വരാപ്പുഴ ശ്രീജിത്തിന്റെ കസ്റ്റഡിമരണക്കേസിലെ പ്രതിയായ എസ്.ഐ ദീപക്കിനെ വനിതാ മജിസ്‌ട്രേട്ട്. എസ്.ഐ നിരന്തര പ്രശ്‌നക്കാരനെന്ന് പറവൂര്‍ വനിതാ മജിസ്‌ട്രേട്ട് മൊഴി നല്‍കി. ഇതിന് മുന്‍പ് പലതവണ ദീപക്കിനെ താക്കീത് ചെയ്യ്തിരുന്നു. പല കേസുകളിലെയും പ്രതികളെ ദീപക് മര്‍ദ്ദിക്കാറുണ്ടായിരുന്നു. ഹൈക്കോടതി വിജിലന്‍സ് വിഭാഗത്തിന് മജിസ്‌ട്രേട്ട് നല്‍കിയ മൊഴിയില്‍ പറയുന്നു. ശ്രീജിത്തിനെ അറസ്റ്റ് ചെയ്ത ദിവസം മജിസ്‌ട്രേട്ടിന്റെ വസതിയിലെത്തിച്ചെങ്കിലും ശ്രീജിത്തിനെ കാണാന്‍ അവര്‍ തയ്യാറായില്ലെന്ന് ദീപക് മുന്‍പ് ആക്ഷേപം ഉന്നയിച്ചിരുന്നു. അത് വലിയ വിവാദമായിരുന്നു. 

ആര്‍.ടി.എഫിനും പൊലീസിനും എതിരെ കഴിഞ്ഞദിവസം ഹൈക്കോടതി വിമര്‍ശനം ഉന്നയിച്ചതിന് പിന്നാലെയാണ് മജിസ്‌ട്രേട്ടും രംഗത്തെത്തിയത്. ഇതോടെ കേസ് സി.ബി.ഐക്ക് വിടണമെന്ന ശ്രീജിത്തിന്റെ കുടുംബത്തിന്റെയും പ്രതിപക്ഷനേതാവിന്റെ ആവശ്യത്തിന് കൂടുതല്‍ പരിഗണന ലഭിക്കുമെന്ന് ഉറപ്പാണ്. വീടിന്റെ വരാന്തയില്‍ ഉറങ്ങിക്കിടന്ന ശ്രീജിത്തിനെ രാത്രി ആര്‍.ടി.എഫ് കസ്റ്റഡിയിലെടുക്കുകയായിരുന്നു. തിരുവനന്തപുരത്തെ വീട്ടിലായിരുന്ന എസ്. ഐയെ റൂറല്‍ എസ്.പിയായിരുന്ന എ.വി ജോര്‍ജ്ജ് വിളിച്ചുവരുത്തുകയായിരുന്നു. സ്‌റ്റേഷനിലെത്തിയ എസ്.ഐ ശ്രീജിത്തിനെ ക്രൂരമായി മര്‍ദ്ദിക്കുകയായിരുന്നു. കുടിക്കാന്‍ വെള്ളംപോലും കൊടുത്തില്ലെന്ന് ശ്രീജിത്തിന്റെ അമ്മ ശ്യാമള മുന്‍പ് ആരോപിച്ചിരുന്നു. 

അറസ്റ്റിലായ ശേഷം ഹൈക്കോടതിയില്‍ ജാമ്യാപേക്ഷ നല്‍കിയപ്പോള്‍ എസ്.പി തന്നെ കേസില്‍ കുരുക്കിയതാണെന്നും താന്‍ നിരപരാധിയാണെന്നും എസ്.ഐ ആരോപിച്ചിരുന്നു. ഇക്കാര്യങ്ങളെല്ലാം ഹൈക്കോടതി പരിശോധിച്ചു. താമസിക്കാതെ കേസ് സി.ബി.ഐക്ക് വിടുമെന്നും അറിയുന്നു. പൊലിസുകാര്‍ പ്രതിയായ കേസ് പൊലിസ് അന്വേഷിക്കരുതെന്ന് ഹൈക്കോടതി വിധിയുണ്ട്. അത് ചൂണ്ടിക്കാട്ടിയാണ് ശ്രീജിത്തിന്റെ കുടുംബം ഹൈക്കോടതിയില്‍ ഹര്‍ജി നല്‍കിയത്.