കണ്ണൂരിന്‍ താരകമല്ലോ ചെഞ്ചോരപ്പൊന്‍ കതിരല്ലോ നാടിന്‍ നെടുനായകനല്ലോ പി ജയരാജന്‍ ധീര സഖാവ്... പി. ജയരാജനെ പുകഴ്ത്തിപ്പാടിയ ഈ ഗാനത്തിന്റെ അലയൊലി ഇനിയും അടങ്ങിയിട്ടില്ല. അതിന് പിന്നാലെ കണ്ണൂരില്‍ നിന്നും മറ്റൊരു റിപ്പോര്‍ട്ട്.
സി.പി.എം. കണ്ണൂര്‍ ജില്ലാ സെക്രട്ടറിസ്ഥാനമൊഴിഞ്ഞ് എട്ടുവര്‍ഷമായി പാര്‍ട്ടി പ്രവര്‍ത്തനത്തില്‍നിന്ന് മാറിനില്‍ക്കുന്ന പി. ശശി തിരിച്ചുവരവിനൊരുങ്ങുന്നു. സെക്രട്ടറിസ്ഥാനം ഒഴിയാന്‍ ഇടയാക്കിയ ആരോപണങ്ങളില്‍നിന്നെല്ലാം ശശി കുറ്റവിമുക്തനായി. കണ്ണൂര്‍ ജില്ലയില്‍ സി.പി.എമ്മില്‍ രൂപപ്പെട്ടിട്ടുള്ള പുതിയ രാഷ്ട്രീയധ്രുവീകരണവും തിരിച്ചുവരവിന് വഴിതുറന്നിട്ടുണ്ട്.

പാര്‍ട്ടി നേതൃത്വത്തിനുപോലും നിയന്ത്രിക്കാന്‍ കഴിയാത്തവിധം ജില്ലാ സെക്രട്ടറി പി. ജയരാജന്‍ കണ്ണൂരില്‍ പിടിമുറുക്കുന്നത് സംസ്ഥാനനേതൃത്വത്തെ അസ്വസ്ഥമാക്കുന്നുണ്ട്. ജയരാജനെ മഹത്വവല്‍ക്കരിച്ചുള്ള സംഗീത ആല്‍ബം ഇറക്കിയതും അര്‍ജുനന്‍, ആഭ്യന്തരമന്ത്രി തുടങ്ങിയ വിശേഷണങ്ങളുമായി പോസ്റ്ററുകള്‍ ഇറക്കിയതും നേതൃത്വത്തെ ചൊടിപ്പിച്ചിട്ടുണ്ട്.

ജയരാജന്റെ അപ്രമാദിത്തത്തിന് തടയിടാന്‍ ജില്ലയില്‍ പകരക്കാരനില്ലെന്ന അവസ്ഥ മറികടക്കുകയെന്നതാണ് പി. ശശിയെ തിരിച്ചുകൊണ്ടുവരുന്നതിലൂടെ ലക്ഷ്യമിടുന്നത്. മുഖ്യമന്ത്രി പിണറായി വിജയനും സംസ്ഥാന സെക്രട്ടറി കോടിയേരി ബാലകൃഷ്ണനും കഴിഞ്ഞദിവസം പി. ശശിയുമായി ഒരുമണിക്കൂറോളം സംസാരിച്ചതായാണ് വിവരം.

ഭരണപരിജ്ഞാനവും രാഷ്ട്രീയപാടവവും ഒത്തിണങ്ങുന്ന ശശിയുടെ അനുഭവമികവ് പ്രയോജനപ്പെടുത്തണമെന്ന് പാര്‍ട്ടിയില്‍ അഭിപ്രായം ശക്തമായിട്ടുണ്ട്. എസ്.എഫ്.ഐ. സംസ്ഥാന സെക്രട്ടറി, ഡി.വൈ.എഫ്.ഐ. ജില്ലാ സെക്രട്ടറി, സംസ്ഥാന ജോയന്റ് സെക്രട്ടറി, കര്‍ഷസംഘം ജില്ലാ സെക്രട്ടറി, സി.പി.എം. ജില്ലാ സെക്രട്ടറി തുടങ്ങിയ നിലകളില്‍ രാഷ്ട്രീയരംഗത്ത് അദ്ദേഹം പ്രവര്‍ത്തിച്ചിട്ടുണ്ട്. മുന്‍മുഖ്യമന്ത്രി ഇ.കെ. നായനാരുടെ പൊളിറ്റിക്കല്‍ സെക്രട്ടറി, കെ.എസ്.എഫ്.ഇ. ചെയര്‍മാന്‍, റെയ്ഡ്‌കോ ചെയര്‍മാന്‍ എന്നീ ഭരണപരമായ പദവികളും വഹിച്ചിട്ടുണ്ട്. തിരിച്ചെത്തിയാല്‍ പാര്‍ട്ടിയില്‍ വീണ്ടും ശശി പ്രബലനാവുമെന്ന് അറിയാവുന്നതിനാല്‍, എതിരാളികള്‍ ഇതിന് തടയിടാനുള്ള നീക്കങ്ങളും തുടങ്ങിയിട്ടുണ്ട്.