ബാലനീതി നിയമവ്യവസ്ഥകള്‍ അനുസരിച്ച് അനാഥാലയങ്ങള്‍ രജിസ്റ്റര്‍ ചെയ്യണമെന്ന നിര്‍ദേശം നടപ്പാക്കാന്‍ സര്‍ക്കാര്‍ തീരുമാനം, 516 അനാഥാലയങ്ങള്‍ക്ക് പൂട്ട് വീഴുന്നു
ബാലനീതി നിയമവ്യവസ്ഥകള്‍ അനുസരിച്ച് അനാഥാലയങ്ങള്‍ രജിസ്റ്റര്‍ ചെയ്യണമെന്ന നിര്‍ദേശം നടപ്പാക്കാന്‍ സര്‍ക്കാര്‍ തീരുമാനിച്ചതോടെ, സംസ്ഥാനത്തെ 516 അനാഥാലയങ്ങള്‍ക്കുകൂടി പൂട്ട് വീഴുന്നു. സുപ്രീംകോടതിയാണ് ബാലനീതി നിയമപ്രകാരം അനാഥാലയങ്ങള്‍ രജിസ്റ്റര്‍ ചെയ്യണമെന്ന് ഉത്തരവിട്ടത്. ഇതിനു പിന്നാലെ നിയമത്തിലെ കടുത്ത വ്യവസ്ഥകള്‍ അനുസരിച്ച് മുന്നോട്ടുപോകാന്‍ കഴിയില്ലെന്ന് കാട്ടി 169 അനാഥാലയങ്ങള്‍ പ്രവര്‍ത്തനം അവസാനിപ്പിച്ചിരുന്നു. 516 എണ്ണം പൂട്ടാന്‍ ഓര്‍ഫനേജ് കണ്‍ട്രോള്‍ ബോര്‍ഡിന് അപേക്ഷ നല്‍കി. ഇതിലൂടെ 12,000ത്തിലധികം കുട്ടികള്‍ വീണ്ടും 'അനാഥരാകും'.
സംസ്ഥാനത്തെ സാഹചര്യം കണക്കിലെടുത്ത് പ്രത്യേക നയം രൂപവത്കരിക്കണമെന്ന ആവശ്യം സ്ഥാപനങ്ങള്‍ മുന്നോട്ടുവെച്ചെങ്കിലും രജിസ്‌ട്രേഷന്‍ നടപടിയുമായി മുന്നോട്ടുപോകാനാണ് ഓര്‍ഫനേജ് കണ്‍ട്രോള്‍ ബോര്‍ഡിന്റെ തീരുമാനം. ഇതിന്റെ തുടര്‍ച്ചയായി ശിശുസംരക്ഷണ സ്ഥാപനങ്ങള്‍ വനിതശിശു വികസന വകുപ്പിന്റെ ജില്ല ഓഫിസുകളില്‍ മാര്‍ച്ച് 31ന് മുമ്പ് രജിസ്റ്റര്‍ ചെയ്യണമെന്ന് കാട്ടി വകുപ്പ് സ്‌പെഷല്‍ സെക്രട്ടറി െവള്ളിയാഴ്ച പത്രങ്ങളില്‍ പരസ്യവും നല്‍കി.
രജിസ്റ്റര്‍ ചെയ്യാത്തവര്‍ക്കെതിരെ നടപടി സ്വീകരിക്കുമെന്നും എല്ലാ സ്ഥാപനങ്ങളും കുട്ടികളെ സംബന്ധിച്ച വിശദവിവരങ്ങള്‍ ജില്ല ഓഫിസുകളില്‍ അടിയന്തരമായി സമര്‍പ്പിക്കണമെന്നും പരസ്യത്തില്‍ വ്യക്തമാക്കിയിട്ടുണ്ട്. എന്നാല്‍, നിലവിലെ വ്യവസ്ഥയില്‍ തുടരാന്‍ കഴിയില്ലെന്ന നിലപാടിലാണ് സ്ഥാപനങ്ങള്‍. കാര്യങ്ങള്‍ ബോധ്യപ്പെടുത്താനായി മാര്‍ച്ച് 13ന് അടച്ചുപൂട്ടാന്‍ അനുമതി തേടിയ സ്ഥാപനങ്ങളുടെ മേധാവികളുടെ യോഗവും ബോര്‍ഡ് വിളിച്ചു.
സുപ്രീംകോടതി നിര്‍ദേശം അനുസരിച്ച് രജിസ്റ്റര്‍ ചെയ്യണമെന്നും അടിസ്ഥാന സൗകര്യം പിന്നീടാകും പരിശോധിക്കുകയെന്നും ബോര്‍ഡ് പറയുന്നു. ഇത്തരം സ്ഥാപനങ്ങള്‍ക്ക് സൗകര്യം ഒരുക്കാനായി സര്‍ക്കാര്‍ സഹായം നല്‍കിയേക്കാം. ഇക്കാര്യങ്ങള്‍ യോഗത്തില്‍ വിശദീകരിച്ച് പൂട്ടരുതെന്ന് അഭ്യര്‍ഥിക്കും. ഇത് അവഗണിച്ച് മുന്നോട്ടുപോയാല്‍ ഇവിടുത്തെ കുട്ടികളെ അംഗീകാരമുള്ള മറ്റ് സ്ഥാപനങ്ങളിലേക്ക് മാറ്റുകയാണ് ലക്ഷ്യം.
https://www.facebook.com/Malayalivartha
