സാമൂഹ്യ സുരക്ഷാ പെന്ഷനുകള് സുഗമമായി വിതരണം ചെയ്യാന് ധനകാര്യ വകുപ്പിന് കീഴില് പ്രത്യേക കമ്പനി രൂപീകരിക്കാന് മന്ത്രിസഭായോഗ തീരുമാനം
സാമൂഹ്യ സുരക്ഷാ പെന്ഷനുകള് സുഗമമായി വിതരണം ചെയ്യാന് ധനകാര്യ വകുപ്പിന് കീഴില് പ്രത്യേക കമ്പനി രൂപീകരിക്കാന് മന്ത്രിസഭായോഗം തീരുമാനിച്ചു. പെന്ഷനാവശ്യമായ ഫണ്ട് സംസ്ഥാന സര്ക്കാര് കമ്പനിക്ക് നല്കും. വിവിധ ക്ഷേമനിധി ബോര്ഡുകളാണ് ക്ഷേമപെന്ഷനുകളുടെ ഭരണനിര്വഹണവും വിതരണവും ഇപ്പോള് നടത്തുന്നത്.
വിവിധതലത്തിലുളള നിയന്ത്രണം പെന്ഷന് വിതരണത്തില് ഒരുപാട് അനിശ്ചിതത്വത്തിനും കാലതാമസത്തിനും കാരണമാകുന്നു. പെന്ഷനുകള് മൂന്നു മാസത്തിലൊരിക്കലോ ഉത്സവകാലങ്ങളിലോ ആണ് ഇപ്പോള് വിതരണം ചെയ്യുന്നത്. ഉപജീവന സഹായം എന്ന നിലയ്ക്കുളള പെന്ഷനുകള് കൃത്യമായി മാസാമാസം വിതരണം ചെയ്യാന് ലക്ഷ്യമിട്ടാണ് കമ്പനി രൂപീകരിക്കുന്നത്. കമ്പനിയില് 100 ശതമാനം ഓഹരി സര്ക്കാരിനായിരിക്കും.
കമ്പനിയുടെ ഡയറക്ടര് ബോര്ഡിന്റെ ചെയര്മാന് ധനകാര്യ മന്ത്രിയും മാനേജിംഗ് ഡയറക്ടര് ധനകാര്യ സെക്രട്ടറിയുമായിരിക്കും. കണ്ണൂര് അന്താരാഷ്ട്ര വിമാനത്താവളത്തിന്റെ റോഡ് കണക്ടിവിറ്റി പാക്കേജില് വികസിപ്പിക്കുന്ന കുറ്റിയാടിനാദാപുരംപെരിങ്ങത്തൂര്മേക്കുന്ന്പാനൂര്പൂക്കോട്ട്കൂത്തുപറമ്പ് മട്ടന്നൂര് റോഡ് (53 കി.മീ), മാനന്തവാടി ബോയ്സ് ടൗണ് പേരാവൂര് ശിവപുരം മട്ടന്നൂര് റോഡ് (63.5 കി.മീ) എന്നീ പ്രവൃത്തികള്ക്ക് കേരള റോഡ് ഫണ്ട് ബോര്ഡിനെ ചുമതലപ്പെടുത്തും.
മുന് ദേശീയ കബഡി കായികതാരം പി.കെ. രാജിമോള്ക്ക് കേരള സ്പോര്ട്സ് കൗണ്സിലില് ക്ലാര്ക്ക് തസ്തികയില് സ്ഥിരം നിയമനം നല്കും. ഇപ്പോള് താല്ക്കാലികാടിസ്ഥാനത്തില് ഹോസ്റ്റല് വാര്ഡനായി ജോലി ചെയ്യുകയാണ്. കളിക്കളത്തിലുണ്ടായ പരിക്കും സാമ്പത്തിക പിന്നോക്കാവസ്ഥയും പരിഗണിച്ചാണ് തീരുമാനം.
വിനോദസഞ്ചാര വകുപ്പിന് കീഴിലെ ഫുഡ് ക്രാഫ്റ്റ് ഇന്സ്റ്റിറ്റിയൂട്ടിലെ സര്ക്കാര് അംഗീകാരമുളള ജീവനക്കാര്ക്ക് ശമ്പളപരിഷ്കരണം അനുവദിക്കും.സംസ്ഥാന ഫിനാന്ഷ്യല് എന്റര്െ്രെപസസില് മാനേജീരിയല് തലത്തില് 28 പുതിയ തസ്തികകള് സൃഷ്ടിക്കും. തേയില തോട്ടം തൊഴിലാളികള്ക്ക് വേതന കുടിശ്ശിക നല്കാന് കണ്ടിജന്സി ഫണ്ടില് നിന്ന് 2.79 കോടി രൂപ അഡ്വാന്സ് സ്വീകരിക്കാന് ലേബര് കമ്മിഷണര്ക്ക് അനുമതി നല്കി.
https://www.facebook.com/Malayalivartha