വീട്ടമ്മയെ സംസ്കരിക്കാന് സ്ഥലമില്ല, എന്ത് ചെയ്യുമെന്നറിയാതെ ആശങ്കയിലായിരുന്നു ബന്ധുക്കള്, ബിപിന്രാജും കുടുംബവും ദയകാട്ടിയതോടെ തുളസിയ്ക്ക് അന്ത്യവിശ്രമത്തിന് ഇടമായി, സംഭവത്തില് സി.പി.എം നേതാക്കള് ഇടപെട്ടു
മൃതദേഹം സംസ്കരിക്കാന് സ്ഥലമില്ലാത്തതിനാല് വീട്ടമ്മയുടെ സംസ്കാരത്തിനായി സമീപവാസി സ്വന്തം സ്ഥലം നല്കി. ദേവികുളങ്ങര മുട്ടത്തു മണ്ണേല് മങ്ങാട്ടുശേരില് വാടകയ്ക്കു താമസിക്കുന്ന രഘുവിന്റെ ഭാര്യ തുളസിയ്ക്ക്(50)ആണ് സമീപവാസിയുടെ കാരുണ്യത്തില് ചിത ഒരുക്കിയത്.
പുതുപ്പള്ളി കരിയില് ബിപിന്രാജിന്റെ പറമ്പിലാണ് ഇവര്ക്കായി ചിത തയാറാക്കിയത്. കൊല്ലം സ്വദേശികളായ ഇവര് ബംഗഌരുവില്നിന്നും 13 വര്ഷം മുമ്പ് ദേവികുളങ്ങരയിലെത്തി കുലത്തൊഴിലായ ആശാരിപ്പണി ചെയ്ത് ജീവിക്കുകയായിരുന്നു. വാടക വീട്ടിലാണ് മൂന്നു മക്കളുമായി ഇവര് കഴിഞ്ഞത്.
രോഗം മൂലം രഘുവിന് ദീര്ഘനാളായി ജോലി ചെയ്യാന് കഴിയാത്ത സ്ഥിതിയിലാണ്. കുറച്ചുനാളായി തുളസി ആലപ്പുഴ മെഡിക്കല് കോളജ് ആശുപത്രിയില് ചികിത്സയിലായിരുന്നു. രണ്ടു ആണ്മക്കളും ഒരു മകളുമാണ് ഇവര്ക്കുള്ളത്. മകളുടെ വിവാഹം കഴിഞ്ഞു.
മാതാപിതാക്കള്ക്ക് സുഖമില്ലാതായതോടെ മക്കള് ജോലിയ്ക്കു പോയാണ് കുടുംബം പുലര്ത്തിയിരുന്നത്. സ്വന്തമാെയാരു വീടും സ്ഥലവുമെന്ന സ്വപ്നവുമായി ഗ്രാമപഞ്ചായത്തില് ഉള്പ്പെടെ അപേക്ഷ നല്കിയിട്ടും നടപടി ഉണ്ടായില്ല.
റേഷന്കാര്ഡ് പോലും ഈ കുടുംബത്തിനില്ല. തുളസിയുടെ മരണത്തെത്തുടര്ന്ന് മൃതദേഹം എവിടെ സംസ്കരിക്കുമെന്ന ആശങ്ക ഉയര്ന്നു. ഒടുവില് കായംകുളം നഗരസഭാ ശ്മശാനത്തില് സംസ്കരിക്കാന് തീരുമാനിച്ചു. ഈ സമയം സി.പി.എം നേതാക്കള് ഇടപെട്ടാണ് പാര്ട്ടി അംഗമായ ബിപിന്രാജിന്റെ വീടിനോട് ചേര്ന്നുള്ള പറമ്പില് സംസ്കരിക്കാന് തീരുമാനിച്ചത്. ബിപിന്രാജും കുടുംബവും ഇതിന് തയാറായതോടെയാണ് തുളസിയ്ക്ക് അന്ത്യനിദ്രയ്ക്ക് ഇടം ഒരുങ്ങിയത്. മക്കള്: രാജേഷ്, ദീപ, മോഹനന്. മരുമകന്: സുമേഷ്.
https://www.facebook.com/Malayalivartha