ആത്മാര്‍ത്ഥ സുഹൃത്തിനുവേണ്ടി ആള്‍മാറാട്ടം നടത്തി പ്ലസ്ടു സേ പരീക്ഷ എഴുതിയ വിദ്യാര്‍ത്ഥി പിടിയില്‍
ആത്മാര്‍ത്ഥ സുഹൃത്തിനുവേണ്ടി ആള്‍മാറാട്ടം നടത്തി പ്ലസ് ടു സേ പരീക്ഷ എഴുതിയ വിദ്യാര്‍ഥി പിടിയിലായി. കൊണ്ടോട്ടി കിഴിശ്ശേരി സ്വദേശിയെയാണ് പയ്യോളി പൊലീസ് അറസ്റ്റ് ചെയ്തത്. പ്രിന്‍സിപ്പലിന്റെ പരാതിയിലാണ് നടപടി. സുഹൃത്തിനെ പരീക്ഷക്ക് അയച്ച വിദ്യാര്‍ഥിക്കെതിരെ ജുവനൈല്‍ ആക്ട് പ്രകാരം കേസെടുക്കും.
മണിയൂര്‍ ഹയര്‍ സെക്കന്‍ഡറി സ്‌കൂള്‍ കേന്ദ്രമായി തിങ്കളാഴ്ച നടന്ന പ്ലസ് ടു സോഷ്യോളജി സേ പരീക്ഷയിലാണ് ആള്‍മാറാട്ടം. ഹാള്‍ ടിക്കറ്റിലെ റജിസ്റ്റര്‍ നമ്പറും ഉത്തരക്കടലാസിലെ രജിസ്റ്റര്‍ നമ്പറും തമ്മില്‍ വ്യത്യാസം കണ്ടതിനെ തുടര്‍ന്ന് ഇവിജിലേറ്റര്‍ ചോദ്യംചെയ്തപ്പോഴാണ് ആള്‍മാറാട്ടം വെളിച്ചത്തായത്. കൈയിലുള്ള ഹാള്‍ ടിക്കറ്റിലെ നമ്പറിന് പകരം കഴിഞ്ഞ വര്‍ഷം പരീക്ഷയെഴുതിയ തന്റെ രജിസ്റ്റര്‍ നമ്പര്‍ ഉത്തരക്കടലാസില്‍ യുവാവ് എഴുതി പോവുകയായിരുന്നു.
സുഹൃത്തിന്റെ പടത്തിന് പകരം സ്വന്തം പടം ഒട്ടിച്ചാണ് ഇയാള്‍ പരീക്ഷ എഴുതാനെത്തിയത്. പ്രതിയെ കോടതിയില്‍ ഹാജരാക്കി. പിടിയിലായയാള്‍ പ്ലസ് ടു പരീക്ഷ നേരത്തേ പാസായിട്ടുണ്ട്.
https://www.facebook.com/Malayalivartha
