ആളുമാറി കസ്റ്റഡിയിലെടുത്ത ശ്രീജിത്തിനെ ചവിട്ടിക്കൊന്ന സംഭവത്തില്‍ അറസ്റ്റിലായ വരാപ്പുഴ എസ്.ഐ ജി.എസ്. ദീപക്കിനെ ഇന്ന് മജിസ്‌ട്രേട്ട് കോടതിയില്‍ ഹാജരാക്കും. കൊലക്കുറ്റമാണ് ദീപക്കിനെതിരെ ചുമത്തിയിട്ടുള്ളത്.പറവൂര്‍ സി ഐ ക്രിസ്പിന്‍ സാമിനെയും വൈകാതെ പ്രതി ചേര്‍ക്കും. മെഡിക്കല്‍ ബോര്‍ഡിന്റെ റിപ്പോര്‍ട്ട് തിങ്കളാഴ്ച ലഭിക്കും. ആര്‍ടിഎഫ് ഉദ്യോഗസ്ഥരുടെ ജാമ്യാപേക്ഷയും മജിസ്‌ട്രേട്ട് കോടതി ഇന്ന് പരിഗണിക്കും.

ശ്രീജിത്തിനെ മര്‍ദ്ദിച്ചത് ദീപക്കിന്റെ നേതൃത്വത്തിലാണെന്ന് കണ്ടെത്തിയതിനെ തുടര്‍ന്ന് ഇയാളെ നാലാം പ്രതിയാക്കിയിരുന്നു. ഇതോടെ കേസില്‍ അറസ്റ്റിലായവരുടെ എണ്ണം നാലായി. ശ്രീജിത്തിന്റെ അറസ്റ്റ് രേഖപ്പെടുത്തിയതില്‍ പറവൂര്‍ സി.ഐ സാം ക്രിസ്പിന്‍, എസ്.ഐ ദീപക്ക് എന്നിവര്‍ക്ക് ഗുരുതരമായ വീഴ്ച വന്നുവെന്ന് കണ്ടെത്തിയിരുന്നു. തുടര്‍ന്ന് ചോദ്യം ചെയ്യുകയും ദീപക്കിനെ പ്രതിപ്പട്ടികയില്‍ ഉള്‍പ്പെടുത്താനും അറസ്റ്റ് ചെയ്യാനും തീരുമാനിക്കുകയായിരുന്നു. 

വീടുവളഞ്ഞ് രാത്രിയില്‍ ക്രൂരമായി മര്‍ദ്ദിച്ച് ശ്രീജിത്തിനെ കസ്റ്റഡിയിലെടുത്ത ആലുവ റൂറല്‍ പൊലീസ് മേധാവി എ.വി. ജോര്‍ജിന്റെ റൂറല്‍ ടൈഗര്‍ ഫോഴ്‌സ് അംഗങ്ങളായ ജിതിന്‍രാജ്, സന്തോഷ് കുമാര്‍, സുമേഷ് എന്നീ പൊലീസുകാരെ നേരത്തെ തന്നെ പ്രതിപ്പട്ടികയില്‍ ഉള്‍പ്പെടുത്തിയിരുന്നു. സ്‌റ്റേഷന്റെ ചുമതലക്കാരന്‍ എന്ന നിലയില്‍ എസ് ഐ . ദീപക്കിന്റെ ഭാഗത്ത് ഏറെ വീഴ്ചകള്‍ ഉണ്ടായെന്നാണ് കണ്ടെത്തല്‍.

സി.ഐ. ഏല്‍പ്പിച്ച പ്രതിയെ നോക്കേണ്ട ദൗത്യമുള്ളയാള്‍ക്ക് വീഴ്ചയുണ്ടായി. വെള്ളം ചോദിച്ച ശ്രീജിത്തിന് അതു നല്‍കാനെത്തിയ അമ്മ ശ്യാമളയെ സ്‌റ്റേഷനില്‍ നിന്ന് ദീപക് ആട്ടിയോടിച്ചു. പ്രതിയെ കൊല്ലുന്നതിന് മുന്‍വിധിയോടെയുള്ള പ്രവൃത്തിയാണോയിതെന്ന് പരിശോധിക്കണമെന്നും കണ്ടെത്തലുകളില്‍ നിന്ന് ബോധ്യപ്പെട്ടിട്ടുണ്ട്.