മുഖ്യമന്ത്രിക്ക് പിന്നാലെ പ്രതിപക്ഷവും മാധ്യമങ്ങളോട് 'കടക്ക് പുറത്ത്' നിലപാട് സ്വീകരിക്കുന്നു, എം.എല്.എ ഹോസ്റ്റലില് മാധ്യമവാഹനങ്ങള്ക്ക് അപ്രഖ്യാപിത വിലക്ക്
എം.എല്.എ ഹോസ്റ്റലില് മാധ്യമപ്രവര്ത്തകരുടെയും മാധ്യമസ്ഥാപനങ്ങളുടെയും വാഹനങ്ങള്ക്ക് വാച്ച് ആന്ഡ് വാര്ഡ് വിലക്കേര്പ്പെടുത്തി. ഇന്ന് രാവിലെ മുതലാണ് സംഭവമെന്ന് തിരുവനന്തപുരം മാധ്യമപ്രവര്ത്തകര് പറഞ്ഞു. കാരണം തിരക്കിയപ്പോള് വാച്ച് ആന്റ് വാര്ഡ് പറഞ്ഞത് ഷാഫി പറമ്പില് എം.എല് എ യുടെ റൂമിനു മുന്നില് അനുമതി ഇല്ലാതെ മാധ്യമ പ്രവര്ത്തകര് കഴിഞ്ഞ ദിവസം എത്തിയതു കൊണ്ടാണെന്നാണ്. പ്രത്യേകിച്ച് പ്രസ് സ്റ്റിക്കര് പതിച്ച വാഹനങ്ങള് കോമ്പൗണ്ടിന് പുറത്ത് പാര്ക്ക് ചെയ്യാനാണ് നിര്ദേശം നല്കിയിരിക്കുന്നതെന്നാണ് വിവരം. കഴിഞ്ഞ ദിവസത്തെ എ ഗ്രൂപ്പിന്റെ രഹസ്യ യോഗം മാധ്യമപ്രവര്ത്തകര് മണത്തറിഞ്ഞിരുന്നു. തുടര്ന്ന് യോഗം നടന്ന ഷാഫി പറമ്പില് എം.എല്.എയുടെ പമ്പാ ബ്ളോക്കിലെ 404ാം നമ്പര് മുറിക്ക് മുന്നില് മാധ്യമപ്രവര്ത്തകര് എത്തിയിരുന്നു.
ഇത് ഷാഫിയെ ചൊടിപ്പിച്ചെന്നാണ് വാച്ച് ആന്ഡ് വാര്ഡിലെ ചിലര് പറയുന്നത്. മാധ്യമപ്രവര്ത്തകരെ തന്റെ ഫ്ഌറ്റിന് മുന്നിലേക്ക് കടത്തിവിട്ട വാച്ച് ആന്ഡ് വാര്ഡിനെ ഷാഫി ശാസിച്ചിരുന്നു. ഇതേ തുടര്ന്നാണ് നിയന്ത്രണം ഏര്പ്പെടുത്തിയതെന്ന് അറിയുന്നു. എം.എല്.എ ഹോസ്റ്റിലിന് ഉള്ളിലൂടെ നിയമസഭയിലേക്ക് എളുപ്പും കടക്കാനാവും അതിനും വിലക്കുണ്ടെന്നാണ് മാധ്യമപ്രവര്ത്തകര് പറയുന്നത്. വിഷയം സ്്പീക്കറുടെ ശ്രദ്ധയില്പ്പെടുത്തണമെന്ന് പല മാധ്യമപ്രവര്ത്തകരും തങ്ങളുടെ വാട്സാപ്പ് ഗ്രൂപ്പുകളില് ആവശ്യപ്പെട്ടിട്ടുണ്ട്.
നിയമസഭ റിപ്പോര്ട്ട് ചെയ്യാനെത്തുന്ന മാധ്യമപ്രവര്ത്തകര് ഇന്ന് തന്നെ വിവരം സ്പീക്കര് ശ്രീരാമകൃഷ്ണനെ ധരിപ്പിക്കുമെന്നാണ് അറിയുന്നത്. നിയമസഭ പിരിഞ്ഞ ശേഷം വാര്ത്തയുമായി ബന്ധപ്പെട്ട് എം.എല്.എമാരെ കാണാനും മറ്റും മാധ്യമപ്രവര്ത്തകര് എം.എല്.എ ഹോസ്റ്റലില് പോവുക പതിവാണ്. ആ സമയത്ത് വാഹനങ്ങള് കോമ്പൗണ്ടിലാണ് വര്ഷങ്ങളായി പാര്ക്ക് ചെയ്തിരുന്നത്. വാഹനങ്ങള് കോമ്പൗണ്ടിന് പുറത്ത് വയ്ക്കാനുള്ള സൗകര്യങ്ങളും കുറവാണെന്ന് മാധ്യമപ്രവര്ത്തകര് ചൂണ്ടിക്കാട്ടുന്നു.
https://www.facebook.com/Malayalivartha