വിദേശികളെ ആക്രമിക്കുന്നത് ഇനി മുതല്‍ ഗുരുതര കുറ്റകൃത്യം, ഗുരുതര കുറ്റകൃത്യങ്ങളില്‍ കൃത്യതയും വിശ്വാസ്യതയും ഉറപ്പാക്കാന്‍ രണ്ട് ഉന്നത ഉദ്യോഗസ്ഥരുടെ നിരീക്ഷണം ഉറപ്പാക്കണമെന്ന് ഡി.ജി.പിയുടെ സര്‍ക്കുലര്‍
വിദേശികളെ ആക്രമിക്കുന്നത് ഇനി മുതല്‍ ഗുരുതര കുറ്റകൃത്യം. കോവളത്ത് ലാത്‌വിയന്‍ സ്വദേശിനിയെ പീഡിപ്പിച്ച് കൊന്ന സംഭവം രാജ്യാന്തര ശ്രദ്ധയില്‍ വന്നതിനെത്തുടര്‍ന്നാണ് ഗുരുതര കുറ്റകൃത്യങ്ങളുടെ പരിഷ്‌കരിച്ച പട്ടികയില്‍ ഉള്‍പ്പെടുത്തിയത്. ഇത്തരം കേസുകള്‍ ഡിവൈ.എസ്.പിമാരോ എ.എസ്.പിമാരോ അന്വേഷിക്കും.
ഗുരുതര കുറ്റകൃത്യങ്ങളില്‍ കൃത്യതയും വിശ്വാസ്യതയും ഉറപ്പാക്കാന്‍ രണ്ട് ഉന്നത ഉദ്യോഗസ്ഥരുടെ നിരീക്ഷണം ഉറപ്പാക്കണമെന്ന് ഡി.ജി.പിയുടെ സര്‍ക്കുലര്‍ നിര്‍ദേശിക്കുന്നു. ശാസ്ത്രീയമായി അപഗ്രഥിച്ച് തയാറാക്കിയതെന്ന വിശദീകരണത്തോടെയാണ് ഡി.ജി.പി ലോക്‌നാഥ് ബെഹ്‌റ സര്‍ക്കുലര്‍ പുറപ്പെടുവിച്ചത്. സ്ത്രീകള്‍ക്കും കുട്ടികള്‍ക്കുമെതിരായ ലൈഗിക അതിക്രമം, ആസിഡ് ആക്രമണം ഉള്‍പ്പെടെ നാല് കുറ്റകൃത്യങ്ങളാണ് ഗുരുതര കുറ്റകൃത്യങ്ങളുടെ പട്ടികയില്‍ പുതുതായി ഇടംപിടിച്ചത്.
കൊലപാതകവും വധശ്രമവുമാണ് ഗുരുതര കുറ്റങ്ങളില്‍ ആദ്യം വരുന്നത്. 50 ലക്ഷത്തിന് മുകളില്‍ വരുന്ന സംഘടിത കവര്‍ച്ച, കൊള്ള, ഭവനഭേദനം, 75 ലക്ഷത്തിന് മുകളില്‍ വരുന്ന മോഷണം എന്നിവയും ഇതില്‍പെടും. സബ് ഇന്‍സ്‌പെക്ടര്‍ റാങ്കിന് മുകളില്‍ വരുന്നവരുടെ കുറ്റകൃത്യം, ദുഷ്‌പ്രേരണ മൂലമുള്ള കുട്ടികളുടെയും മാനസിക വെല്ലുവിളി നേരിടുന്നവരുടെയും ആത്മഹത്യ, ഭിക്ഷാടനത്തിനായി കുട്ടികളെ തട്ടിക്കൊണ്ടുപോവുകയോ അംഗവൈകല്യം ഉണ്ടാക്കുകയോ ചെയ്യുക, സ്ത്രീധന പീഡന മരണം, ബലാത്സംഗം, സ്ത്രീകള്‍ക്കെതിരായ പീഡനം, കൂട്ടമാനഭംഗം, യു.എ.പി.എ, എന്‍.ഐ.എ കേസുകളും എന്‍.ഡി.പി.എസ് കേസുകളും (മയക്കുമരുന്ന് കേസുകള്‍) കള്ളനോട്ട്, പ്രായപൂര്‍ത്തിയാകാത്തവരുടെ തിരോധാനം തുടങ്ങിയവയും പട്ടികയില്‍ ഉള്‍പ്പെടുന്നു.
അബ്കാരി കേസുകളുടെ പരിധി ഉയര്‍ത്തിയാണ് ഗുരുതര കുറ്റകൃത്യങ്ങളില്‍ നിലനിര്‍ത്തിയത്. സ്ത്രീധന പീഡന കേസുകളും കള്ളനോട്ട് കേസുകളും ഡിവൈ.എസ്.പിമാരാകും അന്വേഷിക്കുക. 30 കുറ്റകൃത്യങ്ങളാണ് ഗുരുതര കൃത്യങ്ങളില്‍ ഇപ്പോഴുള്ളത്.
https://www.facebook.com/Malayalivartha
