മാതാപിതാക്കളില്‍ നിന്നും കുഞ്ഞുങ്ങളെ അടര്‍ത്തിമാറ്റരുത് എന്ന ഉത്തരവില്‍ ട്രംപിനെ കൊണ്ടെത്തിച്ചത് ഭാര്യയും മകളും; കുടിയേറ്റ വിരുദ്ധ ക്രൂരതയില്‍ കുട്ടികളെ പിരിക്കില്ല എന്ന തീരുമാനം ഇങ്ങനെ
കുടിയേറ്റ വിരുദ്ധ ക്രൂരതയില്‍ കുട്ടികളെ പിരിക്കില്ല എന്ന അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ തീരുമാനം ഏറെ പ്രതീക്ഷയോടെയാണ് എല്ലാവരും കാണുന്നത്. മെക്‌സിക്കല്‍ കുടിയേറ്റക്കാരില്‍ നിന്ന് കുഞ്ഞുങ്ങളെ വേര്‍തിരിച്ചുകൊണ്ടുള്ള സീറോ ടോളറന്‍സ് നയത്തില്‍ നിന്ന് ഡൊണാള്‍ഡ് ട്രംപ് പിന്‍വാങ്ങിയത് ഭാര്യയുടെയും മകളുടെയും വാക്കുകളാലെന്ന് റിപ്പോര്‍ട്ട്. ബുധനാഴ്ചയാണ് വിവാദനയം പിന്‍വലിച്ചുകൊണ്ടുള്ള ഉത്തരവില്‍ ട്രംപ് ഒപ്പുവച്ചത്.
മെക്‌സിക്കന്‍ അതിര്‍ത്തി വഴി അനധികൃതമായി അമേരിക്കയിലേക്ക് എത്തുന്നവരെ അറസ്റ്റ് ചെയ്യുകയും അവരുടെ കുഞ്ഞുങ്ങളെ പ്രത്യേക സുരക്ഷ കേന്ദ്രത്തിലേക്ക് മാറ്റുക എന്നതുമായിരുന്നു ട്രംപിന്റെ നയം. ഇതിനെതിരെ നിരവധി പേര്‍ രംഗത്തെത്തി. വിവാദനയം എത്രയും വേഗം പിന്‍വലിക്കണമെന്ന അഭിപ്രായങ്ങള്‍ ഉയര്‍ന്നു. ഏപ്രില്‍ 19 മുതല്‍ മെയ് 31 വരെയുള്ള കാലയളവില്‍ ഇരുപതിനായിരത്തോളം കുട്ടികളെയാണ് ഇത്തരത്തില്‍ സുരക്ഷാ കേന്ദ്രത്തിലേക്ക് മാറ്റിയത്.
പ്രതിഷേധങ്ങള്‍ അതിശക്തമായി തുടര്‍ന്നപ്പോഴും അമേരിക്കയെ കുടിയേറ്റ ക്യംപ് ആക്കി മാറ്റില്ല എന്ന് പ്രഖ്യാപിച്ച് നിലപാടില്‍ ഉറച്ച് നില്‍ക്കുകയായിരുന്നു. എന്നാല്‍, മെലാനിയയും ഇവാന്‍കയും വ്യക്തിപരമായ ആവശ്യമായി വിഷയം അവതരിപ്പിച്ചതോടെ ട്രംപിന്റെ തീരുമാനത്തില്‍ അയവ് വരികയായിരുന്നു. പ്രതിഷേധങ്ങള്‍ വിലകുറച്ചു കാണരുതെന്ന മെലാനിയയുടെ വാക്കുകള്‍ ട്രംപ് വിശ്വാസത്തിലെടുക്കുകയായിരുന്നത്രേ.
നിരവധി അമ്മമാര്‍ക്ക് നിര്‍ബന്ധിതമായി കുഞ്ഞുങ്ങളെ പിരിയേണ്ടി വരുന്ന സാഹചര്യത്തില്‍ കുഞ്ഞുമൊത്തുള്ള ചിത്രങ്ങള്‍ സാമൂഹികമാധ്യമത്തില്‍ പോസ്റ്റ് ചെയ്ത ഇവാന്‍കയെ വിമര്‍ശിച്ച് മനുഷ്യാവകാശപ്രവര്‍ത്തകര്‍ രംഗത്തുവന്നിരുന്നു. ഇതേത്തുടര്‍ന്നാണ് സംഭവത്തിന്റെ ഗൗരവം പിതാവിനെ പറഞ്ഞുമനസ്സിലാക്കാന്‍ ഇവാന്‍കയും ശ്രമിക്കുകയായിരുന്നു. മാതാപിതാക്കളില്‍ നിന്ന് വേര്‍തിരിക്കുന്ന നയത്തെ യുഎന്‍ മനുഷ്യാവകാശ കൗണ്‍സില്‍ തലവന്‍ തള്ളി പറഞ്ഞിരുന്നു. ഇതേത്തുടര്‍ന്ന് മനുഷ്യാവകാശ കൗണ്‍സിലില്‍ നിന്ന് പിന്മാറിയ അമേരിക്കയുടെ തീരുമാനവും വിമര്‍ശനങ്ങള്‍ക്ക് വഴിവച്ചിരുന്നു.
https://www.facebook.com/Malayalivartha
