തെറ്റ് ചെയ്യുന്ന പൊലിസ് ഉദ്യോഗസ്ഥന്‍ എത്ര ഉന്നതനായാലും സംരക്ഷണം ഉണ്ടാവില്ല, കര്‍ക്കശ നടപടി ഉണ്ടാകും. തെറ്റിനെതിരെ ഒരു വിട്ടുവീഴ്ചയുമില്ല. സര്‍ക്കാരിന്റെ നിലപാട് വ്യക്തമാണെന്ന് മുഖ്യമന്ത്രി പിണറായി വിജയന്‍ നിയമസഭയില്‍ അറിയിച്ചു. പൊലിസില്‍ ചെറിയൊരു വിഭാഗം തെറ്റു ചെയ്യുന്നതിനെ സാമാന്യവല്‍ക്കരിക്കാനാവില്ലെന്നും അടിയന്തരപ്രമേയത്തിനുള്ള മറുപടിയില്‍ അദ്ദേഹം പറഞ്ഞു. ഗവാസ്‌ക്കര്‍ എന്ന പൊലീസുകാരനെ മര്‍ദ്ദിച്ച എ.ഡി.ജി.പിയുടെ മകളെ അറസ്റ്റ് ചെയ്യാതെ സര്‍ക്കാര്‍ ചിലരെ രക്ഷിക്കാന്‍ ശ്രമിക്കുകയാണെന്ന് പ്രതിപക്ഷനേതാവ് രമേശ് ചെന്നിത്തല ആരോപിച്ചു. 

ഗവാസ്‌ക്കര്‍ക്കെതിരെ സ്ത്രീപീഡന കുറ്റംചുമത്തിയിരിക്കുകയാണ്. ആശുപത്രിവിട്ടാല്‍ അറസ്റ്റ് ചെയ്യും. എ.ഡി.ജി.പിയുടെ മകള്‍ക്കെതിരെ തെളിവ് കിട്ടിയിട്ടും അറസ്റ്റ് വൈകിക്കുന്നത് വിവേചനമാണെന്നും കേസ് ക്രൈംബ്രാഞ്ചല്ല, പ്രത്യേക സംഘം അന്വേഷിക്കണമെന്നും പ്രതിപക്ഷനേതാവ് ആവശ്യപ്പെട്ടു. എന്നാല്‍ പരാതിയുടെ നിജസ്ഥിതി അന്വേഷിച്ച് നടപടിയെടുക്കുമെന്ന് മുഖ്യമന്ത്രി പറഞ്ഞു. ഇതോടെ കെ. മുരളീധരന്‍ നല്‍കിയ അടിയന്തരപ്രമേയ നോട്ടീസിന് സ്പീക്കര്‍ അനുമതി നിഷേധിച്ചു. തുടര്‍ന്ന് പ്രതിപക്ഷം സഭയില്‍ നിന്ന് ഇറങ്ങിപ്പോയി.

ഉന്നത പൊലീസ് ഉദ്യോഗസ്ഥരുടെ വീട്ടിലെ പട്ടികളെ കുളിപ്പിക്കലോ, പരിചരിക്കലോ, വീട്ടുജോലിയോ അല്ല പൊലീസിന്റെ പണിയെന്ന് മുഖ്യമന്ത്രി സഭയെ അറിയിച്ചു. ചില പൊലീസ് ഉദ്യോഗസ്ഥര്‍ ഇത്തരത്തില്‍ പ്രവര്‍ത്തിച്ചതായി പരാതി ലഭിച്ചിട്ടുണ്ട്. പരാതി ഗൗരവമുള്ളതാണെന്നും മുഖ്യമന്ത്രി അറിയിച്ചു. മുടി വെട്ടാന്‍ കണ്ണൂരില്‍ നിന്ന് കോഴിക്കോട്ടേക്ക് ബാര്‍ബറെ വിളിച്ചുവരുത്തിയ എ.ഡി.ജി.പിക്കതിരെ തെളിവുണ്ടായിട്ടും നടപടി വൈകുന്നത് ചില സഹായിക്കാനാണ്. നടപടിയെടുക്കാന്‍ സര്‍ക്കാര്‍ ആര്‍ജ്ജവം കാണിക്കണം. കുറ്റക്കാര്‍ക്ക് ആറ് മാസത്തിനുള്ളില്‍ നടപടി വാങ്ങിക്കൊടുക്കുമോ എന്നും പ്രതിപക്ഷനേതാവ് ചോദിച്ചു. ദാസ്യപ്പണി കഴിഞ്ഞ സര്‍ക്കാരിന്റെ കാലത്തും ഉണ്ടായിരുന്നെന്നും ഡി.ജി.പിയായിരുന്ന സെന്‍കുമാര്‍ പൊലീസുകാരന്റെ ഷര്‍ട്ടിന് കുത്തിപ്പിടിച്ചിരിക്കുന്ന ചിത്രം ഓര്‍മിപ്പിച്ച് മുഖ്യമന്ത്രി പറഞ്ഞു.