷേത്രത്തിലെ ഉത്സവവുമായി ബന്ധപ്പെട്ട് സമരപന്തല് പൊളിച്ച് നീക്കണമെന്ന് കാണിച്ച് കഴിഞ്ഞ ദിവസം എന്.എസ്.എസ് നേതൃത്വം ജില്ലാ കളക്ടര്ക്ക് പരാതി നല്കി. അധികതൃര് ഇരു വിഭാഗങ്ങളുമായി ചര്ച്ച നടത്തിയെങ്കിലും പരിഹാരമായില്ല. ഇതോടെ ദളിത് ഭൂ സമര മുന്നണി സമരപന്തലില് ശനിയാഴ്ച രാവിലെ മുതല് അനിശ്ചിത കാല നിരാഹാരം ആരംഭിച്ചു.
സമരം തുടരവേയാണ് ഞായറാഴ്ച പുലര്ച്ചെ മൂവാറ്റുപുഴ ഡി.വൈ.എസ് പിയുടെ നേതൃത്വത്തിലെത്തിയ ഉദ്യോഗസ്ഥ സംഘം പന്തല് പൊളിച്ച് നീക്കിയത്.
https://www.facebook.com/Malayalivartha