എല്ലാം പരമ രഹസ്യം... കുമ്മനം രാജശേഖരനെ മിസോറാം ഗവര്ണറാക്കി മോഡി ഞെട്ടിച്ചതിന് പിന്നാലെ ഉമ്മന് ചാണ്ടിയെ ദേശീയ ജനറല് സെക്രട്ടറിയാക്കി രാഹുല് ഗാന്ധി
സംസ്ഥാനത്തെ ഒരു നേതാവുമറിയാതെ ബിജെപി സംസ്ഥാന അധ്യക്ഷന് കുമ്മനം രാജശേഖരനെ മിസോറാം ഗവര്ണറാക്കി മോഡി നിയമിച്ചതിന് പിന്നാലെ രാഹുല് ഗാന്ധിയും കേരളത്തെ ഞെട്ടിച്ചു. മുന് മുഖ്യമന്ത്രിയും കോണ്ഗ്രസിലെ തലമുതിര്ന്ന നേതാവുമായ ഉമ്മന് ചാണ്ടിയെ എ.ഐ.സി.സി. ജനറല് സെക്രട്ടറിയായി രാഹുല് ഗാന്ധി നിയമിച്ചു. അങ്ങനെ കുമ്മനവും ഉമ്മന് ചാണ്ടിയും കേരളം വിടുകയാണ്. ഇതോടെ കേരളത്തിലെ കോണ്ഗ്രസ് പ്രസിഡന്റിനെ നിര്ണയിക്കുന്നതില് ഉമ്മന് ചാണ്ടി തുറുപ്പ് ചീട്ടാകും.
എഐസിസി ജനറല് സെക്രട്ടറിയും മുന് മധ്യപ്രദേശ് മുഖ്യമന്ത്രിയുമായ ദിഗ്വിജയ് സിംഗിന് പകരമാണ് ഉമ്മന് ചാണ്ടിയുടെ നിയമനം. ഉമ്മന് ചാണ്ടിക്ക് ആന്ധ്രാപ്രദേശിന്റെ ചുമതലയാണ് കോണ്ഗ്രസ് ഹൈക്കമാന്ഡ് നല്കിയിരിക്കുന്നത്.
എഐസിസി ജനറല് സെക്രട്ടറി അശോക് ഗെഹ്ലോട്ടാണ് ഉമ്മന് ചാണ്ടിയെ നിയമിച്ചകാര്യം അറിയിച്ചത്. ഉമ്മന്ചാണ്ടിയെ കോണ്ഗ്രസ് പ്രവര്ത്തകസമിതി അംഗമായി നിയമിച്ചേക്കുമെന്നും ഇതിന് മുന്നോടിയായാണ് എഐസിസി ജനറല് സെക്രട്ടറിയായി നിയമിച്ചതെന്നുമാണ് ദില്ലിയില് നിന്നുള്ള വാര്ത്തകള്. ജനറല് സെക്രട്ടറിയായതോടെ വര്ക്കിംഗ് കമ്മിറ്റിയുടെ ഭാഗമാകുമെങ്കിലും വര്ക്കിംഗ് കമ്മിറ്റിയിലെ സ്ഥിരാംഗമായി ഉമ്മന് ചാണ്ടിയെ നിയമിക്കാനാണ് രാഹുല് ഗാന്ധിയുടെ തീരുമാനമെന്നാണ് വിവരം. കേരളത്തില് നിന്ന് ഇപ്പോള് എകെ ആന്റണി മാത്രമാണ് വര്ക്കിംഗ് കമ്മിറ്റിയിലുള്ളത്.
രണ്ടു തവണ കേരള മുഖ്യമന്ത്രിയും ഒരു തവണ കേരള പ്രതിപക്ഷനേതാവുമായിരുന്ന ഉമ്മന് ചാണ്ടി പക്ഷെ, കഴിഞ്ഞ തവണത്തെ നിയമസഭയിലെ തോല്വിയെ തുടര്ന്ന് പ്രതിപക്ഷ നേതാവിന്റെ ചുമതല ഏറ്റെടുക്കാതെ ഒഴിഞ്ഞുനില്ക്കുകയായിരുന്നു. ഇതേതുടര്ന്നാണ് രമേശ് ചെന്നിത്തല പ്രതിപക്ഷ നേതാവായത്.
ഇതിന് പിന്നാലെ ഉമ്മന് ചാണ്ടിയെ ദേശീയതലത്തില് പ്രവര്ത്തനത്തിന് നിയമിക്കുമെന്ന് പലതവണ പറഞ്ഞുകേട്ടിരുന്നുവെങ്കിലും കേരളത്തില് തന്നെയായിരുന്നു അദ്ദേഹത്തിന്റെ പ്രവര്ത്തനകേന്ദ്രം. അടുത്തിടെ നടന്ന കര്ണാടക നിയമസഭാ തെരഞ്ഞെടുപ്പില് കോണ്ഗ്രസിന് വേണ്ടി പ്രചാരണത്തിന് ഉമ്മന് ചാണ്ടിയും സജീവമായിരുന്നു. ഇതിന് പിന്നാലെയാണ് ഉമ്മന് ചാണ്ടിയെ ദേശീയനേതൃത്വത്തിലേക്ക് നിയമിച്ചുകൊണ്ടുള്ള ഹൈക്കമാന്ഡിന്റെ തീരുമാനം വന്നത്.
https://www.facebook.com/Malayalivartha